Kyebhi ki Utena Kusanguluka se Wamulanga Muthu Wakuka Kya Mba Muthu Wakate?

1-2. Se wamulanga muthu wakuka kya mba wakate, kyebhi Jihova kyadivwa yalungu neye? (Jisabhu 19:17) (Tala we o jifoto.)

SAYI phange ya diyala watungu mu ixi ya Coreia amwixana Jin-yeol wambe: “Eme ni muhatu wami tunde ki twa kazala twala kya mu 32 a mivu ndenge. Mwene wala ni uhaxi wabhonzo ukatesa o wongo, kene mutena we kwenda. Mukonda dya kiki ngamu mulanga kya mu mivu itanu. Eme ngazolo kyavulu o muhatu wami, o kumulanga ku ngisangulukisa kyavulu. Mu mausuku woso mwene wene muzeka mu hama yoyo yadifu ni ji hama ja jinzo ja kusaka. Eme ngene muzeka kumbandu ye, twene mudikwata ku maku kyoso ki twamuzeka.”

² O kwila wamu langa ndandu mba dikamba wakuka mba wakate? Se kyene sé phata eye usanguluka mu kulanga muthu u wamuzolo. Mu kubhanga kiki eye wamulondekesa we o henda ye kwa Jihova. (1 Ti. 5:​4, 8; Tiy. 1:27) Maji kubhonza kyavulu kulanga muthu, ni kwila nange o ibhidi i udibhana nayu akwenu katena ku ijiya. Nange eye utena kuxinganeka kwila seku muthu wamutendela yoso iwamudibhana nayu. Ku pholo dya athu eye udilondekesa kwila wasanguluka, maji kyoso ki ukala ubheka udila kyavulu. (Jisá. 6:6) Ne mwene se akwenu kejiya o ibhidi ye, maji Jihova wejiya. (Sokesa ni Makatukilu 3:7.) Mwene umona kyoso ki udila, wejiya we o nguzu i wene mubhanga. (Jisá. 56:8; 126:5) Jihova wejiya we yoso i ubhanga phala kukwatekesa yo wa azolo. O kukwatekesa akwenu kyedi kala wamu sobhesa kima kwa Jihova, mwene ukanena ku kufuta nakyu.—Tanga Jisabhu 19:17.

3. Nange ibhidi yebhi yadibhana nayu Mbalahamu ni Sala kyoso kyexile mulanga Tela?

³ Mu Bibidya tusangamu misoso yavulu ya mayala ni ahatu alange athu akukile kya mba akatale. Tala o phangu ya Mbalahamu ni Sala. Kyoso kya tundu mu mbanza ya Ule, o tata yâ, Tela, wexile ni hama jiyadi ja mivu. Ne kiki Tela wende nawu njila yexile ni dikanga dya hama avwa makwinyi a samanu a jikilómetulu phala kubhixila mu mbanza ya Halane. (Dim. 11:​31, 32) Sé phata Mbalahamu ni Sala azolele Tela, maji xinganeka mu ibhidi yexile mudibhana nayu benge-benge kyoso kyexile mu kwenda njila. Ene nange ende njila bhukaxi ka jijumendu mba jikamelu, o kwenda njila bhu kaxi ka jijumendu ni jikamelu kwabhonzele phala yo akukile kya kala Tela. Sayi ithangana nange ene exile mutohoka kyavulu. Maji Jihova wa abhana o nguzu yabhindamene. Kala Jihova kyakwatekesele Mbalahamu ni Sala, mwene wanda kukwatekesa we ni kukuswinisa.—Jisá. 55:22.

4. Ihi itwanda mona mu milongi yiyi?

⁴ O kusanguluka kutena kukukwatekesa kuswina mu kulanga muthu u wa muzolo. (Jisa. 15:13) Eye utena kusanguluka ne mwene se wamudibhana ni ibhidi. (Tiy. 1:​2, 3) Kyebhi ki utena kubhanga kiki? Ukexilu umoxi o kusamba kwa Jihova mu ku mubhinga kikwatekesu phala kukala ni ibanzelu yambote. Mu milongi yiyi twanda mona se kyebhi o yo amulanga athu akuka kya mba akate atena kusanguluka. Twanda mona we kyebhi o athu akamukwa atena kukwatekesa. Maji kyadyanga twanda mona hanji se mukonda dyahi o yo amulanga muthu wakuka kya mba wakate kitena kwabhonza kusanguluka.

MUKONDA DYAHI KITENA KUKUBHONZA KUSANGULUKA KYOSO KI WAMU LANGA MUTHU U WAMU ZOLO?

5. Mukonda dyahi o yo amulanga athu akuka kya mba akate atokala kusanguluka?

⁵ Se yo amulanga athu akuka kya mba akate akamba kusanguluka, o nguzu yâ itola. (Jisa. 24:10) Se o nguzu ya itola, ene kanda tena dingi kubhanga o ima ni henda kala kyamesenene. Ima yebhi itena kwa katula o kusanguluka kwâ?

6. Mukonda dyahi o yo amulanga muthu wakate mba wakuka kya atena kutohoka?

⁶ O yo amulanga muthu wakate mba wakuka kya, atena kutohoka. Sayi phange ya muhatu amwixana Liya wambe: “Né mwene kyoso o ima yamukwenda kyambote, mu ngoloxi ngitohoka, ngikala we ni njinda. Sayi bhabha, kungikamba katé mwene o nguzu ya kukwata o mutelembe phala kutambwijila o muthu wangitumikisa njimbu.” Akamukwa kene mutena kunyoha, mba kuzeka kyambote. Sayi phange amwixana Inés wambe: “Mu mausuku, ngene mubalumuka phala kulanga ukowami. Mu kiki, kyene mungibhonza o kuzeka. Eme ni mwadi wami nuka dingi twendele njila phala kunyoha.” Sayi athu katena kubhita ithangana yavulu ni makamba mâ, mukonda ene alanga muthu ithangana yoso. Mukonda dya kiki, atena kudivwa ubheka wâ ni kubanza kwila o myenyu yâ yanda kala ngo o kulanga akwa.

7. Mukonda dyahi o yo amulanga muthu, sayi ithangana atena kuditatela ni kuluwala?

⁷ O yo amulanga muthu, sayi ithangana atena kuditatela ni kuluwala. Sayi phange amwixana Jésika wambe: “Mu ithangana yavulu ngidivwa kwila kingamubhanga yoso i ngitena. Kyoso kingikatula kithangana phala kubhanga o ima yami, ngidivwa kala kingamusuwa dingi tat’etu wamukata.” Sayi yá abanza kwila kamubhanga yoso yatena phala kulanga o jindandu jâ. Amukwa hanji adivwa kwila kanda tena dingi kulanga o jindandu jâ, mukonda azwela kima kyayibha kya aluwalesa kyavulu. (Tiy. 3:2) Sayi athu aluwala kyavulu mu kumona kwila o uhaxi wa ndandu yâ, wamudibandekesa. Sayi phange ya muhatu amwixana Bárbara, wambe: “O kima kingiluwalesa dingi, o kumona kwila o jindolo ja muthu ngamuzolo kyavulu, jamuya ni kudibandekesa dingi.”

8. O athu amulanga yo akate, adivwa kyebhi kyoso kya asakidila?

⁸ Sayi athu alanga muthu wamukata, abanza kwila kala ni valolo. Mukonda dyahi? Mukonda kene mwasakidila mu yoso yene mubhanga. Kyoso kitusakidila muthu, mwene usanguluka. (1 Te. 5:18) Sayi phange ya muhatu, amwixana Melisa, wambe: “Ngadidi kya mukonda dya kutohoka. Maji ngisanguluka kyavulu kyoso o athu ngamwalanga, angambela exi: ‘Twakusakidila kyavulu mana, mu yoso i wene mubhanga phal’etu.’ O izwelu yiyi i ngibhangesa kukala dingi ni nguzu phala kwalanga.” Sayi phange amwixana Amadu, kumoxi ni muhatu wê amulanga mwebhu wâ wa muhatu, wala ni uhaxi wa kikonya. Manu Amadu ujimbulula se kyebhi kyene mudivwa kyoso o mwebhu wâ kyene mwasakidila mu yoso yene mubhanga phala mwene. Manu Amadu wambe: “O mwebhu wetu kejiya o nguzu i twene mubhanga phala kumulanga. Maji tusanguluka kyoso mwene kyatusakidila, mba kyoso mwene kyabhanga nguzu phala kusoneka o izwelu yiyi: ‘Ngamizolo kyavulu!’”

IHI I WATOKALA KUBHANGA PHALA KUSANGULUKA?

9. Kyebhi o muthu wamulanga mukwa wakate mba wakuka, kyatena kulondekesa kwila mwene muthu walenduka?

⁹ Kala u muthu walenduka. (Jisa. 11:2) Seku muthu wala ni nguzu ya kubhanga yoso yamesena. Mu kiki eye watokala kusola o ima i utena kubhanga. Sayi ithangana eye kwanda tena kubhanga o ima yamu kubhinga akwenu. Kiki kilondekesa kwila eye u muthu walenduka. Se mukwenu wandala ku kukwatekesa, xikina o kikwatekesu kyê. Sayi phange amwixana Jayi, wambe: “Se-ku muthu wala ni kithangana ni nguzu ya kubhanga yoso yamesena. O kiki ki kitukwatekesa kukala tu athu alenduka ni kusanguluka.”

10. Mukonda dyahi o yo amulanga muthu wakuka mba wakate, atokala kukala athu atetuluka? (Jisabhu 19:11)

¹⁰ Kala u muthu watetuluka. (Tanga Jisabhu 19:11.) O muthu watetuluka utena kubatama kyoso kya mukwatesa njinda. Ku mbandu yamukwa, mwene usota kutendela se mukonda dyahi, o mukwa wamutalatala kyayibha. Sayi mauhaxi atena kubhangesa o muthu kutalatala kyayibha akwa. (Ndo. 7:7) Mu kifika, o muthu wexile mu kutalatala kyambote, mukonda dya uhaxi mwene utena kudikwata mba kuzoka n’eye. Mwene utena kudikalanganza kyavulu mba kukala mukwa njinda. Mukiki se wamulanga muthu wala ni uhaxi wabhonzo, kima kyambote kudilonga yalungu ni uhaxi wala nawu mwene. Kyoso ki ubhanga kiki, wanda tena kutendela se mukonda dyahi o mukwenu wa mukutalatala mu ukexilu yu wayibha.—Jisa. 14:29.

11. O yo amulanga muthu wakate mba wakuka kya atokala kukatula kithangana phala kubhanga ihi? (Jisálamu 132:​4, 5)

¹¹ Katula kithangana phala kukolesa o ukamba wé ni Jihova. Sayi ithangana wanda bhinga kweha kubhanga ima yengi phala kubhanga “o ima yabetakota.” (Fil. 1:10) Mu ima yiyi, o kyabeta dingi kota o kukolesa o ukamba wé ni Jihova. Sobha Davidi wexile ni ikalakalu yavulu phala kubhanga, maji o kubheza Jihova kyexile o kima kyabeta dingi kota ku mwenyu wê. (Tanga Jisálamu 132:​4, 5.) Kyene we kimoxi neye, kima kyambote kukatula kithangana izuwa yoso phala kutanga o Bibidya ni kusamba. Sayi phange amwixana Eliza wambe: “Kyoso kingisamba ni kuxinganeka mu izwelu itusanga mu divulu dya Jisálamu, ngisanguluka. Phala eme o musambu kyene o kima kingi kwatekesa dingi. Kyoso kingi samba kyavulu mu kizuwa, ngitululuka.”

12. Mukonda dyahi yo ene mulanga muthu wakuka kya mba wamukata, atokala kudya kyambote, kutungutisa o mukutu ni kuzeka mu kithangana kyasoko?

¹² Katula kithangana phala kulanga o sawidi yé. O yo ene mulanga muthu wakuka kya mba wamukata, kwene mwabhonza kulanga o sawidi yâ. Kene mukala ni kithangana kya kusumba kudya kwambote ni kulamba o kudya kuku. Maji phala kukala ni sawidi yambote, watokala kudya kudya kwambote ni kutungutisa o mukutu. Mu kiki, né mwene se kiwale ni kithangana kyavulu, sota kudya kudya kwambote ni kutungutisa o mukutu wé semana joso. (Efe. 5:​15, 16) Sota kuzeka mukithangana kyasoko. (Ndo. 4:6) O akwa kutokwesa amba kwila o kuzeka mukithangana kyasoko kikwatekesa kyavulu o wongo wetu. Sayi milongi izwela yalungu ni sawidi yamba kwila kyoso o muthu kyazeka mukithangana kyasoko, mwene kakale ni hele yavulu, utululuka we kyoso kyadibhana ni ibhidi. Eye we wabhingi kukatula kithangana phala kutonoka. (Ndo. 8:15) Sayi phange ya muhatu wazwela se ihi yene mubhanga phala kusanguluka. Mwene wambe: “Kyoso o kuma kukya kyambote, ngitunda bhukanga phala kwota o mwanya. Lumoxi kumbeji ngikala ni kamba dyami phala tutonoke.”

13. Mukonda dyahi, kima kyambote kwolela? (Jisabhu 17:22)

¹³ Sota ima i kubhangesa kwolela. (Tanga Jisabhu 17:22; Ndo. 3:​1, 4) O kwolela kutubhangesa kudivwa kyambote. Kyoso ki ulanga muthu wakate mba wakuka kya, sayi ima kiyanda bhita kala ki wamesena. Maji se wolela mukonda dya ima yiyi, nange kiwanda luwala kyavulu. Kyoso ki wolela kumoxi ni muthu wamumulanga, mwanda dizola dingi.

14. Mukonda dyahi kima kyambote kudizwelesa ni kamba dyé?

¹⁴ Dizwelese ni kamba dyé. Né mwene se ubhanga nguzu phala kusanguluka, sayi ithangana eye wanda luwala. Mu ithangana yiyi, eye utena kutangela kwa kamba dyé kyebhi ki wamudivwa. O dikamba didi, watokala kukala muthu kanda kutobhesa mba ku kufundisa mukonda dya ibanzelu yé. O kubhanga kiki, kyanda kukwatekesa kyavulu. (Jisa. 17:17) Kyoso mwene kyanda kubhana matwi ni ku kuswinisa, eye wanda divwa kyambote.—Jisa. 12:25.

15. Ihi dingi itena kumisangulukisa?

¹⁵ Xinganeka kyebhi kyanda kala o mwenyu wenu mu Palayizu. Lembalala kwila eye kiwanda langa muthu wakate mba muthu wakuka kya katé ku hádya ni hádya, mukonda Jihova katubhange phala kubhanga o kikalakalu kiki. (2 Ko. 4:16-18) O “mwenyu wa kidi” twanda utambula ngo ku hádya. (1 Ti. 6:19) Kudizwelesa ni muthu wamumulanga yalungu ni ima i mwanda bhanga mu Palayizu, kwanda misangulukisa. (Iza. 33:24; 65:21) Sayi phange ya muhatu amwixana Hetere, wambe: “O athu ungene mulanga, ngene mwatangela o ima itwanda bhanga kumoxi mu Palayizu. Ima kala, o kutunga izwatu, kulenga kumoxi ni kwenda ni bixi. Twanda bhanga jimbolo ni kulambela o makamba metu ni jindandu jetu anda kwafukununa. Mu kusuka-ku, tusamba kumoxi, tusakidila Jihova mukonda dya kutubhana o kidyelelu kiki.”

KYEBHI O JIPHANGE KYATENA KUKWATEKESA?

16. Kyebhi kitutena kukwatekesa o jiphange amulanga muthu wakate mba wakuka kya? (Tala we ofoto.)

¹⁶ Kwatekesa o jiphange amulanga muthu wakate mba wakuka kya, kukala ni kithangana kya kunyoha. Se tubhanga kiki, ene anda kala ni kithangana phala kunyoha ni kubhanga ima yamesena. (Nga. 6:2) Sayi jiphange ene mudikunda ni kumona se kyebhi kyatena kukwatekesa o jiphange amulanga muthu wakate mba muthu wakuka kya. Phange amwixana Natálya, wamulanga mwadi wê katena kwenda, wambe: “Sayi phange mu kilunga kyetu, wene mukwiza kudibhata dyetu phala kukala ni mwadi wami lumoxi mba luyadi ku semana. Ene aboka kumoxi, adizwelesa, katé mwene atala jifilime. Mwadi wami usanguluka kyavulu mu ithangana yiyi. Kyoso o phange yú kyene mu kwiza kubhata dyetu, nginyoha, mba ngibhanga o ima i ngawabhela, kala kutunda bhofele.” Sayi athu katé mwene akala polondo phala kuzeka ni muthu wakate mba wakuka kya, kiki kikwatekesa o muthu wene mumulanga, kuzeka kyambote.

17. Mu yônge, kyebhi kitutena kukwatekesa yo amulanga muthu wakate mba wakuka kya?

¹⁷ Mu yônge, kwatekesa yo amulanga muthu wakate mba wakuka kya. O athu ene mulanga akwa, nange katena kukatula mbote mu yonge ya kilunga, mu yonge ya ilunga ni mu yonge ya makota. O jiphange atena kwakwatekesa mu kuxikama ku mbandu ya muthu wakate mba wakuka kya mu kyonge, mba kuxikama ku mbandu yâ, kyoso o muthu wene mwalanga kyamubhanga o mbandu yê mu kyonge. Se ene katena kutunda kubhata, o jiphange atena kuya-ku ni kutala o kyonge kumoxi ni ene, bhukaxi ka internete. Se tubhanga kiki, o muthu wene mwalanga utena kuya bhu kididi kya ubhezelu.

18. Ihi dingi i tutena kubhanga phala kukwatekesa o jiphange ene mulanga muthu wakate mba muthu wakuka kya?

¹⁸ Ximana o jiphange ene mulanga muthu wakate mba muthu wakuka, u atumbula mu misambu yé. O tufunga atokala kukunda o jiphange amulanga muthu wakate mba muthu wakuka kya. (Jisa. 27:23) Mu kidi, mu kithangana ni kithangana, o jiphange joso mu kilunga atokala kuximana yó ene mulanga muthu wakate mba wakuka kya. Tutena we kusamba phala Jihova nasuluke mu kwakwatekesa, phala ene atene kusanguluka.—2 Ko. 1:11.

19. Kwakambe ngo bhofele, ihi yanda bhanga Jihova?

¹⁹ Kwakambe ngo bhofele, Jihova wanda kondona o masoxi metu, kikwanda kala dingi ndolo. O mauhaxi ni kufwa kikwanda kala-ku dingi. (Dij. 21:​3, 4) O “inema ya kà tuka-tuka, kala jimbambi.” (Iza. 35:​5, 6) O ibhidi ijila mu kukuka ni jindolo jijila mukonda dya kulanga muthu wakate, kitwanda i banza dingi, “né ngó kwiza mu kilunji, lémbwa.” (Iza. 65:17) Kyoso kituya ni kukingila o kikumbidilu kya ikanenu yiyi, tutena kudyelela kwila Jihova nuka wanda tubwazeka. Se tusuluka mu kudyelela mu nguzu itubhana Jihova, mwene wanda tukwatekesa kukolokota “ni mwanyu ni kusanguluka.”—Kol. 1:11.