O Henda ya Jihova Inangenena Katé ku Hádya ni Hádya

1-2. Jiselevende javulu ja Jihova ene mudibhana ni kibhidi kyahi?

XINGANEKA mu naviyu yala mukaxi ka kalunga mwala mabhuku onene. O mabhuku yá amutakujula o naviyu kuku ni koko. O kifikidilu kitena kukwatekesa o naviyu phala o mabhuku kayambate bhu kididi kyoso-kyoso.

² Kyoso kitwamudibhana ni kibhidi kyadikota, tutena kukala kala o naviyu yiyi. O ixinganeku yetu itena kulunguluka mu kithangana ni mbandu. Sayi kithangana, tudyelela kwila Jihova watuzolo ni kwila utulanga. Maji mu kithangana kya mukwa, tuxinganeka kwila mwene katuzolo, mba kamumona o ibhidi i twamudibhana nayu. (Jisá. 10:1; 13:1) Nange kumoneka kamba dyetu utuswinisa, mu kithangana kyenyokyo twanda divwa kyambote. (Jisa. 17:17; 25:11) Maji mu kusuluka tumateka dingi kukala ni phata sé Jihova wamutukwatekesa. Katé mwene tutena kubanza kwila Jihova watubwazeka. Kala o kifikidilu kya naviyu, ihi itena kutukwatekesa kukolokota kyoso kitudibhana ni ibhidi? Kyebhi kitutena kuxikina ni kusuluka mu kuxikina kwila Jihova watuzolo ni kwila utulanga?

3. (a) O kizwelu “henda yakalelaku” kilombolola ihi? (Jisálamu 31:7; 136:1) (b) Mukonda dyahi twamba kwila Jihova mwéne o phangu yabeta-kota yakulondekesa o henda yakalelaku? (Tala we ofoto.)

³ Kima kimoxi kitena kukala kala kifikidilu kyetu kyoso kitwamudibhana ni ibhidi, o kulembalala o henda yakalelaku ya Jihova. (Tanga Jisálamu 31:7; 136:1.) O kizwelu “henda yakalelaku” kilombolola kudikwatenena ku muthu. Jihova mwéne o phangu yabeta-kota yakulondekesa o henda yakalelaku. Mukonda dya kiki o Bibidya yamba kwila Jihova “wezala ni henda yakidi.” (Mak. 34:​6, 7) O Bibidya yamba we kiki yalungu ni mwene: “[Eye] wene mu lendukila kyavulu oso a dikola kokwé.” (Jisá. 86:5) Kiki kilombolola kwila Jihova nuka wanda bwazeka o jiselevende jê jafiyele! O kulembalala kwila Jihova wene ni henda yakalelaku, kitena kukala kala kifikidilu kyanda tukwatekesa kyoso kitwanda kala ni maka.—Jisá. 23:4.

LEMBALALA KWILA O HENDA YA JIHOVA, MILONGI YADYANGA YA BIBIDYA

4. Yebhi o milongi yadyanga ya Bibidya? Jimbulula se mukonda dyahi seku muthu utena dingi ku kubhangesa kukala ni phata ya milongi yiyi.

⁴ Kima kyanda tukwatekesa kukolesa o henda yetu kwa Jihova, o kulembalala kwila o henda ya Jihova ibhanga mbandu ku milongi yadyanga ya Bibidya. Ihi i ubanza kyoso kiwivwa o kizwelu “milongi yadyanga ya Bibidya?” Nange eye uxinganeka mu milongi yadyanga i wadilongo mu Mak’â Nzambi. Mu kifika, wadilongo kwila o dijina dya Nzambi, Jihova, Jezú o mona umoxi-élele wa Nzambi, o athu afu kejiya dingi kima kyoso-kyoso ni kwila o ixi yanda kituka Palayizu, o athu anda tunga-mu katé ku hádya ni hádya. (Jisá. 83:18; Ndo. 9:5; Nzw. 3:16; Dij. 21:​3, 4) Kuma waxikina kya mu milongi yiyi, seku muthu utena dingi ku kubhangesa kukala ni phata ya milongi yiyi. Mukonda dyahi? Mukonda eye wamono kwila o milongi yiyi ya kidi. Kulembalala kwila o henda ya Jihova ibhanga mbandu ku milongi ya dyanga ya Bibidya, kitukwatekesa kudituna o kibanzelu kya kwila mwene kamono o ibhidi i twamudibhana nayu, mba katusuwu.

5. Kyebhi o muthu kyatena kudituna o milongi ya makutu?

⁵ Ihi yakukwatekesa kudituna o milongi ya makutu kyoso kiwamateka kudilonga o Bibidya? Nange eye wasokesa o ima i wadilongele mu ngeleja yê ni ima ilonga o Bibidya. Mu kifika, xinganeka kwila eye waxikinine kuma Jezú, o Nzambi Muteni-a-yoso. Maji mu kudilonga o Bibidya, wadibhwidisa: ‘O kwila kiki kidi?’ Mu kutonginina o ima ilonga o Bibidya, eye wamono kwila o milongi yiyi ya makutu. Mu veji dya kusuluka mu kuxikina mu milongi yiyi ya makutu, eye wamateka kuxikina mu kidi kiki kya Bibidya: Jezú “o phande-kumbi ya ibhangelu yoso,” o “Mona umoxi-élele wa Nzambi.” (Kol. 1:15; Nzw. 3:18) Mu kidi, o milongi ya makutu itena kukala kala “ilumbu” yabhonzo ku ibula. (2 Ko. 10:​4, 5) Maji kyoso kiwadilongo o kidi, eye waditunu o milongi yiyi ya makutu.—Fil. 3:13.

6. Mukonda dyahi tutena kudyelela kwila ‘o henda yakalelaku ya Jihova inangenena katé ku hádya ni hádya’?

⁶ Eye utena kubhanga kima kyadifu ni ima ilonga o Bibidya yalungu ni henda ya Nzambi. Se mu kudibhana ni ibhidi, umateka kukala ni phata ya kwila Jihova kakuzolo, dibhwidise: ‘O kwila o kima kingamuxinganeka kya kidi mwene?’ Sokesa o jiphata jé ni izwelu itusanga mu divulu dya Jisálamu 136:​1, o kibatulu kya milongi yiyi. Mukonda dyahi Jihova wambe kwila o henda yê “yakalelaku”? Mukonda dyahi o izwelu “o henda yê yakalelaku inangenena katé ku hádya ni hádya” imoneka veji javulu mu sálamu yiyi? Kala kitwadilongo kya, o henda yakalelaku yakwatela Jihova ku mundu wê, ibhanga mbandu ku milongi yadyanga ya Bibidya. Ki kyakubhonzo kuxikina o milongi yoso yadyanga ya Bibidya. O milongi ya kwila Jihova katuzolo, kene mutubhana valolo, milongi ya makutu. Ni lusolo, ditune o milongi yiyi kala ki waditunu o milongi yamukwa ya makutu!

7. Jivelusu jebhi ja Bibidya jituxikinisa kwila Jihova watuzolo?

⁷ O Bibidya izwela dingi ima yavulu ituxikinisa kwila Jihova watuzolo. Mu kifika, Jezú wambe kiki ku akayedi’ê: “Enu mwa betakota o tudyédye twavulu ndenge.” (Mat. 10:31) Jihova we wambe kiki ku mundu wê: “Eme ngi ku swinisa, hé ngi ku kwatekesa, anga ngi ku fikidila ni lukwaku lwami lwa kadilu, lwa kuyuka kwami.” (Iza. 41:10) Xinganeka kyambote mu izwelu yiyi. Jezú kambe kiki: ‘Nange enu mwa betakota o tudyédye twavulu ndenge.’ Ni Jihova we kambe kiki: ‘Nange ngi kukwatekesa.’ Mu veji dya kiki, ene ambe: “Enu mwa betakota,” “ngi ku kwatekesa.” Mu kudibhana ni ibhidi se umateka kukala ni phata yalungu ni henda ya Jihova, o jivelusu kala jiji jitena ku kukwatekesa kumona, kwijiya ni kuxikina kwila Jihova wakuzolo. Mu kusamba ni kuxinganeka mu maka yá, eye wanda tena kuzwela o izwelu yala mu divulu dya 1 Nzwá 4:16: “Etu twejiya kwila Nzambi watuzolo, tuxikina mu henda yiyi.”a

8. Ihi iwatokala kubhanga se ubanza hanji kwila Jihova kakuzolo?

⁸ Maji se ne kiki ubanza hanji kwila Jihova kakuzolo? Sokesa o ibanzelu yé ni ima iwejiya. Sayi bhabha kitwatokala kudyelela ku ibanzelu yetu, maji tutena kudyelela mu ima itwejiya yalungu ni Bibidya. O ima ilonga o Bibidya yalungu ni henda ya Jihova kokwetu, ya kidi mwene. O kuxikina kwila Jihova kakuzolo, kilombolola kukamba kubhana valolo mu kidifwa kyabeta kota kya Jihova, o henda.—1 Nz. 4:8.

XINGANEKA MU HENDA YALA NAYU JIHOVA KOKWÉ

9-10. Mu divulu dya Nzwá 16:​26, 27 Jezú wexile muzwela yalungu ni ihi? (Tala we ofoto.)

⁹ Tutena kudilonga dingi yalungu ni henda ya Jihova, mu kutonginina o ima yazwela Jezú ku maxibulu mê: “O Tata wa mizolo.” (Tanga Nzwá 16:​26, 27.) Jezú kazwela ngo kiki phala kusangulukisa o maxibulu mê. Kyoso kitutanga o jivelusu jamukwa mu kibatulu kiki, tutendela kwila Jezú wexile muzwela yalungu ni musambu.

¹⁰ Jezú wazubhile kuzwela ku maxibulu mê kwila ene atokalele kusamba mu dijina dyê, kana kwa mwene. (Nzw. 16:​23, 24) Ene atokalele kwijiya o kidi kiki. Kyoso Jezú kyamufukununa, o maxibulu mê nange exile ni hanji ya kusamba kwa mwene mukonda ene exile makamba. Nange axinganeka, kuma Jezú wa azolele kyavulu, mwene weji kwivwa o misambu yâ ni kubhinga kwa Tat’ê phala kwa akwatekesa. Maji Jezú wambe kwila ene katokalele kubanza kiki. Mukonda dyahi? Mwene wambe: “O Tata wa mizolo.” O kidi kiki kyalungu ni milongi yadyanga ya Bibidya yalungu ni musambu. Kiki kilombolola ihi phala eye? Kidi kwila eye we wadilongo yalungu ni Jezú, yu wakituka kamba dyê. (Nzw. 14:21) Maji kala o maxibulu yá, eye utena kusamba kwa Nzambi mu kudyelela kwila mwene wakuzolo. Kyoso ki u samba kwa Jihova, ulondekesa kwila uxikina ku izwelu yiyi.—1 Nz. 5:14.

SOTA KWIJIYA SE IHI I KUBHANGESA KUKALA NI PHATA YALUNGU NI HENDA YA JIHOVA

11. Mukonda dyahi Satanaji weji sanguluka se tubanza kwila Jihova katuzolo?

¹¹ Kwebhi kwene mutunda o jiphata jalungu ni henda ya Jihova? Nange eye watambwijila kwila jene mutunda kwa Satanaji, kiki kidi. O Dyabhu wamesena ‘kutudya,’ ni kwila mwene usanguluka kyoso kitumateka kukala ni jiphata jalungu ni henda ya Jihova. (1 Ph. 5:8) Jihova watubhana o sata yakukula mukonda dya henda yiyi. Satanaji wamesena kutuxikinisa kwila kitwafwama kutambula o ujitu yu. (Jih. 2:9) Kyenyiki nanyi weji sanguluka se tukala ni jiphata jalungu ni henda ya Jihova? Satanaji. Nanyi weji sanguluka se tweha kusidivila Jihova mukonda dya kuluwala? Satanaji. Mwene wamesena kutuxikinisa kwila Jihova katuzolo. Maji kiki kitubhangesa kwolela, mukonda mwene mwéne kamuzolo kwa Jihova. Maji mwene usota kutuxikinisa kwila Jihova katuzolo ni kwila kasanguluka dingi netu. Yu mubhetu wê. (Efe. 6:11) Kyoso kitumona o ima yamesena kubhanga Dyabhu, tuswina dingi mu kuzoka ni mwene.—Tiy. 4:7.

12-13. Mukonda dyahi o kituxi kitwalundula kitena kutubhangesa kukala ni phata yalungu ni henda ya Jihova?

¹² Sayi dingi kima kyengi kitubhangesa kukala ni phata ya henda ya Jihova. Kima kyebhi? O kituxi ki twalundula. (Jisá. 51:5; Lom. 5:12) O kituxi kyazange o ukamba wa athu ni Nzambi. Kyazange we o mukutu wetu, o kilunji kyetu ni muxima wetu.

¹³ O kituxi kitubhangesa kubanza kyayibha. Tuditatela, tukala ni hele, tutandanganya, tukala we ni jisonyi. Kiki kibhita kyoso kituta kituxi ni kyoso kitulembalala kwila twakwa ituxi. Maji Nzambi katubhange phala kukala ni ibanzelu yiyi. (Lom. 8:​20, 21) O dikalu dyala ni dilola dyakubuka kiditena kwenda kyambote. Kyene we kimoxi n’etu, kitutena kubhanga o ima yoso ni kuyuka kwoso. Kyenyiki ki kima kyakudiwana se sayi bhabha tukala ni jiphata jalungu ni henda ya Jihova. Se kiki kibhita, twatokala kulembalala kwila Jihova, o “Nzambi yonene, muteni-wa-yoso . . . o henda yé kwa yó [amuzolo] ni kwa yó abelesela o itumu yé ki ibhu.”—Neh. 1:5.

14. Kyebhi o kuxinganeka mu sata yakukula kitukwatekesa kudyelela kwila Jihova watuzolo? (Loma 5:8) (Tanga we o kaxa “Dilange Mukonda o Kituxi Kyala ni Kutena.”)

¹⁴ Kidi kwila sayi bhabha tumona kwila kitwafwama kutambula o henda ya Jihova. Phala kuzwela o kidi kitwafwama mwene, kiki kyene kibhangesa o henda ya Nzambi kokwetu kukala ni valolo yavulu. Etu kitutambula o henda ya Jihova mukonda twabhange kima kyakatunda. Ne kiki, mu henda yê, Jihova watubhana o sata yakukula phala kuloloka o ituxi yetu. (1 Nz. 4:10) Lembalala kwila Jezú weza mu ixi phala kubhulula athu akwa ituxi, kana o athu ayuka. (Tanga Loma 5:8.) Etu kitutena kubhanga o ima ni kuyuka kwoso, Jihova kakingila we kwila tubhanga o ima ni kuyuka. Kyoso kitutendela kwila o kituxi kitubhangesa kukala ni jiphata jalungu ni henda ya Jihova, twanda bhanga yoso ni yoso phala kitukale ni jiphata jiji.—Lom. 7:​24, 25.

KOLOKOTA MU UFIYELE WÉ KWA JIHOVA

15-16. Se tukolokota fiyele kwa Jihova, tutena kudyelela mu ihi ni mukonda dyahi? (2 Samuwele 22:26)

¹⁵ Jihova wamesena kwila ‘tudikwatenena kwa mwene.’ (Mate. 30:​19, 20) Se tubhanga kiki tutena kudyelela kwila Jihova wanda kala fiyele kokwetu. (Tanga 2 Samuwele 22:26.) Kyoso kitusuluka ni ufiyele wetu kwa Jihova, tutena kudyelela kwila mwene wanda tukwatekesa kudibhana ni kibhidi kyoso-kyoso kimoneka ku mwenyu wetu.

¹⁶ Kala kitwadilongo, mu Bibidya mwala ima yavulu itukwatekesa kukolokota, kala o naviyu yala ni kifikidilu. Twejiya kwila Jihova watuzolo ni kwila wanda tukwatekesa. Kiki kyene kilonga o Bibidya. Mu kiki se tukala ni jiphata jalungu ni henda ya Jihova, mu veji dya kudyelela mu ibanzelu yetu, twatokala kulembalala mu ima itwejiya yalungu ni henda ya Jihova. Twamesena kukolokota mu kudyelela mu kidi kya Bibidya kya kwila o henda ya Jihova inangenena kate kuhádya ni hádya.