Ku Bhana o Tumikanda
1. O tumikanda phala kuixana o athu, phala o kiônge kia dikota kia 2014, tua-nda tu bhana mu kithangana kiebhi?
1 Se ua mesena kuixana makamba mê mba muiji phala kudia, se ku bhinga kithangana ni nguzu iavulu phala ku lamba, ueji kuixana o athu ni kisangusangu kioso. Kiene kimoxi ué, phala ku bhanga o kiônge kia dikota, ni kiônge kia mundu uoso kia 2014, kua bhingi salu iavulu. Ande dia ku bhita o kiônge kia dikota, mu semana jitatu, tua-nda kala ni ujitu ua kuixana o athu, phala kuia mu kiônge kia dikota. Ihi ia-nda tu kuatekesa, kuixana o athu ni kisangusangu kioso?
2. Ihi ia-nda tu bhangesa, ku bhana o tumikanda ni kisangusangu kioso?
2 Tua-nda tu bhana ni kisangusangu kioso, se tu xinganeka mu mbote i tuene mu katula, mu milongi ioso ia tu bhana Jihova, mu kiônge kietu kia dikota. (Iza. 65:13, 14) Kima kiambote kuijiia kuila, o ku bhana o tumikanda ku bhekela ué mabesá avulu. Saí athu a-nda tambula o kamukanda, a-ndaia mu kiônge. Né muene se athu a xikana mba kana, o nguzu ioso i tu bhanga ia-nda bhana kijingu kua Jihova ni kulondekesa o ukexilu ua ku uabhela o ku bhana.—Jisá. 145:3, 7; Dij. 22:17.
3. Kiebhi ki tua-nda bhana o tumikanda?
3 O tufunga, ene a-nda sola kiebhi kia-nda bhana o tumikanda, ki kale ku bhana o tumikanda ku athu kala ku mabhata, ku tu bhana mu ikoka, mba mu jimbambe ja kilunga. Se kithangana ki bhana, mu sukilu dia semana, o Mulangidi ni Despertai a tena ku tu bhana ué. Se o Sábhalu ia dianga, i bakana ni kizuua kia ku bhana o tumikanda, kima kiambote ku bhana o tumikanda, mu veji ia ku mateka ku longa o Bibidia. Kioso kia-nda bhua o ku bhana o tumikanda, tua-nda sanguluka kiavulu, mu kuijiia kuila tua boko ni ku suína kuoso, mu kuixana o athu phala kuívua o milongi ia tu pelepalala Jihova!