Kalakala ni Kadivulu, ‘Kilomboluelu kia Mak’a Nzambi’—Phala ku Zuela ni Athu
1. Falamenda iebhi ia ubhe i tua tambula phala o ukunji?
1 Tua tambula o kadivulu ni diambu, ‘Kilomboluelu kia Mak’a Nzambi.’ Kiebhi ki tu tena ku di pelepalala, phala o ukunji ni kadivulu kaka? O kadivulu kaka, kala ni ibatulu iavulu ia Bibidia ni ma diambu kála o divulu Raciociníos, ka tena ku kuatekesa ku mateka ku zuela ni athu.
2. Kiebhi ki tu tena o ku kalakala ni kadivulu, ‘Kilomboluelu kia Mak’a Nzambi’ mu ukunji?
2 U tena ku bhanga o kibhuidisu kia 8 ni ku zuela: “Tua mu kunda o ji vizinhu jetu mukonda athu avulu a dibhudisa ‘O kuila Nzambi muéne uene mu tu talesa o hadi’? [Saí jimbambe, a sola ku londekesa o ibhuidisu ku mukua dibhata.] Ihi i u banza? [Ehela o muthu n’a tambuijile.] O Bibidia i tambuijila o kibhuidisu kiki.” Tanga ni ku jimbulula kibatulu kimoxi mba iiadi mu Bibidia. Se mukua dibhata u xikina, u tena ku mu londekesa o 20 a ibhuidisu iala mu kilomboluelu ni ku mu bhinga ku sola kibhuidisu kimoxi, phala ku ki tambuijila kioso ki ua-nda mu kunda dingi. Mba u tena ku mu bhana divulu dimoxi dia ku di longa, di zuela ia lungu ni maka enhá.
3. Kiebhi ki tu tena o ku kalakala ni kadivulu ‘Kilomboluelu kia Mak’a Nzambi,’ phala ku zuela ni athu ka xikina kuila kuene Nzambi?
3 O ibhuidisu 4, 13 ni 17, i tena ku kuatekesa ku zuela ni athu ka tokala lua ngeleja mba ka xikina kuila kuene Nzambi. Mu kifika u tena ku bhanga o kibhuidisu 17 ni ku zuela: “Tua mu kunda o miji mu diembu dietu. U xikina kuila, o miji ia mu dibhana ni ibhidi iavulu lelu? [Ehela o muthu n’a tambuijile.] O kibatulu kiki, kiene mu kuatekesa makaza avulu: “o muhatu [ué] a xile munumi’ê.” [Ku bhingi ku zuela kuila, o izuelu íii ia tundu mu divulu dia Efezo 5:33. Se ua mu zuela ni muhatu, u tena ku bhitulula o izuelu i tu sanga mu divulu dia Efezo 5:28.] U xikina kuila, ku kaiela o kitendelesu kiki, ku tena ku kuatekesa o makaza?”
4. Ihi i u tena ku zuela, kioso ki u zubha ku zuela ni muthu ka xikina kuila kuene Nzambi?
4 Kioso ki u zubha ku zuela ni muthu, bhanga ioso phala ku suluka mu kizuua kiéngi. Nange u tena ku sola ku zuela ia lungu ni kibatulu kia Bibidia kia kibhuidisu ki ua bhange. Se kithangana ki bhana, zuela ni mukua dibhata o njimbu iambote, i uala na-iu ia lungu ni Bibidia. Mu ku xinganeka mu maka u mua zuela kia ni kiebhi kia mona o Bibidia, mu bhane divulu dioso-dioso di uejiia kuila ua-nda di uabhela.—Tanga o mukanda ua itendelesu, u tu sanga mu Kikalakalu Kietu kia Utuminu kia mbeji ia Kaiadi ka 2013.