Ibhuidisu Ió Tambuijile

◼ O kuila o phange ia muhatu ua tokala ku kuta o dilesu ku mutué se ua mu longa muthu bhu muelu ua inzo kumoxi ni phange ia diiala?

Kioso o phange ia muhatu a mu batizala kiá mba kana, ua mu longa xibulu kumoxi ni phange ia diiala, muéne ua tokala ku kuta dilesu ku mutué. (1 Kol. 11:3-10) O Mulangidi, ua 15 ua Kavua ua 2002 mu mbandu 27 uambe: “Kioso o muboki kia longa muthu uene mu mu longa kiá, muéne uala ku pholo mu ulongelu. Kioso o phange ia muhatu a mu batizala, u longa muthu kumoxi ni phange ia diiala, muéne ua tokala u kuta o dilesu ku mutué. Mukonda o ulongelu ua tokala ku maiala mu kilunga.” Se o phange ia muhatu uala kumoxi ni muboki ua diiala ka mu batizala luua, ua tokala ué ku kuta o dilesu. A tokala ku bhanga kiki né muene se a di longa kubhata, bhu muelu mba bhu kididi kiéngi.

Maji se o muthu ua mateka ngó o ku di longa bhu muelu, o phange ia muhatu ka bhingi luua ku kuta dilesu, né muene se a vutuka phala ku mu kunda dingi, mba phala ku mu londekesa kiebhi kia tena ku di longa o Bibidia, mba ku mu londekesa o milongi ia ku di longa iala mu madivulu metu. Tuejiia kuila, ku bhinga ithangana iavulu phala kuia ni ku di longa ni muthu bhu muelu, mu ku vutuka veji javulu phala ku mu kunda dingi, mu kiki, o aboki a tokala ku tonginina kiambote o kithangana kia tokala phala ku kuta o dilesu.