Jihova Wamesena Kwila Athu Oso Adyela o Ituxi Yâ

1. lhi ibhanga o muthu wadyela o kituxi?

KYOSO ki tuta kituxi twatokala kudyela. Mu Bibidya o muthu wadyela o ituxi yê ulungulula o wendelu wê, kasuluka kubhanga o ima imubhangesa kuta kituxi.—Tanga o Dilombolwelu Dya Izwelu Yala mu Bibidya, “Kudyela.”

2. Mukonda dyahi twatokala kudilonga yalungu ni kudyela ituxi yetu? (Nehemiya 8:​9-11)

² Etu enyoso twabhingi kudilonga yalungu ni kudyela o kituxi. Mukonda dyahi? Mukonda twene muta kituxi izuwa yoso. Kala mbutu ya Adá ni Eva, twalundula o kituxi ni kufwa. (Lom. 3:23; 5:12) Kikwala muthu ukamba kuta kituxi. Ne mwene o muthu wala ni kixikanu kya kolo kala poxolo Phawulu, kya abhonza kulanga o jihanji jayibha. (Lom. 7:​21-24) O kwila twatokala kuluwala ithangana yoso mukonda dya ituxi? Kana. Jihova mukwa henda, mwene wamesena kwila tusanguluka. Tumone o phangu ya Jijudé mu izuwa ya Nehemiya. (Tanga Nehemiya 8:​9-11.) Jihova kamesenene kwila ene akala ni kikote ku muxima, maji atokalele kusanguluka mu kubheza Jihova. Mwene wejiya kuma se tudyela o ituxi yetu twanda sanguluka ku mwenyu. Mukonda dya kiki Mwene utulonga kudyela o ituxi yetu. Se tudyela o ituxi yetu tutena kudyelela kwila o Tata yetu ya henda, wanda tuloloka.

3. lhi itwandadilonga mu milongi yiyi?

³ Twanda dilonga dingi yalungu ni kudyela o ituxi yetu. Mu milongi yiyi twandadilonga ima itatu. Kyadyanga, twandadilonga ihi yalongo Jihova ku akwa Izalayele yalungu ni kudyela o ituxi. Kayadi, twandamona kyebhi Jihova kyene mukwatekesa o athu n’adyele o ituxi yâ. Katatu twanda mona ihi yalongo Jezú ku akayedi’ê yalungu ni kudyela o ituxi.

IHI YALONGO JIHOVA KU AKWA IZALAYELE YALUNGU NI KUDYELA O ITUXI?

4. O akwa Izalayele atokalele kubhanga ihi phala Jihova kwaloloka?

⁴ Kyoso Jihova kyabhana o ijila yê ku akwa Izalayele, ene akanena ku ibelesela. Se ene eji bhanga kiki, Jihova weji kwalanga ni kwabesowala. Mwene wambe kiki yalungu ni ijila yiyi: “Kitumu kiki, ki ngala ku ku tendelela lelu’iki, ki kya ku jinganena, kana, (kwila ki lémbwa ku ku tettulukila), ki kya kala we bhwalebha.” (Mate. 30:​11, 16) Maji se ene kabelesela o itumu ya Jihova, mba se abheza jinzambi jengi, Jihova keji kwalanga dingi, mukonda dya kiki eji tala hadi yavulu. Né kiki, eji tena hanji kukala ni favolo ya Jihova. O Bibidya yamba kwila ene ‘eji vutuka kwa Jihova Nzambi yâ, ni kwivwa o itendelesu yê.’ (Mate. 30:​1-3, 17-20) Se ene adyela o ituxi yâ, Jihova weji kala dingi kamba dyâ ni kwabesowala.

5. Ihi yabhange Jihova phala o mundu wê kudyela o ituxi yâ? (2 Jisobha 17:​13, 14)

⁵ Mu ithangana yavulu, o akwa Izalayele abhukumukina Jihova. Exile mubheza iteka, ni kubhanga ima yamukwa yayibha. Mukonda dya kiki, ene katale hadi. Maji Jihova wakwatekesa o mundu wê, o akwa Izalayele phala kuvutuka ku musidivila. Mu ithangana yavulu, mwene wexile mutumikisa o jipolofeta jê phala kudimuna o mundu wê ni kuvutuka kwa mwene.—Tanga 2 Jisobha 17:​13, 14.

6. Kyebhi Jihova kyakwatekesa o akwa Izalayele kudyela o ituxi yâ bhukaxi ka jipolofeta jê? (Tala we ofoto.)

⁶ Nzambi wazwela bhu kaxi ka Jelemiya phala kutangela o akwa Izalayele: “Mbaluke yakime, vutuka! Jihova wa ki tange; o njinda yami ki nganda ku i lundulwila dingi ku thandu dyenu; mbata eme ngi mukwa Mbote. Hé kima dixikine ngó kikuma kyé: ki wa tondalela Jihova Nzambi yé.” (Jel. 3:​12, 13) Jihova wazwela kwa Jowele phala kutangela o akwa Izalayele: “Ni muxima wenu woso, vutukenu kokwami.” (Jowe. 2:​12, 13) Mwene wambe kwa Izaya: “Di sukudyenu, mu dizelese, phulu yoso ya ibhangelu yenu katulenu-yu, itunde kumesu mami, ehenu o kubhanga kyayibha.” (Iza. 1:​16-19) Bhukaxi ka Ezekiyele, Jihova wa ebhwidisa: “Mbhebhu eme ngéne mu kwinda kya ngoho o kalunga ka mukwa phulu? Manyi [ngandala] kwila u dyela ku jinjila jê ja phulu mbé a kole mwenyu? Mukonda eme ki ngene ku wabhela kalunga ka muthu woso ufwa; dyelenu-phe, nda mu kale ni mwenyu.” (Ize. 18:​23, 32) Jihova usanguluka kyoso o muthu kyadyela o ituxi yê, mukonda mwene wamesena kwila ene akala ni mwenyu wakalelaku! Maji Jihova ukwatekesa o muthu ande dya mwene kudyela o kituxi kyê. Twanda dilonga misoso ilondekesa o kidi kiki.

7. Ku phangu ya Hozeya ni muhatu wê, Jihova walongo ihi ku mundu wê?

⁷ Tumone kyebhi Jihova kyalongo o akwa Izalayele bhukaxi ka phangu ya Ngomele muhatu wa Polofeta Hozeya. Mu kuta o phanda, mwene waxisa o Hozeya phala kukala ni diyala dyengi. Ihi yabhange Jihova? Kuma Jihova umona o mixima, mwene wambe kwa Hozeya: “Ndé dingi lwamukwá, u zole muhatu, a mu zola kwala kamba dyé, suke mwene-phe [kidyanzunga], (wene mu ta jiphanda), mukwa ni Jihova kya zola an’a Izalayele, sumbala-phe ene a landukila kutala ku jinzambi jengi.” (Hoz. 3:1; Jisa. 16:2) Kala ki wamono mu velusu, o muhatu wa Hozeya wasulukile mu kuta ituxi ya makota, ne kiki Jihova wazwela kwa Hozeya phala ku muloloka ni kuvutuka-nê kubhata.a Ni phangu yiyi Jihova wamesenene kulonga o akwa Izalayele kyebhi mwene wexile mu divwa mukonda dya ukexilu wâ. Ne mwene ni ima yayibha exile mu bhanga, Jihova wa azolele hanji, mwene wasuluka mu kutumikisa o jipolofeta je phala ku akwatekesa kudyela o ituxi yâ na suluke ni mwenyu. O phangu yiyi itulonga kwila Jihova wejiya kyambote yoso yala ku muxima wa muthu. Itulonga we kwila mwene wanda suluka ni kukwatekesa o muthu wate kituxi kya dikota, kudyela. (Jisa. 17:3) Twanda dilonga dingi kyebhi Jihova kyabhanga kiki.

KYEBHI JIHOVA KYA KWATEKESA O MUTHU WATE KITUXI, KUDYELA?

8. Ihi yabhange Jihova phala kukwatekesa Kayini kudyela o kituxi kyê? (Dimatekenu 4:​3-7) (Tala we ofoto.)

⁸ O Bibidya izwela yalungu ni Kayini. Mwene wexile o mona wadyanga wa Adá ni Eva. Kala o twana twa mukwa twa Adá ni Eva, Kayini wexile we mukwa ituxi. Maji o Bibidya yamba kwila “o ikalakalu yê yexile yayibha.” (1 Nz. 3:12) Nange kiki kilondekesa se mukonda dyahi Jihova “kaxikina Kayini ni sata yê.” Mu veji dya kulungulula o ukexilu wê, ‘Kayini njinda yamukwata, waluwala kyavulu.’ Mu kusuluka ihi yabhange Jihova? Mwene wazwela ni Kayini. (Tanga Dimatekenu 4:​3-7.) Jihova wazwela ni Kayini ni henda yoso. Mwene watangela Kayini kwila weji mubesowala se Kayini wabhangele o ima yambote. Maji Kayini kabhana matwi ku ima yamutangela Jihova, mwene kehela Jihova kumukwatekesa kudyela o kituxi kyê. O kwila Jihova kexile dingi mukwatekesa o athu amukwa kudyela o ituxi yâ? Kana!

9. Kyebhi Jihova kya kwatekesa Davidi kudyela o kituxi kyatele?

⁹ Jihova wazolele kyavulu Sobha Davidi. Jihova wambe kwila Davidi wexile “diyala dya sangulukisa o muxima “ wê. (Ika. 13:22) Maji Davidi watele phanda, wabhangesa we kujibha muthu. O Kijila kya Mozé kyambele kwila, Davidi atokalele kumujibha. (Iji. 20:10; Dya. 35:31) Maji Jihova wandalele kukwatekesa Davidi kudyela o kituxi kyê.b Sumbala Davidi kafisala o kituxi kyê, maji Jihova watumikisa polofeta Natane kubhata dya Davidi. Polofeta Natane wate kifika kya kwatekesa Davidi kutendela kwila watele ituxi yonene. Davidi wamono kwila waluwalesele kyavulu Jihova, anga udyela o kituxi kyê. (2 Sam. 12:​1-14) Mwene wasoneka sálamu ilondekesa kwila, mwene wadyela o kituxi kyê. (Jisá. 51, Izwelu yala kuthandu dya dyalwilu 51) O Sálamu yiyi yene mukwatekesa athu avulu ata ituxi, kudivwa kyambote ni kudyela ituxi yâ. Kima kyambote kwijiya kwila Jihova wakwatekesa selevende yê ya kazola Davidi kudyela o kituxi kyatele.

10. Kyebhi ki udivwa mu kwijiya kwila Jihova ukwatela mwanyu ni kuloloka o akwa ituxi?

¹⁰ Jihova wazembe o kituxi. (Jisá. 5:​4, 5) Maji Jihova watuzolo, yu wamesena kutukwatekesa kyoso kituta kituxi. Mwene wala jinga polondo phala kukwatekesa katé mwene o athu ate ituxi yonene kudyela, ni kuzukama kwa mwene. Kima kyambote kwijiya kwila Jihova wamesena kutuloloka! Kyoso ki tuxinganeka ku mwanyu ni ku muloloki wa Jihova, tumesena kumukala fiyele, ni kudyela ni lusolo kyoso kituta kituxi. Kindala twanda dilonga se ihi yalongo Jezú ku maxibulu mê yalungu ni kudyela o ituxi.

IHI YALONGO JEZÚ KU MAXIBULU MÊ YALUNGU NI KUDYELA O ITUXI?

11-12. Kifika kyebhi kyatele Jezú phala kulondekesa kwila Jihova wala polondo phala kutuloloka? (Tala ofoto yakapa.)

¹¹ Ku hama yadyanga, o kithangana kya Mexiya o kumoneka, kyabhixila. Kala ki twadilongo mu milongi yatundu-mu, bhukaxi ka Nzwá dya Batizu ni Jezú Kidistu, Jihova walongo o athu kwila atokelele kudyela o ituxi yâ.—Mat. 3:​1, 2; 4:17.

¹² Kyoso kyexile mu ixi, Jezú walongo o athu kwila Tat’ê wala polondo phala kuloloka o ituxi yetu. Jezú walondekesa o kidi kiki kyoso kyatele o kifika kya mona wabotesa o kitadi kyê kyoso. O mona yú waxisa o inzo, yu wabhange ima yavulu yayibha. Maji mu kubhita kithangana, “kyoso kyasungu o kilunji”, wavutuka kubhata. Ihi yabhange tat’ê? Jezú wambe kwila kyoso o mona “kyakexile hanji dikanga, o tat’ê wa mumono, o henda ya mukwata. Mwene anga ulenga ni lusolo u mu ndwakuna, ni henda yoso u mubhana jinzobole.” O mona wafikile kwila tat’ê keji muloloka. Mu kiki mwene wabhingi kwa tat’ê phala kukala mukalakadi wê. Maji o tata wamuloloka, yu wamwixana “mon’ami” anga umuxikina. O tata wambe: “Mon’ami yú wafwile, maji wavutuka ku mwenyu, watexikile, maji wamoneka.” (Luk. 15:​11-32) Kyoso kyexile ku dyulu, sé phala mwene wamono lwavulu Tat’ê kuloloka o athu adyele o ituxi yâ. O kifika kiki kyatele Jezú kitulondekesa kwila o Tat’etu, Jihova, wala polondo phala kuloloka o ituxi yetu!

13-14. Ihi yabhange Phetele, ni ihi yalongo ku jiphange yalungu ni kudyela o ituxi? (Tala we ofoto.)

¹³ Bhukaxi ka Jezú poxolo Phetele wadilongo o ukexile wa Jihova kuloloka. Phetele watondalele mu jiveji javulu, maji Jezú wexile polondo phala ku muloloka. Kyoso Phetele kyaditunu Jezú mu lutatu, Phetele wadivu kyayibha. (Mat. 26:​34, 35, 69-75) Maji kyoso Jezú kyamufukununa, mwene watukulukila kwa Phetele, nange kyoso Phetele kyexile ubheka wê. (Luk. 24:​33, 34; 1 Ko. 15:​3-5) Jezú wejidile kwila Phetele wadyela, yu wamesenene kuxikinisa Phetele kwila wamuloloka.—Tala Máluku 16:7 ni nota de estudo “e a Pedro” mu Bibidya ya phutu.

¹⁴ Phetele wadyele o kituxi kye, anga Jezú wamuloloka. Mukonda dya kiki Phetele weji tena kulonga o jiphange jê yalungu ni maka enya. Kyoso kya bhiti o fesa ya Pendekoxi Phetele wabhange diskulusu phala o Jijudé kexile mu bheza Jihova. Mwene wambe kwila ene ajibha o Mexiya. Ne kiki mwene wa ambela: “Kyenyiki dyelenu o ituxi, ni mu lungulule o ukexilu wenu, phala o ituxi yenu a mi jimune-yu, Jihova n’a mi bhane o kubhanduluka.” (Ika. 3:​14, 15, 17, 19) Phetele wambe kwila o mukwa ituxi udyela o ituxi yê mu kulungulula o ukexilu wa mwenyu wê. Kiki kilombolola kwila o muthu watokala kweha o ima yayibha, anga ubhanga o ima isangulukisa Jihova. Ku mivu yavulu ku pholo, Phetele wambe kiki ku jiphange: “Jihova . . . wa mikwatela mwanyu, mukonda mwene kamesena kwila kukala muthu ufwa. Maji wamesena kwila athu oso adyela o ituxi yâ.” (2 Ph. 3:9) Kyoso ki tudyela o ituxi yetu, ne mwene se ituxi yamakota, tu tena kudyelela kwila Jihova wanda tuloloka!

15-16. (a) Ihi yabhiti ku mwenyu wa poxolo Phawulu? (1 Timote 1:​12-15) (b) ihi itwanda dilonga mu milongi yakayela?

¹⁵ O poxolo Phawulu wabhingile kudyela o ituxi yê phala ku muloloka kwa Jihova. Ande dya kukala kidistá mwene wexile muzukutisa kyavulu o akayedi a Kidistu. Nange jiphange javulu nuka afikile kwila mwene weji lunguluka. Maji Jezú wejidile kwila mwene weji dyela o ituxi yê ni kulunguluka. Jezú ni Tate amono idifwa yambote kwa poxolo Phawulu. Jezú wambe: “O diyala didi nga musolo phala kubhana umbangi walungu n’eme.” (Ika. 9:15) Phala kukwatekesa Phawulu kulungulula o ukexilu wa mwenyu wê, Jezú wabhange madiwanu. (Ika. 7:58–8:3; 9:​1-9, 17-20) Kyoso Phawulu kya kituka kidistá, Jezú wamusolo phala kukala poxolo. Mu ithangana vavulu, Phawulu wexile musakidila Jihova ni Jezú mu kumulondekesa henda ni ngalasa. (Tanga 1 Timote 1:​12-15.) Mwene wambe: “Nzambi mu henda yê wa mu kukwatekesa phala udyele.”—Lom. 2:4.

¹⁶ Sayi kizuwa o poxolo Phawulu amutangela kwila sayi diyala watele o ndumbu, maji o jiphange kamutele mu kamukonde. Poxolo Phawulu watangela o jiphange phala kubhanga ihi? Ya zwela mwene itulondekesa kyebhi Jihova kya kwatela henda kyoso kyabazela o jiselevende jê, ni kyebhi kya loloka kyoso ene adyela o ituxi ya. Mu milongi yakayela twanda dilonga dingi yalungu ni maka enya.