Kumbidila Kiambote o Kithangana Kiê mu Ukunji
Ku muvu ua 2014, o Jimbangi ja Jihova a bhange 1.945.487.604 a ji ola mu ukunji—kiki kilondekesa kuila, tua mesenene ku bhanga o sidivisu ia Jihova ni ku suína kuoso! (Jisá. 110:3; 1 Kol. 15:58) Mu kuijiia kuila “thembu ia butu,” o kuila tu tena ku ngastala dingi kithangana mu ukunji, phala ku sota o athu?—1 Kol. 7:29.
Phala ku kumbidila kiambote o kithangana kietu mu ukunji, ku bhinga ku lungulula o ukexilu uetu ua ku boka. Mu kifika, se uene mu ngastala ola imoxi mu ukexilu uoso-uoso ua ku boka, sé ku zuela ni muthu, o kuila u tena ku lungulula o ukexilu uê, phala ku zuela dingi ni athu? Kala ixi iala ni ukexilu uê. O jindunge ji tua-nda di longa, ji tena ku u kuatekesa, ku kumbidila kiambote o kithangana kiê, phala o ji “home jê ki ji lueza.”—1 Kol. 9:26.
Ku Boka Nzo ni Inzo: Tundé ukulu, o aboki a mateka o ukunji uâ, mu ku boka nzo ni inzo. Mu kuijiia kuila, saí athu a kalakala kizuua kioso, ki kima kiambote ku boka nzo ni inzo, mu ngoloxi mba mu usuku, kioso o athu kia kala ku mabhata mâ, phala ku nhoha? Mu muanha, o ku boka mu ikoka mba mu ididi muene mu bhanga-mu o uenji, ku bhekela uê mabesá.
Ku Bhana Umbangi mu Ididi mu Bhita Athu Avulu: O Meza a madivulu ni ka dikalu ka madivulu, a tokala ku a tula mu ididi mu bhita athu avulu. (Tanga o Kikalakalu Kietu kia Utuminu, kia Kavua ka 2013, mban. 5.) Se o ididi ia solo phala ku bhana o umbangi, ki mua mu bhita dingi athu avulu, o Tufunga tua Sidivisu, a tena ku sola se o ka dikalu ka madivulu mba meza a madivulu, a tokala ku a tula mu ididi iéngi mu bhita athu avulu.
Ku Kunda Dingi o Athu ni ku Longa o Bibidia: O kuila u tena ku lungulula o kithangana kiê, phala ku kunda dingi o athu ni ku longa o Bibidia, se u mona kuila, kua mu di tunda kiambote mu maukexilu a mukuá a ku boka? Mu kifika, se ku boka nzo ni inzo ku bhana dingi kia Sábhalu mu kamene, o kuila u tena ku longa o Bibidia mu muanha mba mu ngoloxi? Mu ku kunda dingi o athu, o kuila o aboki a tena ku bakana ku kunda o maxibulu mu kithangana kiéngi, se a tungu bhua moxi, phala ku kumbidila kiambote o ukunji?
Mu kidi, tu tena ku kondala o ji ola ji tu bhanga, mu ukexilu uoso-uoso ua ku boka, o kisangusangu kietu ki di bandekesa dingi kioso ki tu ditunda kiambote. Se u mona kuila, saí ukexilu ua ku boka ki ua mu ditunda kiambote, fikisa ndunge iéngi. Samba kua Jihova o “Ngana uavu mábhia mê,” n’a ku kuatekese ni u tene ku kumbidila kiambote o kithangana kiê mu ukunji!—Mat. 9:38.