KYEBHI KITUTENA KUTOLOLA O UKEXILU WAKUDIZEMBA

3 | Katula O Ukexilu Wakudizemba Mu Kilunji Kyé

O Bibidya Yamba:

“Ehelenu Nzambi kulungulula o ilunji yenu, phala mu tongolole o vondadi ya Nzambi, yawabha, yatenena, i mu wabhela kyambote.”—LOMA 12:2.

O Kiki Kilombolola Kwila:

Nzambi usuwa o ukexilu utuxinganeka. (Jelemiya 17:10) O kweha o izwelu ni ibhangelu yakudizemba kikisoko, twabhingi kubhanga dingi. O ukexilu wakudizemba umatekena mu kilunji ni kumuxima. Kyenyikiphe, kitwatokala kuxinganeka mu ima itubhangesa kuzemba akwetu. Kyene ngó kitwanda ‘lunguluka’ mukidi ni kutolola o ukexilu wakudizemba.

Ihi i Utena Kubhanga:

Sota kutonginina kyebhi ki wene mutala akwenu, bengebenge yó atokala mu jixi jengi mba ala ni kikonda kyengi. Dibhwidise: ‘Kyebhi kingene mwatala? O ima ingejiya yalungu ni ene yene ifwinyisa o ukexilu unga atala, inga o katombo?’ Kana kutala mba kutanga ima mu internete ifunyisa athu kudizemba, ilondekesa o usweya.

O Mak’a Nzambi atena kutukwatekesa kutolola o ukexilu wakudizemba, mu kilunji kumuxima wetu

Kibhonza kutonginina o ibanzelu yetu ni ukexilu wetu wakudivwa. Maji o Mak’â Nzambi, atena kutukwatekesa “kutungula o ixinganeku ni jivondadi jala kumuxima.” (Jihebelewu 4:12) Kyenyikiphe suluka ni kudilonga o Bibidya. Sokesa o ima iwamudilonga ni ibanzelu yé, bhanga yoso i utena phala uxinganeke kala kilonga o Bibidya. O Mak’â Nzambi atukwatekesa kutolola o ukexilu wakuzemba ‘wanaminina’ mu kilunji ni kumuxima wetu—2 Kolindu 10:4, 5.

Musoso wa kidi—STEPHEN

Walungulula o Ukexilu wê Wakubanza

Stephen ni mwiji wê a azembele kumindele. Kyenyiki ene akayela o kifwinyisu kyakibuka kya jinguvulu akexile musota o mbote phala o athu oso. Sayi kithangana mwene wabhangele we mbandu yakibuka kyabhangele usweya. Mwene wamba: “Sayi kizuwa eme ni makamba mami, twatale filime yalombolola o hadi yatale o abhika ku ixi ya Estados Unidos. O katombo kutwamono mu filime katubhangesa kukala we ni njinda, kyenyiki twabeta o minzangala exile mindele akexile we mutala o fileme. Mukusuluka twayi mudyembu dyengi, twexile musota muthu wosowoso phala kumubeta.”

O ukexilu wa Stephen wakuxinganeka walunguka kyoso kyamateka kudilonga o Bibidya ni Jimbangi ja Jihova. Mwene ulembalala: “Ngadiwana ni ukexilu wambote unganomo bhukaxi ka Jimbangi ja Jihova, mukonda avulu ala ni ukexilu wakutalatala akwa ni kathomba. Mukifika, sayi mwiji wamindele axisa o mona phala kumulanga kumwiji wamukwa exile ambundu. Ngamono we mwiji wamindele azalela munzangala wexile mumbundu kexile ni kididi phala kukala.” Stephen waxikina ni kidi kyoso kwila o Jimbangi ja Jihova adizolele kyavulu kala kyakanena Jezú kwila o Jikidistá ja kidi ejidizola.—Nzwá 13:35.

Ihi yakwatekesa Stephen kuxisa o usweya ni kifwa kya kuzemba akwa? O mukanda kwa akwa Loma 12:2 wamukwatekesa. Mwene wambe: “Ngamateka kutonginina kwila ngabhingile kulungulula o ukexilu wami wakuxingakena. I ngabhingile kweha o undanda ni kutonginina kwila o kukala muthu watululuka wene o ukexilu wabetakota.” Kindala Stephen wala kyá ni mwenyu watululuka mu 40 amivu ndenge.