IBHWIDISU IBHANGA O MINZANGALA
O Bibidya Ingikwatekesa Kyebhi?—Mbandu ya 1: Tokwesa Kyambote o Bibidya yé
“Ngafikisa kya kutanga o Bibidya, maji ngikala ni woma mukonda o Bibidya divulu dya dikota!”—Briana, 15.
O eye we kyene ki udivwa? O milongi yiyi yandakukwatekesa!
Mukonda dyahi ngatokala kutanga o Bibidya?
O kwila o kutanga o Bibidya kima kya kuyibhila? Se kya kuyibhila, kwabhu tukitendela. Nange eye wamuxinganeka kwila o Bibidya divulu dyala ni jimidi ja mafwe, ki yale ni jifoto mukonda dya kiki kota kutala Televizá ni jividyu!
Maji xinganeka kiki: Se akubhele kaxa ya dikota ya jimbongo, maji kaxa yokulu-kulu, kweji mesena ku ijikula ni wijiye se ihi yala moxi dyê?
O Bibidya yadifu ni kaxa yiyi ya jimbongo. Mwala jimbongo javulu mba unjimu wandatena kukukwatekesa
Kubatula kyambote o maka
Kudibhana kyambote ni jitata jé
Kukala ni makamba ambote
Kudibhana ni hele
Kyebhi o divulu dyokulu didi ditena kutukwatekesa mu izuwa ya lelu? Kiki bhita mukonda “Mikanda yoso Ikôla yatundu kwa Nzambi.” (2 Timote 3:16) Kiki kilombolola kwila, o milongi ibhana o Bibidya yatundu ku Muthu wabeta kukala ni unjimu, athu oso mu ngongo ndenge.
Kala o kaxa ya jimbongo, mu Bibidya mwala unjimu wate kyavulu
Kyebhi kingatokala kutanga o Bibidya?
Ukexilu umoxi, o kutanga o Bibidya katé kudisukilu. Kiki kyandakukwatekesa kwijiya kifwa o njimbu yoso ya Bibidya. Kwene maukexilu avulu akutanga o Bibidya. Twandazwela maukexilu ayadi:
Mu Bibidya mwala 66 a madivulu. eye utena kutanga o madivulu yá kala kyosokejeke mu Bibidya. Tundé mu divulu dya Dimatekenu katé Dijingunwinu.
Utena kutanga o Bibidya mu kukayela o ithangana yabhiti o misoso—kiki kilombolola kutanga o misoso yoso sé kusomboka ku musoso wengi.
Ndunge: Mu Apendice A7 mu Bibidya Tradução do Novo Mundo mwala kikwatekesu kya izulukutu yabhiti ku mwenyu wa Jezú kyoso kyakexile mu ixi. Izulukutu yiyi yosokejeke kyambote mba cronológicamente.
Ukexilu wa kayadi wakutanga o Bibidya, o kusola musoso walungu ni kibhidi ki wamudibhana na-kyu. Mu kifika:
Wamesena kukala ni makamba a kidi? Tanga o musoso wa Jonatá ni Davidi. (1 Samuwele kibatulu 18-20) mu suluka kwata o kamukanda “Como encontrar amigos leais” phala kudilonga o madisá utukatula ku musoso yú.
Wamesena kukala ni nguzu phala kudituna o jitendasá? Tanga o musoso walungu ni kyebhi Zuze kyatena kudituna o tendasá. (Dimatekenu kibatulu 39) Mu suluka kwata o kamukanda “Como resistir à tentação . . . José—Parte 1” ni “Acusado injustamente! José—Parte 2” phala kudilonga o madisá utukatula ku musoso yú.
Wamesena kwijiya kyebhi o kusamba kutena kukukwatekesa? Tanga o musoso wa Nehemiya. (Nehemiya kibatulu 2) Mu suluka kwata o kamukanda “Deus respondeu sua oração” phala kudilonga o madisá utukatula ku musoso yú.
Ndunge: Kyoso ki utanga o Bibidya, sola kididi kya tululuka, kididi kyanda kukwatekesa kuta ngo o muxima mu yoso iwamutanga.
O ukexilu wa katatu wa kutanga o Bibidya walungu ni kusola musoso wosowoso mba Sálamu, tanga-yu mu kusuluka, xinganeka kyebhi o musoso yú mba Sálamu yakutokala eye. Kyoso kiwandatanga, dibhange ibhwidisu kala yiyi:
Mukonda dyahi Jihova wate o musoso yú mu Bibidya?
O musoso yú ulondekesa ihi yalungu ni idifwa ya Jihova mba ukexilu wê wa kubhanga o ima?
Kyebhi kingitena kukumbidila o milongi yiyi ku mwenyu wami?
Ndunge: Kwata o Bibidya ya kudilonga ya Tradução do Novo Mundo phala kutala o jividyu, jimapa, ni ikwatekesu yamukwa yandakubhangesa kukatula mbote yavulu kyoso kiwandatanga o Bibidya.