Langa o Kilunji Kiê
1. Diebhi o diambu dia kiônge kia ilunga phala o muvu ua sidivisu ua 2013 ni a di pelepalala phala-hi?
1 Jezú ua longo o maxibulu mê o ku zola Jihova ni muxima uâ uoso, muenhu ni ilunji iâ ioso. (Matesu 22:37, 38) O iônge ia makota phala o muvu iú, a i bhange phala ku kuatekesa o muxima uetu, kitongoluelu kietu ni kilunji. Eie nange ua mu lembalala kuila, o kiônge kietu kia dikota kiambe ‘Langa o Muxima uê!’ O kiônge kionene kia muvu iú kiala ni diambu “Langa o Kitongoluelu Kiê.” O iônge ia ilunga ia-nda mateka ku mbeji iza-mu, iala ni diambu “Langa o Kilunji Kiê” dio katule mu divulu dia Matesu 22:37. O milongi íii a i pelepalala phala ku kuatekesa etu enioso, ku tonginina kiambote o ixinganeku ietu phala a i uabhele dingi kua Jihova.
2. Ibhuidisu iebhi i tua tokala ku sota o itambuijilu iê mu kiônge kia ilunga?
2 Ihi i Tua-nda di Longa: Kioso ki tua-ndaia ni kuívua o milongi, tua tokala ku sota o itambuijilu ia ibhuidisu íii mukonda jene o jipondo ja beta-kota:
• Kiebhi ki tu tena ku lenga o ‘ixinganeku ia athu’?
• Kiebhi ki tu tena o ku kuatekesa mu ku katula mua vundu o ilunji ia athu a kambe ku xikina Nzambi?
• Ukexilu uebhi u tua mesena ku kala nau?
• Mbote jahi jijila mu ku xinganeka mu ima iambote?
• Kiebhi ki tu tena kuehela Jihova o ku umba o ibanzelu ietu?
• Kiebhi o anumi, o ahatu, o jitata ni tuana, kia tena ku bhangesa o muiji o ku zediua?
• Kiebhi ki tu tena ku kala polondo phala o kizuua kia Jihova?
• Ihi ilombolola ku kala polondo phala o ikalakalu?
• Mbote jebhi jijila mu ku kumbidila ioso i tua di longo?
3. Mukonda diahi kima kiambote kuia o izuua iiadi, kuívua kiambote ni ku kumbidila o milongi?
3 Satanaji ua mu bhanga ioso phala ku zanga o ilunji ietu (2 Kol. 11:3) Mu kiki-phe, tua tokala ku langa o ilunji ni ixinganeku ietu. (1 Kol. 2:16) Mu kiki, bhanga ioso phala kuia mu izuua iiadi. Ivua kiambote. Ku kumbidila ku muenhu uetu o milongi ioso i tua-nda tambula, kua-nda suínisa o kilunji kietu phala ku kalakala ni vondadi ioso mu ukunji uetu. – 1 Phe. 1: 13.