Itendelesu Phala o Kiônge Kia Dikota
Ola ia ku Mateka: O mabhitu a-nda a jikula mu 6:00 a ithangana. Mu izuua itatu, o mukumbi ua-nda mateka ku 8:20. Kioso kia-nda xika o mukumbi, etu enioso tua tokala kiá ku kenga o ididi ietu, phala o milongi i mateke mu ukexilu uambote. Kia Sesa ni kia Sábhalu, o kiônge kia-nda zubha mu 15:55 a ithangana, ku tádidi. O kia Lumingu, o kiônge kia-nda bhua mu 14:45 a ithangana ku tádidi.
‘Ku Ximana Jihova Bhu Kaxi ka Mimbu’: O mundu ua Jihova m’ukulu, uexile mu ximana Jihova bhu kaxi ka mimbu, o mimbu iala hanji ni valolo mu ubhezelu ua kidi lelu. (Jisá. 28:7) Kala milongi ia kiônge kietu, i mateka ni mukumbi. Ki muimbu uoso-uoso kana maji a u pelepalala phala tu tene kuijiia dingi ia lungu ni Jihova. Kienhiki, kioso o muendexi ua kiônge kia-nda bhana ngolokela kuila, o mukumbi ua-nda mateka, kithangana kia ku sota o kididi ni kuívua o mukumbi ni kisangusangu mu veji dia ku landuka ni kuzuela. Ku bhanga kiki, kua-nda londekesa kuila, tua mu bhana valolo ku jiphange ene mu pelepalala o mimbu. Luiadi ku muvu, o jiphange jiji aia katé ku Patterson, ixi ia Nova York ni kitadi kiâ, phala ku bhanga mimbu iambote i tu sangulukisa. Kioso kia-nda bhua o mukumbi, oso a tokala kuimba o mimbu ietu, ia ubhe ia Utuminu phala ku ximana Jihova.
Kididi Kia Makalu: O ididi ioso mua-nda bhita o iônge ia makota, muala ididi phala ku bhaka o makalu, ki ku bhingi ku futa kitadi maji o muthu u bhixila selu, muéne ua-nda dianga ku bhaka o dikalu diê. O makalu ambata o inema, ala kiá ni kididi kia kua bhaka. Mu kuijiia kuila, o ididi ia ku bhaka o makalu ia tolo se ki bhana, athu avulu a tokala ku bhanga njila mu dikalu dimoxi.
Ku Bhaka Ididi: Mu kamene, kioso kia-nda jikula o mabhitu, kana ku lenga phala ku sanga o kididi, phala ki u di lundujule ni akuenu. Xinganeka o ibhindamu ia akuenu, né muene se phala ku bhanga kiki, u dianga ku suua o ibhindamu ia jiphange jê. O henda ia kidi, i tu bhangesa ku tuijiia kála tu Jikidistá ja kidi, i bhangesa o athu ku ximana Nzambi. (Nzuá 13:34, 35; 1 Kol. 13:5; 1 Phe. 2:12) Ua tokala ku bhaka ngó ididi phala o athu a tungu kumoxi n’eie ni iâ a bhanga njila mu dikalu dimoxi mba maxibulu mê a Bibidia. Tua ku dióndo, kana ku ta ima mu ji bangu, se ki ua-nda xikama-ku. Se u kaiela o itendelesu íii, ua-nda kuatekesa o jiphange ku mona kuila, o ididi ka i kuata luua. Saí ididi, ene mu i bhaka phala o adiakimi ni inema. O ididi íii ia tolo, mukonda dia kiki, muthu umoxi mba kiiadi a tena ku xikama ni haxi mba muadiakimi.
Ku Zuata Kiambote: Tua tokala ku zuata kiambote, mu kithangana kia kiônge kia dikota, ki tu tokala ku zuata kala kia zuata o athu ku mundu. (1 Tim. 2:9) Né muene, se ki tuala bhu kididi kia ku zalela o ajitu mba mu kithangana kia ku nhoha, mu dimatekenu mba mu disukilu dia milongi, kima kiambote ku zuata mu ukexilu uambote. Mu kiki, tua-nda sanguluka mu ku mona kuila, o izuatu ietu i bhangesa o athu kuijiia kuila tu ji kidistá ni ku bhana umbangi sé hele, kioso ki tu kala ni kithangana. O izuatu ietu ni uendelu uetu uambote, mu kiônge kia dikota, kia-nda bhangesa o athu ku mesena kuijiia o njimbu iambote ni ku sangulukisa Jihova.—Sof. 3:17.
Ku Langa o Mitelembe ia Kafuetele: Tua tokala ku londekesa ukexilu uambote, mu ku jika o mutelembe uetu mba makina phala ki i landukise akuenu. Se ua mesena ku ngalavala o milongi ni makina iê mba mutelembe, ua tokala ku di langa phala ki u fidise akuenu ku mona. Tu tena ué kulondekesa ukexilu uambote, se ki tu tumikisa ji njimbu mu kithangana kia milongi.
Kudia: Tua ku dióndo, ambata kúdia phala o ola ia ku nhoha, mu veji dia ku tunda bhu kididi kia kiônge phala kuia mu sumba kúdia. U tena kuambata kaxa iofele i soka bhoxi dia kialu kia dikalu phala ku bhaka-mu kudia. Maji o ji kaxa ja makota, jikopho, ji ngalafa ni ima ia vídulu, ka tokala ku iambata mu kididi kiki.
Ku Sangela Kitadi: Tu tena kulondekesa o kisakidilu kietu mu ku sangela kitadi mu vondadi ietu, phala ku kuatekesa o ikalakalu mu kiônge kia dikota. O kitadi kioso kia-nda sangela bhu kaxi ka xeke, a tokala ku ki soneka phala o “Kilunga kia Jimbangi ja Jihova.” O kitadi kia ku sangela a tena ku ki bhana bhu kaxi ka ji kalatá ni ji xeke.
Milongo: Se ua bhingi ku tambula milongo a ku sonekena na-iu kua dotolo, ambata na-iu mukonda se-ku milongo íii, mu kiônge kia dikota. O ji nguia ja-nda saka naju o athu ala ni uhaxi u sambukila, a tokala ku ji texi dikanga.
Idiatelu: Dilange phala ku dibhale. Mivu ioso, athu avulu ene mu di kuama mukonda dia idiatelu. Kima kiambote ku sola idiatelu i ku kuatekesa kuenda kiambote, mu ididi ioso.
Dikalu Dia Kuambata Mona ni Ialu Iéngi: Ka tokala kuambata dikalu dia kuambata mona ni ialu iéngi mu kiônge kia dikota. Maji ki bhana kuambata ka dikalu ka kuambata mona, ka tena ku kala bhu mbandu a jitata.
Maji a Mazumba: Kuma tua-nda kala bhu kaxi ka athu avulu, kima kiambote kuia bhu kididi kiki sé ku dita maji avulu a mazumba, a tena ku bhekela maka ku athu kala ni sauídi iambote.—1 Kol. 10:24.
Formulários Queira Visitar (S-43): A tokala ku soneka mu kamukanda Queira Visitar, phala ku bhana itendelesu ia lungu ni muthu ua londekesa kuila, ua xikina o njimbu ia mu tula mu kithangana kia kiônge kia dikota. O aboki a tokala kuambata kamukanda kamoxi mba tuiadi, mu kiônge kia dikota. O kamukanda ko soneke, a tena ku ka bhana bhu Kididi kia ku Bhana o Madivulu mba ku seketa iê kioso ki ua-nda vutuka ku kiônge kia dikota.
Inzo ia ku Bhanga Kúdia: Bhana kijingu kua Jihova, mu kaxi ka ukexilu uê mu inzo ia ku bhanga kúdia. Zuata kiambote mukonda u mukunji, u kidistá. Xisa kitadi, se ki bhana.
Ku Kalakala mu Vondadi Iê: Uoso ua mesena o ku kuatekesa mu kiônge kiki, ua tokala uibhuidisa o jiphange ala ku pholo mu kibuka kia ku Kalakala mu Vondadi ietu. O athu ala mu kitala kia 16 a mivu, a tena ku kuatekesa ué mu ikalakalu ni kikuatekesu kia jitata jâ mba muadiakimi uéngi.