Ndunge ia Ubhe Phala ku Bhana Umbangi mu Ididi mu Bhita Athu Avulu
1. O ilunga iala ni ididi mu bhita athu avulu, a a suínisa ku bhanga ihi?
1 O ilunga iala ni ididi mu bhita athu avulu, a a suínisa ku boka ni ka dikalu ka madivulu mba meza a madivulu. Se a-nda boka ni meza a madivulu, ku kala muboki uimana mba u xikama bhu mbandu a meza. Aboki aiadi a tokala ku kala bhu mbandu a meza a madivulu. O jiphange a tokala kulondekesa ngalasa, phala o athu n’a zukame. Se muthu ua mesena ku zukama ku meza a madivulu, o muboki u mateka ku zuela kima, nange uibhuidisa: “O kuila ua dibhuidisa kiá ihi i longa o Bibidia, ia lungu ni maka enhá?” O muboki ua mukua mba kiiadi, a langa o meza a madivulu, kioso kia bhana umbangi.
2. Jimbulula musoso, ulondekesa o valolo ia ku boka mu ididi mu bhita athu avulu ni meza a madivulu.
2 O ndunge íii, i kuatekesa o athu ku di longa o Bibidia. Saí kilumba ua kexile mu di longa mu xikola ia katunda, ua soneka ku filiiale ia Jimbangi ja Jihova kuila, kia mu bhonzele ku sanga o Kididi kia Ubhezelu. Mu semana ia mukuá, muéne ua sange meza a madivulu bhu kanga dia xikola iê. A mateka ku mu longa o Bibidia, lelu a mu batizala kiá ua mu boka ué ni meza a madivulu.
3. Kiebhi kiene mu divua o jiphange, ene mu boka ni ndunge íii?
3 Saí phange ia muhatu ua sangulukile, mu ku bhana umbangi mu ididi mu bhita athu avulu, uambe: “Saí athu eza mu meza a madivulu a katula madivulu a ubhe. A mukuá nuka evuile ia lungu ni Jimbangi ja Jihova. Ngene mu mona kuila ni ndunge íii, athu avulu a tena ku di longa.” Phange ia mukuá uambe: “Íii ndunge iambote ia ku bhana umbangi, mukonda o athu a ku sanga, a mesena kuijiia ima iavulu.”
4. Mukonda diahi, kima kiambote ku ta o meza a madivulu, bhu kididi kimoxi ni mu ola imoxi mu semana ioso?
4 Kima kiambote ku ta o meza a madivulu, bhu kididi kimoxi, mu kizuua kimoxi ni mu ola imoxi mu semana ioso. Kiki ki bhangesa o athu ku mona o meza a madivulu, a divua kiambote, a zukama se hele ni ku bhanga ibhuidisu mba a katula o madivulu. O kuila o kilunga, ki ua tokala kia di sokejeka kiá, phala ku bhana umbangi ni ndunge íii? Se kiene, nange ua-nda boka ué ni ndunge íii ni u sanzumune “o Njimbu ia Utuminu ua Nzambi.”—Luk. 9:60.