‘Kala ni Uendelu Uambote Bhu Kaxi ka Athu’

1. Mukonda diahi, kima kiambote ku kala ni uendelu uambote, mu kithangana kia kiônge kia dikota?

¹ Mivu joso, mu kithangana kia kiônge kia dikota o athu a tu mona, mu kiki, kima kiambote se tu kala ni ukexilu u bhana kijingu kua Nzambi. (Iji. 20:26) O ukexilu uetu uambote ni ua ku zuata ua tokala ulondekesa ku athu kuila, tu akaiedi a Kristu. Kiebhi ki tu tena ku kala ni ‘uendelu uambote bhu kaxi ka athu,’ mu kithangana kia kiônge kia dikota ni kiônge kia mundu uoso, ni ku bhana kijingu kua Tata ietu ia diulu?—1 Phe. 2:12.

2. O kiônge kia dikota, kia-nda tu bhana kithangana kia kulondekesa ídifua iahi?

² Londekesa Ukexilu ua Ukidistá: O henda, i tu londekesa ku akuetu ni ukexilu ua ku dibhana ni ‘athu ki ji kidistá,’ ki u sokela ni ukexilu ua mundu. (Kol. 3:10; 4:5; 2 Tim. 3:1-5) Tua tokala kulondekesa henda ni muanhu, mu ku dibhana ni athu ni akalakadi mu kididi kia ku zalela ajitu, se bhu moneka maka. O ku londekesa ukexilu uambote, ku tu kuatekesa ku bhana valolo ku akalakadi.

3. Itendelesu iahi, ia bhana ku jitata ni mukonda diahi?

³ O jitata, a tokala ku langa o tuana tuâ mu kithangana kia kiônge kia dikota, ki kale mu kididi kia kudia ni mu kididi kia a zalela. (Jisa. 29:15) Saí diiala, diala ku pholo mu kididi kia ku zalela ajitu uambe: “Tua mi zolo kiavulu. O miji ienu ni an’enu a zuata kiambote ni ku xila akuâ. Tua mono o ukexilu uenu uambote, tua mesenene kuila muiza kuku semana joso.”

4. Kiebhi ki tua tokala ku zuata, mu kithangana kia kiônge kia di kota?

⁴ Ku Zuata Kiambote: Tua tokala ku zuata kiambote, mu kithangana kia kiônge kia dikota, ki tu tokala ku zuata kala kia zuata o athu ku mundu. (1 Tim. 2:9) Ne muene, se ki tuala bhu kididi kia ku zalela o ajitu, mba mu kithangana kia ku nhoha, mu dimatekenu mba mu disukilu dia milongi, kima kiambote ku zuata mu ukexilu uambote. Mu kiki, tua-nda sanguluka mu ku mona kuila, o izuatu ietu i bhangesa o athu kuijiia kuila tu ji kidistá ni ku bhana umbangi sé hele, kioso ki tu kala ni kithangana. O izuatu ietu ni uendelu uetu uambote, mu kiônge kia dikota, kia-nda bhangesa o athu ku mesena kuijiia o njimbu iambote ni ku sangulukisa Jihova.—Sof. 3:17.

Itendelesu Phala o Kiônge Kia Dikota Kia 2014

◼ Ola ia ku Mateka: O milongi ia-nda mateka mu 8h20 a ithangana. Mu izuua itatu ia kiônge, o mabhitu a-nda kua jikula mu 6 dia ola mu kamene. Kioso o muendexi ua milongi kia-nda zuela kuila o mukumbi ua-nda xika, etu enioso tua tokala kiá ku kenga o ididi ietu, phala o milongi i mateke mu ukexilu uambote. Kia Sesa ni kia Sábhalu, o kiônge kia-nda zubha mu 15h55 a ithangana, ku tádidi. O kia Lumingu, o kiônge kia-nda bhua mu 14h50 a ithangana ku tádidi.

◼ Kiônge Kietu kia Mundu Uoso: Saí ididi mua-nda bhita iônge ietu ia mundu uoso. Ejiia kuila o kibuka kia filiiale kia-nda kuixana jiphange mu ilunga, phala ku kuatekesa ku iudika o ididi ia ku xikama, kididi kia ku bhaka o makalu ni ku iudika ididi ia ku zeka. Nange kua-nda zala kiavulu se kuia jiphange ka a exana phala ku kala mu kiônge. Se ua mesena kuia mu kiônge kia dikota kiéngi, ki ua tokala ku sola kuia mu kiônge kietu kia mundu uoso.

◼ Kididi Kia Makalu: O ididi ioso mua-nda bhita o iônge ia makota, muala ididi phala ku bhaka o makalu, ki ku bhingi ku futa kitadi, maji o muthu u bhixila selu, muéne uanda dianga ku bhaka o dikalu diê. O makalu ambata o inema, ala kiá ni kididi kia kua bhaka. Mu kuijiia kuila o ididi ia ku bhaka o makalu iofele, se bhu bhana, athu avulu a tokala ku bhanga njila mu dikalu dimoxi.

◼ Ku Bhaka Ididi: Kioso kia jikula o mabhitu, tua mi dióndo ki mu lenge, phala ku sanga o kididi ki ua mesena, kana ku bhanga kála kia bhanga akuâ. O henda, ia-nda tu kuatekesa ku ta ku pholo o ibhindamu ia jiphange ku pholo, ni ku tu bhangesa kulondekesa kuila tu Jikidistá ja kidi, ni ku ximana Nzambi ietu. (Nzu. 13:34, 35; 1 Kol. 13:4, 5; 1 Phet. 2:12) Ua tokala ku bhaka ngó ididi phala o athu a tungu kumoxi n’eie, ni iâ a bhanga njila mu dikalu dimoxi, mba maxibulu mê a Bibidia. Saí kididi phala ió a kuka ni inema. Mukonda dia ku kala kididi kia tolo, muthu umoxi ngó mba kiiadi, ua tokala ku xikama ni ndandu iê.

◼ Kudia: Tua ku dióndo, ambata kúdia phala o ola ia ku nhoha, mu veji dia ku tunda bhu kididi kia kiônge phala kuia mu sumba kúdia. U tena kuambata kaxa kófele ki soka bhoxi dia kialu kia dikalu phala ku bhaka-mu kudia. Maji o ji kaxa ja makota, jikopho, ji ngalafa, ni ima ia vídulu, ka tokala ku iambata mu kididi kiki.

◼ Ku Sangela Kitadi: Tu tena kulondekesa o kisakidilu kietu mu ku sangela kitadi mu vondadi ietu, phala ku kuatekesa o ikalakalu mu kiônge kia dikota. O kitadi kioso kia-nda sangela bhu kaxi ka xeke, a tokala ku ki soneka phala o “Kilunga kia Jimbangi ja Jihova.” Mu ku mateka ni muvu iú, mu iônge ioso ia makota a-nda xikina ku sangela kitadi bhu kaxi ka ji kalatá, ni ji xeke.

◼ Milongo: Se ua bhingi ku tambula milongo a ku sonekena na-iu kua dotolo, ambata na-iu mukonda se-ku milongo íii, mu kiônge kia dikota.

◼ Idiatelu: Mivu ioso, athu avulu ene mu di kuama mukonda dia idiatelu. Kima kiambote ku sola idiatelu i ku kuatekesa kuenda kiambote, mu ididi ioso.

◼ Afú o Mátui: O kiônge kia-nda bhita mu kizuua kia 11 kate mu 13 mu mbeji ia Kamusasadi ku Viana, ku muvu iu ua 2013, mua-nda kala ilongesu ia ijimbuete phala ió afú o mátui.

◼ Dikalu Dia Kuambata Mona ni Ialu Iéngi: Ka tokala kuambata dikalu dia kuambata mona, ni ialu iéngi mu kiônge kia dikota.

◼ Maji a Mazumba: Kuma tua-nda kala bhu kaxi ka athu avulu, kima kiambote kuia bhu kididi kiki sé ku dita maji avulu a mazumba, a tena ku bhekela maka ku athu kala ni sauidi iambote.—1 Kol. 10:24.

◼ Formulários Queira Visitar (S-43): A tokala ku soneka mu kamukanda queira visitar, phala ku bhana itendelesu ia lungu ni muthu ua londekesa kuila ua xikina o njimbu ia mu tula mu kithangana kia kiônge kia dikota. O aboki a tokala kuambata kamukanda kamoxi, mba iiadi, mu kiônge kia dikota. O kamukanda ko soneke, a tena ku ka bhana bhu kididi kia ku bhana o madivulu, mba ku seketa iê kioso ki ua-nda vutuka ku kiônge kia dikota.

◼ Inzo ia ku Bhanga Kúdia: Bhana kiximanu ku dijina dia Jihova, mu kaxi ka ukexilu uê mu inzo ia ku bhanga kúdia.

◼ Ku Kalakala mu Vondadi Iê: Uoso ua mesena o ku kuatekesa mu kiônge kiki, ua tokala uibhuidisa o jiphange ala ku pholo mu kibuka kia Ku kalakala mu vondadi ietu. O athu ala mu kitala kia 16 kia mivu, a tena ku kuatekesa ué mu ikalakalu ni kikuatekesu kia jitata jâ, mba muadiakimi uéngi.