Ku Bandekesa o Uhete Uetu mu Ukunji—Ku Zuela ni Mukua Dibhata ua Teme

Mukonda Diahi Kima Kiambote ku Bhanga Kiki: Athu avulu u tu sanga mu ukunji, a tu xila. Jezú ua kanene kuila, athu avulu eji tu zemba. (Nzuá 17:14) Mu kiki, ki tu tokala ku diuana se tu sanga mukua dibhata ua teme. Se tu sanga mukua dibhata ua teme, tua tokala ku zuela mu ukexilu u jingisa Jihova. (Lom. 12:17-21; 1 Phe. 3:15) Ku bhanga kiki, kua-nda batula o maka. Kua-nda bhana ué umbangi ku mukua dibhata ni ku athu a mu tu mona, phala a xikine o Jimbangi ja mukua ja Jihova, a-nda bhita.—2 Kol. 6:3.

Kiebhi ki tu Tena ku Bhanga Kiki:

Tululuka, londekesa ngalasa. Kiki kia-nda kuatekesa ku batula o maka. Kana ku divua kia iibha ni izuelu ia mukua dibhata. (Ndo. 7:9) Nange muéne kala kiambote, mukonda ua mu dibhana ni ibhidi mba ua bhixila mu ola ki i tokala. Nange ka mesena kuívua o njimbu ietu, mukonda uevu makutu a lungu n’etu.—2 Kol. 4:4.
Zuela ni ku lenduka, sola izuelu iambote. (Jisa. 15:1) O kuila ua mu balumuna mba ua mu fudisa ku bhanga kima? Se kiene, kana kuehela o kikalakalu kietu, ku tu fudisa ku bhinga muloloki ni ku vutuka mu kithangana kia tokala. O kuila ua teme, mukonda uevu makutu alungu n’etu? Se kiene, u tena ku zuela: “Ua lungu’ê. Mukonda uevu kima kia iibha kia lungu n’etu, maji kiki ki kidi. Ngi tena ku u jimbuluila o kidi?” O kuila muéne ka xikina o milongi ietu, ia lungu ni manhinga ni ku kaia athu mu kilunga? Se kiene, u tena ku zuela: “Eme ngejiia. Kia bhonzele ué phala athu avulu, ku xikina o milongi íii. Tala i zuela o Bibidia, ia lungu ni maka enhá.”
Se o mukua dibhata ua teme kiavulu, kima kiambote ku tunda sé ku zuela kima. Se n’a bhingi phala ka mu sote dingi ku Jimbangi ja Jihova, u tena ku mu jimbulula kuila, o vondadi iê a-nda i xila.

Fikisa o Ndunge Íii mu Mbeji Íii:

Disokejeke mu ubhezelu ué ku muiji.
Kioso ki u tunda mu inzo ia mukua dibhata ua teme, zuela ni muboki ni mukua kiebhi ki ueji tambuijila kiambote.