WENDELU WA UKIDISTÁ
Kuboka Kumoxi mu Mbambe Mwa Zwela Madimi Avulu
O athu a xikina dingi o njimbu ya Utuminu ni lusolo, kyoso kya ivwa mu dimi dya uvwalukilu. Nange, kiki kyene kya bhangesa Jihova kusokejeka o ima mu Pendekoxi ya muvu wa 33 K.K., phala o ‘Jijudé joso ja tundile mu jixi joso bhoxi’a dyulu,’ kwívwa o njimbu yambote mu ‘madimi a uvwalukilu,’ sumbala ene exile mu zwela o dimi dya Hebalaiku mba dya Ngeleku, dyexile mu zwela o athu oso. (Ik 2:5, 8) Lelu, mu ididi mwa zwela madimi avulu, o aboki mu ilunga a madimi engi, nange a boka mu mbambe imoxi. Kyebhi o aboki a tokala mu ilunga yiyi, a tena kuboka mu kithangana kimoxi, sé kubhita dingi mu jinzo mwa bhiti kyá akwá, phala ka kwatese njinda ku athu?
Zwela ni akwenu (Ji 15:22): O tufunga twa sidivisu twa tokala kudizwelesa, phala kusanga ndunge ya kuboka o njimbu yambote. Se o mbambe yofele, o jiphange a ilunga a madimi engi, nange a mesena kwila, ki mu boke mu jinzo jala mu mbambe yâ. Maji se ka mu tena kuboka mu mbambe yoso, mukonda mbambe yâ ya dikota, nange a mesena kwila, mu boka mu jinzo joso; se kumoneka muthu wa mesena kudilonga, mwa tangela. (Organizados pág. 93 parág. 37) Mba nange ene a bhinga o kilunga kyé, phala kwa kwatekesa kusanga athu a zwela o dimi dya kilunga kyâ, ni kwa londekesa o jinzo. (Kikalakalu Kyetu Kya Utuminu 7/12 difwe 5 ni kaxa) Lembalala kwila, bhu dibhata dimoxi, nange a zwela madimi avulu. Kyoso ki mu di sokejeka phala kuboka mu mbambe, mwa tokala kuxila o itumu, ya lungu ni kuzwela ima ya lungu ni myenyu ya athu.
Belesela o Itendelesu (Ef 4:16): Kayela o itendelesu yoso i bhana o kafunga ka sidivisu. O kwila wa mu longa o Bibidya ku muthu wa mesena kudilonga mu dimi dyéngi, mu veji dya dimi di zwela o kilunga kyê? Nange o dixibulu dya-nda kula ni lusolo, se u mu bhana ku jiphange ja tokala mu kilunga mba kibuka mwa zwela o dimi dyê.
Di sokejeke (Ji 15:28; 16:1): Se muthu mu mbambe yê u zwela dimi dyéngi, bhanga yoso phala ku mu tudila o njimbu yambote. U tena kudisokejeka mu kuxinganeka mu madimi u u tena kusanga mu mbambe yé, ni kuta jibibidya ni jividyu ja madimi yâ mu mutelembe wé wa kafwetele, ande dya kutunda ku bhata. U tena we kudilonga kumenekena mu madimi a mukwá, bhu kaxi ka falamenda JW Language.