Izuua Itatu ia Ilongesu mu Nzumbi
1. Ihi i tu kingila ku tambula mu kiônge kia dikota kia muvu iú?
1 Ku mundu iú ua iibha ua Satanaji, Jihova uene mu suínisa o jiselevende jê. (Iza. 58:11) O kima ki bhanga Jihova phala ku tu suínisa mu ukexilu ua nzumbi, o kiônge kia dikota ku muvu. Kála o kiônge kia muvu iú ua zukama, kiebhi ki tu tena ku di iudika, phala ku di suínisa mu nzumbi?—Jisa. 21:5.
2. Kiebhi ki tua tokala ku di iudika?
2 Se ku bhange luua, bhanga ioso phala ku kala ni kithangana kia soko, phala kuia mu izuua itatu ia kiônge kia dikota. O kuila eie uejiia kiá o kithangana ki ua bhingi phala ku bhanga njila mu izuua itatu ia kiônge, ni ku kenga o kididi kiê ande dia ku mateka o milongi? Etu ki tu mesena ku kamba kuívua mbandu ia milongi ia pelepalala Jihova phala etu! (Iza. 65:13, 14) O kuila uejiia kiá, kuebhi ku ua-nda kala, ni kiebhi ki ua-ndaia mu kiônge?
3. Itendelesu iebhi ia-nda kuatekesa ki kale etu ni muiji uetu ku katula mbote mu milongi ia kiônge?
3 Ihi ia-nda ku kuatekesa ku fidisa o kilunji kiê ku banza mu ima iéngi, mu kithangana kia kiônge? Se bhu bhana, zeka kiambote mu usuku uoso ua izuua itatu ia kiônge kia dikota. Tala ku mulongexi kioso kiaia ni kuzuela. Kaiela o ibatulu ioso mu Bibidia iê. Soneka ioso i ua mesena phala o mbote iê. Kima kiambote o muiji ku xikama kumoxi, phala o jitata a tene ku kuatekesa o an’ê ku katula mbote mu milongi. (Jisa. 29:15) Nange mu tena ku di longa o jipondo ja beta dingi kota, mu usuku ku muiji mu izuua ia kiônge. Mu kiki, o muiji uê ua-nda kolokota ku di suínisa, katé muene kia-nda bhita o kiônge kia dikota. Mua tokala mu xa kithangana mu kizuua kia Ubhezelu uene ku muiji phala ku di longa pondo jambote ja tokala ku muiji.
4. Kiebhi ki tu tena ku kuatekesa akuenu mu kilunga kietu, ku tambula kikolokotesu mu nzumbi?
4 Kuatekesa Akuenu n’a Suíne: Etu tua mesena kuila, akuetu a tambula ué kikolesu mu nzumbi. O kuila kuene aboki adiakimi mu kilunga, a bhingi kikuatekesu phala kuia mu kiônge? O kuila eie u tena o ku a kuatekesa? (1 Nzuá 3:17, 18) Enu mu tufunga, mba mutuameni ua kibuka mu kilunga, a tokala ku tonginina kiambote o aboki a bhingi kikuatekesu.
5. Kiebhi ki tua-nda bhana o tumikanda mu kiônge kia dikota? (Tanga ué o kaxi ia lungu ni maka enhá.)
5 Kála mu ukulu, ku semana jitatu ande dia kiônge kietu kia dikota, tua-nda bhana o tumikanda phala kuixana akuetu ku kala n’etu. O ilunga a tokala ku bhanga ioso phala ku bhana o tumikanda tuoso, ku athu oso ala ku mbambe ia ilunga iâ. Mu kiki, se o muiji uê a subhuka ni tumikanda, tua ku dióndo ambata na-tu mu kiônge kia dikota. A-nda ku a bhana ku athu u tua-nda ku aboka mu mbanza ia kiônge kia dikota. Se o muiji uê ala hanji ni tumikanda, a tokala ku tu bhana ku alondekexi kioso kia-nda bokona bhu kididi kia kiônge mu kizuua kia Sesa. Itendelesu ia lungu se kiebhi kia tokala ku bhana o tumikanda, a-nda ku tu bhana mu kiônge. Tua ku dióndo, bhaka kamukanda kamoxi phala eie ku kaiela o mbandu ia sukina ia diskursu ia Lumingu.
6. Ukexilu uebhi, u tu londekesa mu kiônge kia dikota?
6 O Ukexilu Uambote u Suínisa: kioso o athu aia ni ku kala “azodi ia iene ngó,” ni ku kamba ku xila o ibanzelu ia akua, kima kiambote ku kala bhu kaxi ka abhezi, a di suínisa kulondekesa o ukexilu uambote! (2 Tim. 3:2) Etu tu londekesa ukexilu uambote kioso ki tu bokona bhu kididi kia kiônge ni ki muanhu, kioso kia jikula o mabhitu mu kamene, ni ku bhaka ngó kididi phala o athu a tungu kumoxi n’etu, a bhanga njila kumoxi n’etu, mba o maxibulu metu a Bibidia. Etu tu belesela, o mutuameni ua milongi kioso kia tu bhinga kuila tua tokala ku kenga kiá o ididi ietu, phala kuívua o mukumbi ua-nda xika. Etu ué, tu londekesa ukexilu uambote, mu ku kamba kuzuela mu kithangana kieniókio, ku tumikisa njimbu mu mutelembe ua kafuetele, kudia, mba kuenda ngó mu ola ia milongi.
7. Kiebhi ki tu tena ku di kolokotesa kioso ki tu diongeka ni jiphange jetu?
7 O Ukamba u Suínisa: O iônge ia makota i tu bhana o kithangana kiki, kia ku di kolesa mu ukexilu ua nzumbi. (Jisá. 133:1-3) Mukonda diahi ki mu ‘jikule-nu o mixima ienu,’ phala kuijiia o jiphange jengi a tokala mu ilunga iéngi? (2 Kol. 6:13) Eie u tena ku suua mbambe ku bhanga ukamba ni muthu mba muiji kala kizuua kia kiônge. Mu ola ia ku nhoha, kithangana kiambote phala ku bhanga kiki. Ambata kudia ku ku bhana kithangana kia ku katula mbote mu ola ia ku nhoha, mu veji dia kuia mu inzo ia ku bhanga o kudia. Kiki, ki tena ku kuatekesa ku bhanga makamba a ubhe a nangenena.
8. Mukonda diahi tua tokalele ku di bheka phala ku kalakala mu kiônge kia dikota, ni kiebhi ki tu tena ku bhanga kiki?
8 Kikolesu kiambote ku kalakala bhu mbandu ia jiphange jetu mu nzumbi, mu sidivisu i kola! O kuila eie u tena ku kalakala mu kiônge, mba ku kuatekesa o kilunga kiê, mu ku komba o kididi kia kiônge? (Jisá. 110:3) Se eie ki uala dingi ni kima kia ku bhanga, tua ku dióndo, ndé bhu kididi kia ku di bhakula ku departamento ia ku kalakala mu vondadi iê, ia kiônge kia dikota. Maku avulu a bhanga kikalakalu ki sangulukisa ni kia uabha.
9. Mukonda diahi tua tokala ku tonginina o ukexilu ni uzuatelu uetu, mu kithangana kia kiônge kia dikota?
9 O Ukexilu Uetu Uambote u Suínisa o Athu a tu Mona: Mu izuua itatu ia kiônge kia dikota, tu londekesa kuila tu jimbangi ja jihova, kana ngó mu ithangana ia milongi. Athu oso ala mu mbanza ia kiônge, a tokala ku tu mona kuila ki tu difu ni athu ki jimbangi ja Jihova. (1 Phe. 2:12) O ukexilu uetu ua ku zuata, ni ua ku di iudika mu mbanza ia kiônge, mu kididi mu tua tungila, ni mu inzo i bhanga o kudia, a tokala tu bhana kijingu kua Jihova. (1 Tim. 2:9, 10) O ku ta o jikalata jetu ja lapela, ja-nda londekesa kuila tu jimbangi ja Jihova. Kiki, ki tu bhana kithangana phala kuzuela ia lungu ni kiônge kietu, ni ku bhana umbangi.
10. Misoso iahi i bhana umbangi uambote, ijila mu kaxi ka kulondekesa o ukexilu uetu uambote ua Kidistá?
10 Kiebhi o athu a mona o ukexilu uetu uambote? Kála kiambe o jurnale, o mutuameni ua hotele muene mu kala jimbangi ja Jihova, uambe: “O athu sanguluka kiavulu. Etu tua mesenene ku kala ni ene mu muvu joso.” Ku muvu ua bhiti, muthu ki mbangi ia Jihova, ua jimbidisa o mbuenga iê ia jibela, mu hotele mua kexile Jimbangi ja Jihova. Kioso kia mu vutuila o mbuenga, ni ima ioso ia kexile-mu, o mutuameni uambe ku muthu uevu o mbuenga: “ Kima kiambote kuila o hotele iezalele ni Jimbangi ja Jihova, ejile mu kiônge kiá, kia dikota. Mukonda se ki Jimbangi ja Jihova exile bhobha, ki ueji mona dingi o mbuenga iê.”
11. Ni kiônge kia zukama, mbambe iebhi i tua tokala o ku suua, ni mukonda diahi?
11 O kiônge kia muvu iú, kia zukama ni lusolo. kua bhingi kithangana ni nguzu iavulu phala ku bhanga kuila o milongi ia kiônge kia dikota, ki kale kithangana ki suínise. Bhanga ioso phala kuia mu izuua itatu, ni ku kala polondo mu ima ioso ia ku bhakela Jihova, ni kilunga kiê. Bhanga ioso phala ku suínisa akuenu, mu ukexilu uê uambote, ni ukamba uambote. Mu kiki, eie ni akuenu a tena ku divua, kála kia divu phange ku muvu ua bhiti, ua soneka, “ Eme ki ngi tena ku di lembalala kithangana kia ngi bhana dingi ku sanguluka!”
[Kilombuelelu ku bandu 4]
Kala mu ukulu, semana jitatu ande dia ku mateka o kiônge kietu, tua-nda bhana o tumikanda phala kuixana akuetu ku kala n’etu
[Kilombuelelu ku bandu 6]
O ukexilu uetu ua ku zuata, ni ua ku di iudika mu mbanza ia kiônge, mu kididi mu tua tungila, ni mu inzo i bhanga o kudia, ia tokala ku bhana kijingu kua Jihova
[Kilombuelelu ku bandu 7]
Bhanga ioso phala ku suínisa akuenu, mu ukexilu uê uambote, ni mu ukamba uambote
[Kilombuelelu ku bandu 4-7]
Itendelesu Phala O Kiônge Kia Dikota ua 2011
◼ Ola ia ku Mateka: O milongi ia-nda mateka mu 8:20. O mabhitu a-nda ku a jikula mu 6 dia ola mu kamene. Kioso o mutuameni ua milongi kia-nda zuela kuila o mukumbi ua-nda xika, etu enioso tua tokala kiá ku kenga o ididi ietu, phala o milongi i mateke mu ukexilu uambote. Kia Sesa ni kia Sábhalu, o kiônge kia-nda zubha mu 15:55, mu tádidi. O kia Lumingu, o kiônge kia-nda zubha mu 14:40 mu tádidi.
◼ Kididi Kia Makalu: O ididi ioso mua-nda bhita o iônge ia makota, muala ididi phala ku bhaka o makalu, ki ku bhingi ku futa kitadi, maji o muthu u bhixila selu muéne uanda dianga ku bhaka o dikalu diê. O makalu a-nda ambata o inema, ene ala kiá ni kididi kia ku bhaka o makalu. Mu kuijiia kuila o ididi ia ku bhaka o makalu iofele, se bhu bhana, athu avulu a tokala ku bhanga njila mu dikalu dimoxi.
◼ Ku Bhaka Ididi: Ua tokala ku bhaka ngó ididi phala o athu a tungu kumoxi n’eie, ni iâ a bhanga njila mu dikalu dimoxi, mba maxibulu mê a Bibidia.—1 Kol. 13:5.
◼ Kúdia: Tua ku dióndo, ambata kúdia phala o ola ia ku nhoha, mu veji dia ku tunda mu kididi kia kiônge phala kúdia. U tena kuambata kaxa kófele i soka bhoxi ia kialu kia dikalu phala ku bhaka-mu kudia. Maji o ji kaxa ja makota, jikopho, ji ngalafa, ni ima ia vídulu, ka tokala ku iambata mu kididi kiki.
◼ Ku Sangela Kitadi: Tu tena kulondekesa o kisakidilu kietu mu ku sangela kitadi mu vondadi ietu, phala ku kuatekesa o ikalakalu mu kiônge kia dikota. O kitadi kioso kia-nda sangela bhu kaxi ka xeke, a tokala ku i soneka phala o “Kilunga kia Jimbangi ja Jihova.”
◼ Ku di Kuama ni Ku Saka ni Lusolo (emergência): Se bhu moneka maka alungu ni utombokelu, bhu kididi kia kiônge kia dikota, tua ku dióndo, sota o mulondekexi, muéne ni lusolo ua-nda tangela ku departamento dia ku saka, phala o jiphange jetu jala ni uhete, a tene ku kuatekesa. Se ku bhinga, ene a-nda xinda ku inzo ia ku saka phala ku bhinga kikuatekesu. Kiki kia-nda kuatekesa o sidivisu ia Utombokelu, ku di pelepalala phala ku tambuijila kioso o mutelembe u xika.
◼ Milongo: Se ua bhingi ku tambula milongo a ku sonekena na-iu kua dotolo, ambata na-iu mukonda se-ku milongo íii, mu kiônge kia dikota.
◼ Idiatelu: Mivu joso, athu avulu ene mu di kuama mukonda ia idiatelu. Kima kiambote ku sola idiatelu i ku kuatekesa kuenda kiambote, mu ididi ioso.
◼ Afú o Mátui: O kiônge kia-nda bhita mu kizuua kia 19 kate mu 21 mu mbeji ia Kakuinhi ku Viana, ku muvu iu ua 2011, mua-nda kala ijimbuete phala ió afú o mátui.
◼ Dikalu Dia Kuambata Kabuetele ni Ialu Iéngi: Ka tokala kuambata dikalu dia kuambata kabuetele, ni ialu iéngi.
◼ Maji a Mazumba: Kuma tua-nda kala bhu kaxi ka athu avulu, kima kiambote kuia bhu kididi kiki sé ku dita maji avulu a mazumba, i tena ku bhekela maka ku athu kala ni sauidi iambote.—1 Kol. 10:24.
◼ Formulários Queira Visitar (S-43): A tokala ku soneka mu kamukanda queira visitar, phala ku bhana itendelesu ia lungu ni muthu ua londekesa kuila ua xikina o njimbu ia mu tula mu kithangana kia kiônge kia dikota. O aboki a tokala kuambata kamukanda kamoxi, mba aiadi, mu kiônge kia dikota. O kamukanda ko soneke, a tena ku ka bhana ku kididi kia ku bhana o madivulu, mba ku seketa iê kioso ki ua-nda vutuka ku kiônge kia dikota.—Tanga o Nosso Ministério do Reino, Novembro ua 2009, mu mbandu ua 4.
◼ Inzo ia ku Bhanga Kúdia: Bhana kiximanu ku dijina dia Jihova, mu kaxi ka ukexilu uê mu inzo ia ku bhanga kúdia, (restaurantes).
◼ Ku Kalakala mu Vondadi iê: O kisangusangu ki tu kala na-kiu, mu kuia mu kiônge kia dikota kia-nda dibandekesa dingi se tu di bheka phala ku kalakala mu vondadi ietu. (Ikalakalu 20:35) O muthu ua mesena ku bhanga kiki ua tokala kuia ku departamento dia sidivisu ia ku kalakala mu vondadi iê. O athu ala mu kitala kia 16 a mivu, a tena ku kuatekesa ué mu ikalakalu ni kikuatekesu kia jitata jâ, mba muadiakimi uéngi.
[Kilombuelelu ku bandu 5]
Kiebhi ki tua-nda bhana o kamukanda?
Mukonda dia kuboka o athu oso mu mbambe ietu, ki tua tokala kuzuela kiavulu. Tu zuela ngó: “Kiebhi ki uala. Tua mu bhana o kamukanda kaka ku mundu uoso, ka lungu ni kiônge kia dikota, kaka, o kamukanda kê. Eie ua-nda sanga dingi itendelesu mu kamukanda kaka.” Ku pholo dia kamukanda, kuene kuala o kididi kua-nda bhita o kiônge, bhana o kamukanda ku mukua bhata. Bhanga ni kisangusangu. Mu ku bhana o tumikanda mu disukilu dia semana, u bhana ué O Mulangidi ni Despertai! se bhu bhana.