“Bhongolola o Mundu”
1. Kiebhi o kiônge kia dikota, ni kiônge kia mundu uoso, kia difu ni ku di bhongolola kua akua Izalaiele kioso kia tundu ku Ijitu?
1 Kioso kia tundu ku Ijitu, Jihova ua tumu Mozé ku “bhongolola o mundu” ku Mulundu ua Sinai, phala kuívua o milongi Iê, ni ku longa o tuana tuê. (Mate. 4:10-13) O ku bhanga kiki, kia a suínisa kiavulu! Mu jimbeji ja-nda kaiela, o mundu ua Jihova ua-nda di bhongolola mu kiônge kia dikota ni kiônge kia mundu uoso, phala kua longa kua Jihova. Ihi i tua tokala o ku bhanga phala ku katula mbote?
2. Ihi i tua tokala o ku bhanga, phala ku kala “polondo,” phala o kiônge kia dikota?
2 “Kala Polondo”: Jihova ua tumina o akua Izalaiele ku kala “polondo,” phala ku di bhongolola ku mulundu ua Sinai. (Mak. 19:10, 11) Athu oso a-ndaia mu kiônge kia dikota a tokala ku di pelepalala kiambote, ki ió ngó a-nda kala ni mbandu mu kiônge. Mu kifika, athu avulu a-nda bhinga izuua ia ku nhoha ku salu. Nange, o mak’ê a difu ni a Nehemiia. Muéne ua mesenene kueha o salu iê ia Kopelu ia Sobha Artaxexe, phala kuia ku Jeluzaleme mu kuatekesa ku tunga o tembulu, maji muéne uejidile kuila o sobha keji uabhela o njimbu íii. Nehemiia ua sambe kua Nzambi, iu ua bhingi kua Sobha ni ku lenduka kuoso. O sobha ua xikina, iú ua kuatekesa ué o kikalakalu! (Neh. 2:1-9) A-nde dia ku bhinga kua xefe iê phala ku tunda, o kuila ua sokejeka kiá kiambote o ima iê? O tufunga a-nda kala polondo, phala ku kuatekesa uoso ua bhindamena kikuatekesu. Bhanga ioso phala ku bhixila selu, ni ku katula mbote mu milongi i tua-nda kuívua.—Jihe. 2:1.
3. Ihi ia-nda tu kuatekesa ku pelepalala o muxima, phala o kiônge?
3 O kima kia mukuá ki tua tokala o ku bhanga, o ku pelepalala o muxima uetu phala kuívua ni ku katula mbote. (Eji. 7:10) O milongi ia kiônge kia dikota, ia-nda kala mu kijimbuete kietu jw.org, kua-nda kala ué diambu dia madiskursu, ni ibatulu ia Bibidia. O milongi íii, i tena ku kuatekesa o muiji ku di longa ku ubhezelu ku muiji mu semana ia kiônge kia dikota. Saí aboki a katula o milongi mu kijimbuete kietu phala kuambata mu kiônge kia dikota ni ku soneka-mu.
4. Kiebhi o jitata, kia tena ku longa o milongi ia kiônge kia dikota ku tuana tuâ?
4 ‘Longa o Tuana Tuê’: O akua Izalaiele a di bhongolole ué ku Mulundu ua Sinai phala ‘ku longa o tuana tuâ.’ (Mate. 4:10) O kiônge kia dikota, kia-nda kala kithangana kiambote phala o jitata ku longa o tuana. O jitata a tokala ku xikama kumoxi ni tuana tuâ, phala kua kuatekesa ku katula mbote. Kioso kia-nda zubha o kiônge mba mu kizuua kia ubhezelu ku muiji, o miji a tena ku di longa kumoxi o milongi ia kiônge kia dikota.
5. Mbote iahi i tua-nda katula, mu ku kala mu kiônge kia dikota?
5 O ku di bhongolola ku Mulundu ua Sinai, kia kuatekesa ué o akua Izalaiele ku kala kumoxi kala mundu ua Nzambi. (Mate. 4:7, 8) O kiônge kietu kia dikota, ki tu bhana ué kithangana kia ku kala kumoxi. Mu izuua itatu, tu tena ku tunda ku mundu ua Satanaji phala ku kala ni ku tululuka, kumoxi ni mundu ua Jihova. (Iza. 35:7-9) Mukonda o kizuua kia Jihova kia zukama, ki tu tokala ku kamba ku katula mbote mu kithangana kiki, phala ku di suínisa!—Jihe. 10:24, 25.