“Mbote ia ku Bhana Umbangi mu Ikoka”
1. Ukexilu uebhi ua Jezú u tu tena ku kaiela?
1 Mu sidivisu iê ia kuboka, Jezú ka di tunu kuzuela ni athu mu ikoka ni ididi ia mukua bhua kexile athu. (Luka 9:57-61; Nzuá 4:7) Muéne, ua mesenene ku tula o njimbu iê iambote ku athu oso. Lelu, o ku bhana o umbangi ku athu mu ikoka, kima kiambote phala ku kuatekesa o athu ku kala ni unjimu ua kidistá. (Jisa. 1:20) Se tu mateka ku bhanga kiki ni ku tongolola, tua-nda katula mbote iavulu.
2. Ukexilu uahi u tua tokala ku kala nau kioso ki tu boka mu ikoka?
2 Mateka o ku Bhanga: Mu kidi, kima kiambote ku zukama ku athu emana, mba a xikama mu kididi bhua kingila o dikalu. Londekesa kisangusangu, tala ku pholo ia athu, ni kulondekesa ku tululuka. Se eie ua mu kalakala ni aboki a mukua, kima kiambote kuzuela ni athu ala u bheka uâ. Kua bhingi ué kulondekesa kuila, eie ua mesena o mbote ia muthu ua mu sange. Se bhu bhana, kioso ki mua-nda zubha o kuzuela, ni ku xila kuoso ebhuidisa o muthu kiebhi ki u tena ku mu kunda dingi mu veji iéngi. Saí aboki, izuua ioso a bhana umbangi mu ikoka bhu kididi kimoxi, kiki kia a bhana kithangana kia kuzuela ni muthu iú veji javulu.
3. Kiebhi ki tu tena kulondekesa ku tongolola kioso ki tu bhana umbangi mu ikoka?
3 Ua Tokala u Tongolola: Ijiia kiambote kuebhi ku ua tokala ku kala mu ikoka, ni nanhi u ua tokala kuzuela nê. Ki ku bhingi ku bhana umbangi ku athu oso. Tala kiambote. Mu kifika, se o muthu ua mu kuenda ni lusolo, nange kima kiambote ku mu ehela ku bhita. Kioso ki tu bhana umbangi bhu kididi bhuoso bhua mu kalakala, londekesa ku tongolola, phala ki u thandanganhesa o muthu ua mu langa o akalakadi (gerente). Kima kiambote ku bhana umbangi ku athu kioso kia tunda ku salu, mu veji dia ku a bhana umbangi kioso kia bokona. Zukama ku athu mu ukexilu uambote phala ka thandanganhe. Londekesa ué ku tongolola kioso ki u bhana o divulu. Se muthu ka londekesa kuila ua mesena, eie u tena ku mu bhana o kamukanda, mu veji dia ku mu bhana Mulangidi mba Despertai!.
4. Mukonda diahi o umbangi mu ikoka, ukexilu uambote ua kuboka u bhana kisangusangu?
4 O umbangi mu ikoka, u tu kuatekesa ku muanga o mbutu ia kidi mu kithangana kiofele. (Ndo. 11:6) Saí athu u tu a sanga, nange ki tueji tena ku a sanga mu mabhata mâ, kioso ki tu boka inzo ni inzo. Mukonda diahi, ku bhange ioso phala ku di bhakula mu ku bhana umbangi mu ikoka, o sidivisu iambote i bhana kisangusangu?