Kunde-nu o Athu ni Lusolo

Tundé kia bhange o kijimbuete kietu, athu avulu a bhinga milongi ia Bibidia bhu kaxi ka jw.org. O ku boka mu maukexilu a ubhe bhu kididi bhu bhita athu avulu, ku bhangesa athu avulu ku bhinga kua longa. O jiphange ku Filiiale, a tambuijila o athu iâ ni lusolo. Mu kifika, se muthu u bhinga milongi bhu kaxi ka jw.org, o tufunga a tokala bhu mbambe kua tungu o muthu, a soneka ku jiphange ku filiiale mu ku bhita izuua iiadi. Maji, saí athu a mesena ku di longa, a a kundu ngó mu ku bhita semana javulu. Ihi i tua tokala o ku bhanga, phala ku kuatekesa o athu, phala ka kale ni usudi?​—Mar. 4:14, 15.

Se kuala muthu ka tungu mu mbambe iê, ua mesena ku di longa, ku laleke, soneka kamukanda Queira Visitar (S-43) bhana-u ku seketa mu kizuua kia kiônge. Mu bhita kizuua kimoxi mba izuua iiadi, o seketa ua tokala ku u tumikisa ku kilunga kia tokala mu mbambe ia muthu mba ku u tumikisa ku Filiiale bhu kaxi ka kijimbuete kia kilunga mu jw.org. O tufunga a tokala ku tonginina o kijimbuete kietu mu ithangana ioso. Se a tambula kamukanda phala ku kunda muthu, a tokala ku mu sota sé ku laleka. O muboki a mu tendelesa ku kunda o muthu, ua tokala ué ku mu kunda ni lusolo. Se ka mu sange-mu, nange u tena ku xisa kamukanda ni kijimbuete kiê kia kafuetele.