O Kiônge Kietu Kia Dikota—ki Bhana Umbangi ua Kidi
1. Kithangana kiebhi kia kexile mu bhana ku akua Izalaiele mu jifesa ja bhangele?
1 O tufunga mu Izalaiele, akexile mu diongeka lutatu lua ji veji ku muvu, phala ku bhanga fesa. Sumbala o maiala ene ngó akexile ni ujitu iú, o miji ioso a bhangele njila mu Jeluzaleme, phala ku katula mbote mu iônge íii ia makota i sangulukisa. (Mate. 16:15, 16) O iônge íii, i bhana kithangana kia ku xinganeka o kidi kia nzumbi. O kidi kiki ihi? Kia dianga, Jihova mu henda iê u Dikila o ibhindamu ietu. (Mate. 15:4, 5) Kia kaiadi, kua muene a tena ku dielela kitendelesu ni dilengelu. (Mate. 32:9, 10) O Izalaiele eji xinganeka ué mu kuijiia kuila exile mundu ua dijina dia Jihova, ene a tokalele kulondekesa o ufiiele uâ. (Mate. 7:6, 11) Lelu, tu katula mbote iavulu mu iônge ietu ia makota.
2. Kiebhi o kiônge kia dikota kio iudike, kia-nda bhana mukengeji ua kidi?
2 Mukengeji ua Kidi: Mu iônge ietu ia makota, tu katula mbote mu madiskursu, drama, ifika, ibhuidisu ilondekesa o mukengeji ua kidi. (Nzuá 17:17) Kikalakalu kiavulu kia lungu ni kiônge kia dikota, kia mu bhixila. O kilunga kia Jihova, kia mu iudika kiônge kia tokala, phala ku suua o ibhindamu ia athu ku mundu uoso. (Mat. 24:45-47) O kuila eie ua mu kingila ni kisangusangu ku mona ni kuívua ioso ia-nda bhita?
3. Ihi i tua tokala o ku bhanga phala ku katula mbote mu kiônge?
3 Mu kidi, tua-nda katula mbote iavulu se tuia mu kiônge kiki, ni kuívua kiambote mu izuua itatu. Se ku di sokejeke luua, zuela kiá ni Phatala iê. Bhanga ioso ni kithangana kia soko, ni ku nhoha kiambote mu mausuku, phala ni u kale ni mátui tekenge. Athu avulu a banza kuila, o ku mona ku mulongexi, ni ku soneka ia mesena, ki a kuatekesa kuívua kiambote. Kana kuehela o mutelembe uê ua kafuetele ku landukisa, ki kale eie ni akuenu. Kana kuzuela, ku xakuta, kudia, mba kúnua mu ola ia milongi.
4. Kiebhi o jitata kia tena ku kuatekesa o tuana tuâ, mu kithangana kia kiônge kia dikota?
4 Ku mivu ia ji sábhalu ji kola, kioso o miji ia Izalaiele kia kexile mu diongeka phala kuívua o Ijila ia kexile mu tanga ia lungu ni jifesa ja balaka, ene a diongekele kumoxi ni “an’a ndenge” ‘phala kuívua, ni ku di longa.’ (Mate. 31:12) Ki suinisu kia dikota ku mona o miji a xikama kumoxi mu kiônge kia dikota, ni minzangala ala ni mátui tekenge! Mukonda diahi mausuku oso ki mu diongeka ni muiji, phala ku xinganeka kumoxi o milongi i mua soneka? “O uôua ua nhenganana ku muxima ua mona ndenge,” mu kiki, kima kiambote o jitata ku langa o tuana ni minzangala ala kiá mu kitala kia tokala, mu kithangana kia ku nhoha, mu veji dia kua “xisa ubheka uâ.”—Jisa. 22:15; 29:15.
5. Kiebhi o ukexilu uetu uambote kioso kia tu zalela, ua-nda bhana umbangi ua kidi?
5 O Ukexilu Uetu Uambote u Bhana Umbangi ua Kidi: O ukexilu uetu uambote mu mbanza ia kiônge kia dikota, u bhana umbangi ua kidi. (Tito 2:10) Se a tu zalela, tua tokala kulondekesa ukexilu uambote ua kuzuela ni mukua dibhata. (Kol. 4:6) Saí phange ia filiiale, kioso kia kexile mu zuela ni muendexi ua hotele phala ku zalela o jiphange jetu, o muendexi uambe: “Tua zolo ku zalela o athu iá, mukonda dia ukexilu uâ. Ene a xila kiambote o akalakadi etu, ni athu oso.”
6. Kiebhi ki tu tena ku bhana umbangi ua kidi, mu ukexilu ua ku zuata mu mbanza ia kiônge kia dikota?
6 Kioso ki tu ta o kalatá k’etu ka kiônge kia dikota, ki ka bhana ngó umbangi ni ku tu mona ku akuetu aia ué ku kiônge, maji ki bhana ué umbangi ku athu a mu tu mona. O athu mu mbanza ia kiônge, a-nda mona oso a te o kalatá ka kiônge kia dikota ni uzuatelu uâ uambote, ki u difu ni athu ku mundu. (1 Tim. 2:9, 10) Mu kienhiki, tua tokala ku tonginina kiambote o izuatu ietu mu mbanza ia kiônge ni bhu kididi bhua tu zalela. Ku zuata ngó, ki ku bhana umbangi. Né muene se o kiônge kia dikota kia-nda bhita bhu kanga dia hatu, tua tokala ku zuata ni ku di iudika kiambote. Se tu sola ku ta izuatu iéngi kioso ki tu tunda mu kiônge, phala kuia mudia mu inzo mua bhanga o kudia, ki tu tokala ku zuata kioso-kioso.
7. Uebhi o ukexilu ua ku katula mbote mu ukamba ni jiphange jetu mu nzumbi, mu kithangana kia kiônge?
7 O akua Izalaiele akexile mu katula mbote mu ukamba ni abhezi a mukua mu jifesa ja kexile mu bhanga, kiki kia a bhangesa ku kala kumoxi. (Ikalakalu 2:1, 5) Tu katula mbote iavulu mu ukamba ni jiphange jetu mu nzumbi, mu kithangana kia kiônge kia dikota. O ukexilu iú uambote mu nzumbi, u bhangesa o athu a tu mona ku diuana. (Jisá. 133:1) Tu tena kuambata o kudia kuetu, mu veji dia ku sumba kudia bhu kanga, kiki ki tu bhana dingi kithangana kia kuzuela ni jiphange jetu a xikama kumoxi n’etu.
8. Ima iahi i tu bhangesa ku di bheka phala ku kalakala mu kiônge, se o kithangana kietu ki bhana?
8 Mu ithangana ioso o athu a tu mona a di uana kiavulu, mukonda dia iônge ietu ia makota io iudike kiambote, bhenge-bhenge kioso ene kia mona kuila o kikalakalu kioso a mu ki bhanga ku athu a di bhakula mu vondadi iâ. O kuila eie u tena ‘ku di bhakula mu vondadi iê’ phala ku kalakala mu kiônge kia dikota? (Jisá. 110:3) Saí miji a di bhakula mu ithangana ioso phala ku kalakala mu iônge ienii, phala ku longa ku tuana tuâ o ukexilu ua ku di bhakula. Se eie ku tena kuzuela ni athu avulu mukonda dia jisonhi, o ku kalakala mu iônge íii, kua-nda ku bhana kithangana kiambote kia kuijiia phange jengi. Saí phange ia muhatu uambe: “Eme ki ngeji-dile athu engi, katu-ko o muiji uami, ni makamba-mami. Maji kioso ki nga kuatekesa mu kikalakalu kia ku zelesa o kididi, nga tena kuijiia phange javulu ja mala ni ja ahatu. Kia ngi bhana kisangusangu kia dikota!” Kuijiia makamba a mukua, mu ku kalakala mu kiônge, kia-nda tu sangulukisa kiavulu. (2 Kol. 6:12, 13) Se nuka ua di bhakula, ibhuidisa ku tufunga tua kilunga kiê, phala kuijiia kiebhi ki u tena ku kuatekesa.
9. Kiebhi ki tua-nda kuixana o akuetu phala kuíza mu kiônge kia dikota?
9 Ixana Akuenu Phala Kuívua o Kidi: Semana jitatu ande dia ku mateka o kiônge kietu, kala ku mivu itatu ia bhiti, tua-nda bhana o tumikanda phala kuixana akuetu ku kala n’etu. O ilunga a-nda mesena kiavulu ku boka o mbambe ioso ni tumikanda tua kiônge kia dikota. (Tanga o kaxa “Kiebhi ki tua-nda bhana o tumikanda?”) Tumikanda tuoso tua-nda subhuka, a tokala ku tuambata mu kiônge kia dikota ni ku tu bhana ku alondekexi. O tumikanda tutu, a-nda tu bhana ku athu engi mu mbanza ia kiônge.
10. Tanga misoso ilondekesa kuila o kikalakalu kietu kia ku bhana o tumikanda, kiene mu di tunda kiambote.
10 O kuila o athu a xikina kioso ki tu bhana o tumikanda? Saí dikaza, a a kuatekesa ku mbangi ia Jihova ku sanga kididi mu kionge kia dikota. Ene ambe kuila a tambula o kamukanda “ka kexile ni ibanzelu iambote.” Ene a bhange njila mu 200 ndenge ja kilómetro phala kuia mu kiônge kia dikota. Mu kifika kia mukua, saí phange ia muhatu ua boko inzo ni inzo, ua bhana kamukanda ku diiala dia londekesa kuila ua mesenene o kamukanda. Mu kiki, muéne ua bhange nê kithangana phala ku mu kuatekesa ku tendela kiambote o kamukanda. Mu ku bhita izuua, kioso kia kexile kiá mu kiônge kia dikota, ua mono o diiala uai ni dikamba diê mu kiônge iá akexile mu kuambata o ujitu ua bhana mu kiônge.
11. Mukonda diahi o iônge ietu ia makota kala muvu, ia beta-kota?
11 O jifesa mu Izalaiele ja kexile ujitu ua henda ia Jihova, phala ku kuatekesa o akua Izalaiele mu ku ‘sidivila ni muxima ua tenena ni kidi.’ (Josu. 24:14) Kiene kimoxi ni iônge ietu ia makota, i tu kuatekesa “kuenda izuua ioso mu kidi,” o kima kia tokala mu ubhezelu uetu. (3 Nzuá 3) Jihova u besoala oso a zolo o kidi, ku katula mbote mu kiônge kia dikota!
[O pondo ia tokala ku mbandu 4]
O ukexilu uetu uambote, ni ua ku di iudika mu mbanza ia kiônge, u bhana umbangi ua kidi
[O pondo ia tokala ku mbandu 5]
Kala mu ukulu, semana jitatu ande dia ku mateka o kiônge kietu, tua-nda bhana o tumikanda phala kuixana akuetu ku kala n’etu
[Kaxa ku jimbandu 3-6]
Itendelesu Phala o Kiônge Kia Dikota Kia 2012
◼ Ola ia ku Mateka: O milongi ia-nda mateka mu 8:20. Mu izuua itatu ia kiônge, o mabhitu a-nda kua jikula mu 6 dia ola mu kamene. Kioso o muendexi ua milongi kia-nda zuela kuila o mukumbi ua-nda xika, etu enioso tua tokala kiá ku kenga o ididi ietu, phala o milongi i mateke mu ukexilu uambote. Kia Sesa ni kia Sábhalu, o kiônge kia-nda zumbuka mu 15:55, mu tádidi. O kia Lumingu, o kiônge kia-nda zumbuka mu 14:40 mu tádidi.
◼ Kididi Kia Makalu: O ididi ioso mua-nda bhita o iônge ia makota, muala ididi phala ku bhaka o makalu, ki ku bhingi ku futa kitadi, maji o muthu u bhixila selu, muéne uanda dianga ku bhaka o dikalu diê. O makalu ambata o inema, ala kiá ni kididi kia kua bhaka. Mu kuijiia kuila o ididi ia ku bhaka o makalu iofele, se bhu bhana, athu avulu a tokala ku bhanga njila mu dikalu dimoxi.
◼ Ku Bhaka Ididi: Ua tokala ku bhaka ngó ididi phala o athu a tungu kumoxi n’eie, ni iâ a bhanga njila mu dikalu dimoxi, mba maxibulu mê a Bibidia.—1 Kol. 13:5.
◼ Tua ku dióndo, ambata kúdia phala o ola ia ku nhoha, mu veji dia ku tunda mu kididi kia kiônge phala kúdia. U tena kuambata kaxa kófele i soka bhoxi dia kialu kia dikalu phala ku bhaka-mu kudia. Maji o ji kaxa ja makota, jikopho, ji ngalafa, ni ima ia vídulu, ka tokala ku iambata mu kididi kiki.
◼ Ku Sangela Kitadi: Tu tena kulondekesa o kisakidilu kietu mu ku sangela kitadi mu vondadi ietu, phala ku kuatekesa o ikalakalu mu kiônge kia dikota. O kitadi kioso kia-nda sangela bhu kaxi ka xeke, a tokala ku ki soneka phala o “Kilunga kia Jimbangi ja Jihova.” Mu ku mateka ni muvu iú, mu iônge ioso ia makota a-nda xikina ku sangela kitadi mu kaxi ka ji kalatá, ni ji xeke.
◼ Ku di Kuama ni Mauhaxi a Moneka ni Lusolo: Se bhu moneka maka alungu ni uhaxi u moneka ni lusolo bhu kididi kia kiônge kia dikota, tua ku dióndo, sota o mulondekexi, muéne ni lusolo ua-nda kuambata bhu kididi kia ku saka, phala o jiphange jetu jala ni uhete, a tene ku kuatekesa. Se ku bhinga, ene a-nda xinda ku inzo ia ku saka phala ku bhinga kikuatekesu. Kiki kia-nda kuatekesa o sidivisu ia ku saka o mauhaxi a moneka ni lusolo, ku di pelepalala phala ku tambuijila kioso o mutelembe u xika.
◼ Milongo: Se ua bhingi ku tambula milongo a ku sonekena na-iu kua dotolo, ambata na-iu mukonda se-ku milongo íii, mu kiônge kia dikota.
◼ Idiatelu: Mivu oso, athu avulu ene mu di kuama mukonda dia idiatelu. Kima kiambote ku sola idiatelu i ku kuatekesa kuenda kiambote, mu ididi ioso.
◼ Afú o Mátui: O kiônge kia-nda bhita mu kizuua kia 19 kate mu 21 mu mbeji ia Kakuinhi ku Viana, ku muvu iu ua 2012, mua-nda kala ilongesu ia ijimbuete phala ió afú o mátui.
◼ Dikalu Dia Kuambata Mona ni Ialu Iéngi: Ka tokala kuambata dikalu dia kuambata mona, ni ialu iéngi mu kiônge kia dikota.
◼ Maji a Mazumba: Kuma tua-nda kala bhu kaxi ka athu avulu, kima kiambote kuia bhu kididi kiki sé ku dita maji avulu a mazumba, a tena ku bhekela maka ku athu kala ni sauidi iambote.—1 Kol. 10:24.
◼ Formulários Queira Visitar (S-43): A tokala ku soneka mu kamukanda queira visitar, o itendelesu ia lungu ni muthu ua londekesa kuila ua xikina o njimbu ia mu tula mu kithangana kia kiônge kia dikota. O aboki a tokala kuambata kamukanda kamoxi, mba luiadi, mu kiônge kia dikota. O kamukanda ko soneke, a tena ku ka bhana ku kididi kia ku bhana o madivulu, mba ku seketa iê kioso ki ua-nda vutuka ku kiônge kia dikota.—Tanga O Kikalakalu Kietu Kia Utuminu kia mbeji ia Kasambuadi ia muvu ua 2011 mu mbandu ia 3.
◼ Inzo ia ku Bhanga Kúdia: Bhana kiximanu ku dijina dia Jihova, mu kaxi ka ukexilu uê mu inzo ia ku bhanga kúdia.
◼ Ku Kalakala mu Vondadi iê: O kisangusangu ki tu kala na-kiu, mu kuia mu kiônge kia dikota, kia-nda dibandekesa dingi se tu di bhakula phala ku kalakala mu vondadi ietu. O athu ala mu kitala kia 16 kia mivu, a tena ku kuatekesa ué mu ikalakalu ni kikuatekesu kia jitata jâ, mba muadiakimi uéngi.
[Kaxa ku mbandu 6]
Kiebhi ki Tua-nda Bhana o Tumikanda?
Mukonda dia kuboka o athu oso mu mbambe ietu, ki tu tokala kuzuela kiavulu. Tu zuela ngó: “Kiebhi ki uala. Tua mu bhana o kamukanda kaka ku mundu uoso, ka lungu ni kiônge kia dikota, kaka, o kamukanda kê. Eie ua-nda sanga dingi itendelesu mu kamukanda kaka.” Bhanga ni kisangusangu. Mu ku bhana o tumikanda mu disukilu dia semana, u bhana ué O Mulangidi ni Despertai! se bhu bhana.