KYEBHI KITUTENA KUTOLOLA O UKEXILU WAKUDIZEMBA

1 | Ki Ukale Ni Katombo

O Bibidya Yamba:

“Nzambi ki mukwa katombo, maji mu jixi joso mwene uxikina woso u mukala ni wôma, anga ubhanga o ima yayuka.”—IKALAKALU 10:34, 35.

O Kiki Kilombolola Kwila:

Jihovaa Nzambi katufundisa bhukaxi ka ixi mwatuvwalela, kikonda mba ijila ya ixi yetu. Muveji dya kiki, mwene udikwatenena ku ima yala kumuxima. O Bibidya yamba we kuma, “o muthu u tala kidifwa kya kanga, Jihova-phe u tala ku muxima.”—1 Samuwele 16:7.

Ihi i Utena Kubhanga:

Sumbala kitutena kwijiya yala kumuxima wamuthu, maji tutena kubhanga yoso phala kukayela o phangu ya Nzambi ni kutala akwetu sé katombo. Sota kutala muthu ni muthu muveji dya kutala o athu kala kibuka. Se udivwa kwila wala ni ixinganeku yayibha yalungu ni akwenu, nange mukonda dya kikonda mba ixi mwa avwalela, samba kwa Nzambi, mubhinge phala kukukwatekesa kukatula o ixinganeku yiyi. (Jisálamu 139:23, 24) Se ubhinga ni kidi kyoso phala Jihova kukubhana nguzu phala kukale ni katombo, eye utena kudyelela kwila mwene wandakwivwa o musambu wé ni kukukwatekesa.—1 Phetele 3:12.

a Jihova odijina dya Nzambi.—Jisálamu 83:18.

“Nuka ngaxikamene ni muthu wexile mundele sé kuzoka . . . Kindala ngibhanga mbandu yakisangela kya jiphange adizolo ku mundu woso.”—TITUS

Musoso wa kidi—TITUS

Watolola o Ukexilu Wakudizemba

Titus wabhangele mbandu yakibuka kya jibandi adizangalele mukonda dya kijila kyexile muwanuna o athu mukonda dya kikonda. Mwene wambe: “Etu twawabhelele kuya mu ididi kexile mukwehelamu ambundu, kala jyotele ni mu ididi mwasumbisa uhôlwa phala kusota mwene ngó jimvunda.” Titus wambe kwila mwene wazembele kyavulu akwa, o kiki kyamubhangesa kukala mukwa njinda; mwene wambe dingi: “Se ngakexile muzoka ni muthu, kikale diyala mba muhatu éme ngexile mu dyanga kubhana o huxi.”

Titus wamateka kulungulula o ukexilu wê, kyoso kyamateka kudilonga o Bibidya ni Jimbangi ja Jihova. O kutanga o Bibidya, kwalungulula o ukexilu wê wakuxinganeka. O kima kyamutula dingi kumuxima o kikanenu kya mundu wobhe kimwanda “kala dingi kùfwa, nè ngó mukôndo, mba kudila, mba kukata.”—Dijingunwinu 21:3, 4.

Kya dyanga, Titus wabhange yoso phala kuxisa o ukexilu wakuzemba akwa. Mwene wambe: “Kyabhonzele kyavulu kulungulula o ixinganeku ni ibhangelu yami.” Maji o yamukwatekesa, yadilongo mudivulu dya Ikalakalu 10:34, 35, izwela kwila Nzambi kimukwa katombo.

Ihi yabhiti? Titus ujimbulula: “Eme ngaxikina kwila o Jimbangi ja Jihova éne o abhezi akidi kyoso kingamono o henda yadilondekesa mudya sé katombo kakikonda. Ande mwene dya kungibatizala kala Mbangi ya Jihova, sayi phange ya mundele wangixana monzo yê phala tudye kumoxi. O kiki kyedile kala nzoji. Nuka ngaxikamene ni muthu wexile mundele sé kuzoka, maji kindala ngamudya nawu kumoxi kumabhata mâ. Kindala ngibhanga mbandu yakisangela kya jiphange adizolo ku mundu woso.”