Ívua ni u Katule Mbote
1. Ihi i tua tokala o ku bhanga phala kuívua ni ku katula mbote mu kiônge kia dikota?
1 Kua kambe ngó bhofele, o kiônge kia dikota kia 2013 kia-nda mateka. A mu bhanga ioso phala o milongi i tu kuatekese mu sidivisu ia ku boka ku mundu uoso. O kuila ua di sokejeka kiá, phala kuia mu kiônge kia dikota mu izuua itatu? Mu kiônge kia dikota muene mu kala ilunga iavulu, sé ki tu di lange tu tena ku landuka, mu kiki-phe tua tokala ku bhanga ioso, ni tu tene ku katula mbote mu milongi. O kiônge kia dikota, kiene mu laleka dingi, o iônge ietu mu kilunga ndenge, tua tokala ku di sokejeka phala kuívua o milongi ioso sé ku landuka ni ima iéngi. Ihi ia-nda tu kuatekesa kuívua kiambote?—Mate. 31:12.
2. Kiebhi ki tu tena ku pelepalala o muxima uetu phala o kiônge kia dikota?
2 Ande dia ku Mateka o Kiônge: Mu Site ietu www.jw.org, tu sanga-mu o milongi ia kiônge ni kibatulu kia Bibidia kia kizuua ni kizuua. Se uala ni Internete, o ku tanga o milongi iala-mu ia-nda tu kuatekesa ku pelepalala o muxima uetu. (Eji. 7:10) Mu kizuua kiê kia Ubhezelu ku Muiji, o kuila u tena kuzuela ni muiji uê ia lungu ni milongi ia kiônge kia dikota?
3. Ihi ia-nda tu kuatekesa kuívua kiambote?
3 Mu Kithangana kia Kiônge: Se ki bhana ndé mu inzo ia dixidixilu, ande dia ku mateka o milongi. Jika o mutelembe ua kafuetele, phala ki u landukise akuenu kioso ki uia ni ku xinda ni ku tanga njimbu, mba ku tumikisa njimbu mu kithangana kia kiônge. Se ku mesena ku jika o mutelembe ué, sosolola-o o dízui phala ki u thandanganhese akuenu. Se uambata o komputadolo iê, kana ku bhangesa akuenu ku thandanganha. Kana kudia mba kunua kazoza mu ola ia milongi. (Ndo. 3:1) Tala o mulongexi kioso kia zuela. Kaiela mu Bibidia iê, kioso o mulongexi kia tanga kibatulu. Kana ku soneka kiavulu.
4. Kiebhi o jitata kia tena ku kuatekesa o tuana, phala kuívua ni ku katula mbote?
4 O tuana a tokala uâ kuívua ni ku katula mbote. O divulu dia Jisabhu 29:15, di zuela: ‘Mona ndenge-phe se a mu talela ngó, sé ku mu bazela, mungu u kuatesa jisonhi kua manh’â.’ Mukonda dia kiki, o jitata a tokala ku xikama kumoxi, phala kuijiia kuila o tuana a mu katula mbote, mu veji dia ku a ehela kuzuela, ku tumikisa njimbu, mba ku nhunga-nhunga ngó. Né muene sé ene an’a ndenge hanji phala ku tendela o milongi ioso, né kiki a tokala ku a longa phala ka bhange jibuia ni kuívua kiambote.
5. Mukonda diahi kima kiambote ku bhitulula o milongi, ni kiebhi ki tu tena ku bhanga kiki?
5 Mu Disukilu dia Milongi: Kana ku bhixila tádidi. Zeka selu. O ku bhitulula o milongi i ua di longo kiá, ia-nda ku kuatekesa ku i bhaka ku muxima. Kima kiambote kuzuela ni muiji ia lungu ni milongi ia kizuua. Se uia bhu kididi kioso-kioso, ni makamba mê, o kuila u tena ku a tangela o milongi ia ku uabhela dingi mu kiônge? Mu ku vutuka kubhata, zuela ni muiji uê mu Kizuua kia Ubhezelu, kiebhi ki mu tena ku kumbidila o milongi i mua di longo. Kima kiambote se u sola kithangana phala ku bhitulula o madivulu mba vidiu ia ubhe ia bhana mu kiônge kia dikota.
6. O kuila kabasa kuia ngó mu kiônge kia dikota? Jimbulula.
6 Phala kuijiia kuila o kudia kua uabha tua tokala tu dia ni tu thaulula kiambote. Kiene kimoxi ué ni kudia mu nzumbi, ku tua-nda tambula mu kiônge kia dikota. Tua-nda katula dingi mbote mu milongi ia kiônge kia dikota, se tuia mu izuua itatu, sé tuívua kiambote ni ku i kumbidila ku muenhu uetu.