Kibhuidisu mu Kaxa

◼ Nanhi ua Tokala ku Bhinga o Madivulu mu Internete?

O madivulu metu ala ni mbandu mu tena o ku soneka o athu phala ku bhinga ku filiiale o madivulu, mba ku a kunda ku Jimbangi ja Jihova. Mu ku kaiela-ko, o kijimbuete kietu www.watchtower.org o athu a tena ku soneka-mu phala ku bhinga mbangi ia Jihova phala ku mu longa o Bibidia. O maujitu’â, a mu kuatekesa athu avulu ku di longa o kidi. Maji, kuene mu kala maka kioso o aboki a soneka mu jimbandu jiji phala o jindandu jâ ku tambula madivulu, mba ku a kunda.

Saí athu ene mu ku a tumikisa madivulu ka a bhingi ku filiiale, ene mu di tatela, mu ku divua kuila o kilunga kietu kia mu ku a thandanganhesa, ni ku banza kuila tuala ni majina mâ mu madivulu metu. O aboki ene mua tumikisa phala ku kunda muthu ka bhingi ku a kunda, ene mu divua kia iibha kioso o muthu kia a tambuijila ni njinda. Kienhiki, o athu a mesena o madivulu metu, ene a tokala ku bhinga, kana o aboki mba athu a mukuá a mesena kuila o jindandu jâ, mba makamba a a kunda. Se o filiiale u mona kuila muboki ua tumikisa mukanda phala ku kunda muthu, o filiiale ka-nda tambuijila.

Kiebhi-phe ki tu tena ku kuatekesa ndandu mba kamba mu ukexilu ua nzumbi? Se eie ua mesenene, kuila muéne u tambula madivulu, mukonda diahi ki u mu tumikisa kala ujitu? Se muéne ulondekesa kuila ua mesena ku mu kunda ku Jimbangi ja Jihova maji eie ku ijiia kiebhi ki u zuela ni tufunga tua kilunga kia mbanza ienioió, ua tokala ku soneka, ni ku tumikisa o kamukanda Queira visitar (S-43) ku seketa ia kilunga kiê, phala ku tonginina, ni ku tumikisa ku filiiale. Maji se o muthu ua mesena o madivulu uala mu kaleia, mba mu kididi kia athu ene mu nua milongo mba ji droga, mba mu kididi kia ku saka, eie ku tokala ku soneka ku filiiale n’a tumikisa-ku muthu. Maji eie u tena ku mu suínisa kuzuela ni jiphange ene mu kunda o ididi ienioió, mba kua suínisa ku soneka ku filiiale.