O Kuila mu Kithangana Kia Lembalasa, Ua-nda Kaiela o Phangu ia Jihova ni Jezú?
1. Nguzu iahi iene mu bhanga o Jimbangi ja Jihova, mu ithangana ia Lembalasa?
1 Jihova u kumbidila o kikanenu kiê ni ku suína. Mu ku zuela ia lungu ni mabesá a Utuminu ua Nzambi, o divulu dia Izaia 9:7 diambe: ‘O ku suína kua Jihova dia Ilombo Ieta kuene kua-nda ku bhanga kienhiki.’ Kiene kimoxi ué, mu ithangana ia ukunji uê mu ixi, o mon’a Nzambi ua londekesa ku suína mu ubhezelu ua kidi. (Nzuá 2:13-17; 4:34) Ku mivu ioso, mu ithangana ia Lembalasa, mazunda ni mazunda a aboki ku mundu uoso, a bhanga ioso ia tena, phala ku kaiela o ku suína kua Jihova ni Jezú, mu ku bandekesa dingi o kikalakalu kia ku boka. O kuila eie ua-nda bhanga uê kienhiki?
2. Ihi i tua-nda bhanga ni ku suína, mu kizuua kia 14 kia Mbeji ia Katanu?
2 Kikalakalu Kia ku Bhana Tumikanda Tua Lembalasa: Ku muvu iú o Kikalakalu kiki, kia-nda mateka kia sábhalu mu kizuua kia 14 kia mbeji ia Katanu. Bhanga ioso phala ku bandekesa dingi o kikalakalu kiê mu ukunji. O jiphange mu ilunga, a-nda sanguluka mu ku boka ni ku suina mu mbambe iâ. aku suína mu ku bhanga o kikalakalu kiki, kua-nda tu kuatekesa ku zubha o mbambe ietu mu kithangana kia tokala. Bhanga ioso i u tena phala kuixana o jikoleka jê ja salu, o jindandu jê, jikoleka ja xikola, ni kua bhana o kamukanda mba bhu kaxi ka jw.org. phala kuia mu Lemabalasa.
3. Kiebhi ki tu tena ku bandekesa dingi o ukunji uetu mu jimbeji ja Katanu ni Kasamanu?
3 Aboki a Ithangana ni Ithangana: O ku suína, kua-nda tu kuatekesa ué ku sanzumuna o ukunji uetu. Sé phata, aboki avulu a-nda kalakala kala aboki a ithangana ni ithangana, mu jimbeji ja Katanu ni Kasamanu, mukonda dia ujitu ua ku bhanga ngó 30 a ji ola. Mu ubhezelu ué ku muiji, mba ku di longa ubheka uê, samba kiebhi ki u tena o ku bandekesa dingi o ukunji uê? (Jisa. 15:22) O ku suina kuê mu ki kalakalu kiki, ki bhangesa akuenu mu kilunga ku suina uâ. Se u di sokejeka kiambote phala ku bhanga dingi, eie ua-nda kaiela o ku suína kua Jezú.—Marku 6:31-34.
4. Mabesá ahi u tua-nda tambula mu ku kaiela o ku suína kua Jihova ni kua Jezú?
4 O ku kaiela o ku suína kua Jihova ni Jezú, mu kithangana kiki kia Lembalasa, kua-nda tu bhekela mabesá. Athu avulu mu mbambe ietu a-nda tambula o umbangi. Tua-nda kala ni kisangusangu kiavulu, mu ku sidivila Jihova ni ku kuatekesa akuetu. (Ika. 20:35) O kima kia beta-o-kota dingi, o kuijiia kuila tua-nda sangulukisa Jihova ni Mon’é.