O Ukexilu Uambote u Bhana Kijingu Kua Nzambi
1. Ihi i bhangesa o athu kuijiia kuila, o Jimbangi ja Jihova ala ni kiônge kia dikota?
1 Kioso ki tu diongeka mu kiônge kia dikota, saí athu ene mu tu mona. Saí madiembu muene mu bhita o kiônge, o mitelembe ene mu bhana ngolokela kuila, kua-nda kala kiônge kia dikota. O jinzo ja ku zalela ajitu, jene mu kuizala ni athu avulu, o athu a tungu ku mbandu, a mona o kalatá ka kiônge kia dikota ku jiphange. Tua-nda di longa itendelesu, ia-nda tu kuatekesa ku bhana kijingu kua Nzambi, mu ku kala ni ukexilu uambote, kioso ki tuia mu kiônge kia dikota.—1 Phe. 2:12.
2. Kiebhi ki tu tena ku bhana kijingu kua Nzambi, kioso ki tuia mu kiônge kia dikota?
2 Ku Zuata Kiambote: O athu a diuana kioso kia mona o ukexilu uetu uambote ua ku zuata. Mu kiki-phe, tua tokala ku zuata kiambote mu ithangana ioso, kála kioso ki tu bhixila mu inzo ia ku zalela ajitu, ki tuia mudia, kioso ki tuia mu sumba kama koso-koso ni mu ithangana ia mukuá dingi, mukonda a-nda tu mona ku athu. Né muene se ki ku bhingi ku ta izuatu ia fuama kiavulu mu ithangana iéngi, maji o izuatu ietu ia tokala i zela, ki tu tokala ku zuata ngó. O athu a tokala ku tu mona kuila etu ki tu difu ni ió ki jimbangi ja Jihova. (Lom. 12:2) Tua tokala ué, ku kala ni kalatá k’etu, ka kiônge kia dikota, phala ku bhana umbangi ua lungu ni kiônge, ni ku di tungula bhu kaxi ka athu.
3. Kiebhi ki tu londekesa o muanhu ni ngalasa?
3 Londekesa Muanhu ni Ngalasa: Lelu saí athu a di zolo ngó mudiâ, a kambe o kisakidilu. Se tu londekesa muanhu ni ngalasa, o athu a-nda mona o ukexilu uetu, ki kale mu inzo ia ku zalela ajitu, mba mu kididi kia kudia. (2 Tim. 3:1-5) Kioso ki tu bhaka kididi mba kioso ki tuia mu tambula o madivulu a ubhe, a bhana mu kiônge kia dikota, ki tu tokala ngó ku suua o mbote ietu, maji tu suua ué o mbote ia akuetu. (1 Kol. 10:23, 24) Kioso kia zubha o kiônge kia dikota, saí diiala uambe: “Nga jimbi kiá o milongi ioso, maji ki ngi jimbe o ukexilu uambote ua Jimbangi ja Jihova.”
4. Mukonda diahi, tua tokala ku banza ku kalakala mu kiônge kia dikota, se o kithangana ki bhana?
4 Ku di Bhakula Phala ku Kalakala: O Jikidistá a uabhela kiavulu o ku kalakala, mu vondadi iâ. (Jisá. 110:3) O kuila ua mesena ku kalakala mu kiônge kia dikota? Kua bhiti kiônge kia dikota, o jiphange a di bhakula a tenesa 600 a jiphange ja mala ni ahatu, phala ku komba o kididi ande dia ku bhita o kiônge. Saí athu a zuela kuila: “Nuka tua ki monene! Ki bhonza ku xikina kuila, o athu oso iâ a di bhakula mu vondadi iâ.” Tua mu kingila o kiônge kia dikota, kia muvu ua 2013, ki tua-nda kuívua ngó ni ku katula mbote mu milongi ia Nzambi, maji tua-nda mu bhana uê kijingu.
[Kaxa ku mbandu 3-6]
Itendelesu Phala o Kiônge Kia Dikota Kia 2013
◼ Ola ia ku Mateka: O milongi ia-nda mateka mu 8:20 a ithangana. Mu izuua itatu ia kiônge, o mabhitu a-nda kua jikula mu 6 dia ola mu kamene. Kioso o muendexi ua milongi kia-nda zuela kuila o mukumbi ua-nda xika, etu enioso tua tokala kiá ku kenga o ididi ietu, phala o milongi i mateke mu ukexilu uambote. Kia Sesa ni kia Sábhalu, o kiônge kia-nda zubha mu 15:55 a ithangana, ku tádidi. O kia Lumingu, o kiônge kia-nda bhua mu 14:40 a ithangana ku tádidi.
◼ Kididi Kia Makalu: O ididi ioso mua-nda bhita o iônge ia makota, muala ididi phala ku bhaka o makalu, ki ku bhingi ku futa kitadi, maji o muthu u bhixila selu, muéne uanda dianga ku bhaka o dikalu diê. O makalu ambata o inema, ala kiá ni kididi kia kua bhaka. Mu kuijiia kuila o ididi ia ku bhaka o makalu iofele, se bhu bhana, athu avulu a tokala ku bhanga njila mu dikalu dimoxi.
◼ Ku Bhaka Ididi: Ua tokala ku bhaka ngó ididi phala o athu a tungu kumoxi n’eie, ni iâ a bhanga njila mu dikalu dimoxi, mba maxibulu mê a Bibidia.—1 Kol. 13:5.
◼ Kudia: Tua ku dióndo, ambata kúdia phala o ola ia ku nhoha, mu veji dia ku tunda bhu kididi kia kiônge phala kuia mu sumba kúdia. U tena kuambata kaxa iófele i soka bhoxi dia kialu kia dikalu phala ku bhaka-mu kudia. Maji o ji kaxa ja makota, jikopho, ji ngalafa, ni ima ia vídulu, ka tokala ku iambata mu kididi kiki.
◼ Ku Sangela Kitadi: Tu tena kulondekesa o kisakidilu kietu mu ku sangela kitadi mu vondadi ietu, phala ku kuatekesa o ikalakalu mu kiônge kia dikota. O kitadi kioso kia-nda sangela bhu kaxi ka xeke, a tokala ku ki soneka phala o “Kilunga kia Jimbangi ja Jihova.” Mu ku mateka ni muvu iú, mu iônge ioso ia makota a-nda xikina ku sangela kitadi bhu kaxi ka ji kalatá, ni ji xeke.
◼ Milongo: Se ua bhingi ku tambula milongo a ku sonekena na-iu kua dotolo, ambata na-iu mukonda se-ku milongo íii, mu kiônge kia dikota.
◼ Idiatelu: Mivu ioso, athu avulu ene mu di kuama mukonda dia idiatelu. Kima kiambote ku sola idiatelu i ku kuatekesa kuenda kiambote, mu ididi ioso.
◼ Afú o Mátui: O kiônge kia-nda bhita mu kizuua kia 11 kate mu 13 mu mbeji ia Kamusasadi ku Cuca, ku muvu iu ua 2013, mua-nda kala ilongesu ia ijimbuete phala ió afú o mátui.
◼ Dikalu Dia Kuambata Mona ni Ialu Iéngi: Ka tokala kuambata dikalu dia kuambata mona, ni ialu iéngi mu kiônge kia dikota.
◼ Maji a Mazumba: Kuma tua-nda kala bhu kaxi ka athu avulu, kima kiambote kuia bhu kididi kiki sé ku dita maji avulu a mazumba, a tena ku bhekela maka ku athu kala ni sauidi iambote.—1 Kol. 10:24.
◼ Formulários Queira Visitar (S-43): A tokala ku soneka mu kamukanda queira visitar, phala ku bhana itendelesu ia lungu ni muthu ua londekesa kuila ua xikina o njimbu ia mu tula mu kithangana kia kiônge kia dikota. O aboki a tokala kuambata kamukanda kamoxi, mba iiadi, mu kiônge kia dikota. O kamukanda ko soneke, a tena ku ka bhana bhu kididi kia ku bhana o madivulu, mba ku seketa iê kioso ki ua-nda vutuka ku kiônge kia dikota.—Tanga O Kikalakalu Kietu Kia Utuminu kia mbeji ia Kasambuadi ka muvu ua 2011 mu mbandu ia 3.
◼ Inzo ia ku Bhanga Kúdia: Bhana kiximanu ku dijina dia Jihova, mu kaxi ka ukexilu uê mu inzo ia ku bhanga kúdia.
◼ Ku Kalakala mu Vondadi Iê: Uoso ua mesena o ku kuatekesa mu kiônge kiki, ua tokala uibhuidisa o jiphange ala ku pholo mu kibuka kia Ku kalakala mu vondadi ietu. O athu ala mu kitala kia 16 kia mivu, a tena ku kuatekesa ué mu ikalakalu ni kikuatekesu kia jitata jâ, mba muadiakimi uéngi.