Kyoso o Ukexilu wa Kudizemba Kiwandakalaku Dingi!
Né mwene se tweha o ukexilu wakudizemba, kitwandatena kubhangesa o athu atukondoloka kweha o ukexilu yú. O athu ambote ene mwazemba hanji. Mukiki, nanyi utena ngó kuzubha o ukexilu wakudizemba?
Jihova Nzambi mwéne ngó utena kuzubha o ukexilu wakudizemba utwene mumona lelu. O Bibidya ikanena kwila kyene mwene kyandabhanga Nzambi.—Jisabhu 20:22.
NZAMBI WANDAZUBHA YOSO IBHANGESA O ATHU KUDIZEMBA
1. SATANAJI, O DYABHU. Satanaji, o anju yabhukumuka, mwéne wabheka o kudizemba kutwene mumona lelu. Nzambi wandabwika Satanaji, ni yó ene muzemba akwa kala kibhanga mwene.—Jisálamu 37:38; Loma 16:20.
2. O MUNDU WA SATANAJI, WEZALA NI UKEXILU WAKUDIZEMBA. Nzambi wandazubha yoso ibhekela kudizemba kala o jinguvulu akwa mangonya, ni atwameni a jingeleja ene mubhangesa o athu kudizemba. Nzambi wandabwika we o akwa wenji ala ni lwimbi, abhomba akwa ni kitadi, anganala akwa.—2 Phetele 3:13.
3. O KUKAMBA KUYUKA. O Bibidya ijimbulula kwila athu oso alundula o kukamba o kuyuka; kifwa, o ukexilu wayibha wakubanza, wakudivwa ni wakubhanga o ima. (Loma 5:12) Ukexilu umoxi wakubhanga kiki, o kuzemba akwetu. Nzambi wandakwatekesa o athu kutolola o ukexilu woso wakukamba o kuyuka, mu kusuluka, wandazubha o ukexilu wakudizemba.—Izaya 54:13.
O BIBIDYA IKANENA KWILA KIKWANDAKALA DINGI KUDIZEMBA
1. KIKWANDAKALA DINGI MUTHU ANDAMUTALATALA SÉ KUYUKA. O Utuminu wa Nzambi wandakwendesa o ima mu ixi. Wene wandatumina tunde kudyulu ni kubheka kuyuka kwakalelaku. (Daniyele 2:44) Ki kwandakalaku dingi katombo ni kukamba kuxila o ukexilu wa akwetu. Nzambi wandazubha o ukexilu woso wakutalatala o athu sé kuyuka.—Luka 18:7
2. ATHU OSO ANDAKALA NI KUTULULUKA. Séku muthu wandatala dingi hadi mukonda dya usweya mba ita. (Jisálamu 46:9) O ixi yandakala kididi kyakondama, mwandatunga ngó athu azolo o kutululuka.—Jisálamu 72:7.
3. ATHU OSO ANDAKALA NI MWENYU WAKALELAKU MU KIDIDI KYAYUKA. Oso mu ixi andadilondekesa henda yakidi mudya. (Matesu 22:39) Séku dingi muthu wandatala hadi, né mwene mukonda dya ima yayibha yabhiti m’ukulu. (Izaya 65:17) Kyoso kyandabhwa o kudizemba, o athu anda “kala ku ngalasa ni kutululuka kwavulu.”—Jisálamu 37:11.
Eye wamesena kutunga kumundu wadifu kiki? Né mwene kindala kiki, athu avulu amudilonga kweha o ukexilu wakudizemba mukubelesela o itumu ya Bibidya. (Jisálamu 37:8) Kiki kyene kyamubhanga o mazunda ni mazunda a Jimbangi ja Jihova kumundu woso. Sumbala ene ala ni ijila ki idifu, atundu mujixi kijidifu, ene asanguluka mukonda adizolo mudya, ala ni muxima umoxi.—Izaya 2:2-4.
O Jimbangi ja Jihova asanguluka mukutangela akwa, o ima yene mudilonga yalungu ni kyebhi kitutena kudibhana ni kukamba o kuyuka ni katombo. O ima iwandadilonga yandakukwatekesa bhofelebhofele kubhinganesa o ukexilu wakudizemba ni ukituke umukwa henda. Eye wandamona kyebhi ki utena kutalatala athu oso ni henda, kate mwene yó akambe o kisakidilu, azembe akwa. Mukubhanga kiki, eye wandasanguluka dingi, o ukamba we ni akwenu wandakola dingi. O kyabetadingi kota, wandadilonga se ihi iwatokala o kubhanga phala kukala ni mwenyu wakalelaku kyoso o Utuminu wa Nzambi wandakwendesa o ima yoso mu ixi, kikwandakala dingi kudizemba.—Jisálamu 37:29.