Ku Bandekesa o Uhete mu Ukunji Uetu—Kiebhi ki tu Tambuijila o Athu a tu Batula Kioso ki tu Zuela

Mukonda Diahi Kima Kiambote ku Bhanga Kiki: Xinganeka, se uejiia kuila kua-nda bhita divuua. O athu a-nda kufua, se ka lenge bhu kididi kia kondama. Eie uia ku bhata dia vizinhu iê, phala ku mu dimuna, maji muéne ka ku bhana mátui, u ku tangela kuila uala ni ima iavulu phala ku bhanga. Sé phata, eie ueji bhanga ioso phala ku mu kuatekesa! Athu avulu mu mbambe ietu ala mua vundu, kejiia kuila o njimbu i tu boka i tena kua bhulula. Kioso ki tu a kunda ene a thandanganha ni ima iavulu. (Mat. 24:37-39) Nange evu athu ku zuela ima iavulu ia iibha ia lungu ni jimbangi ja Jihova. (Mat. 11:18, 19) Nange a zuela kuila, etu tua soko ni athu a tokala ku ji ngeleja, ene mu bhanga ima ia iibha. (2 Phe. 2:1, 2) Se o mukuá dibhata, ka mesena ku tu bhana mátui, ki tu tokala ku bhuila.

Kiebhi ki tu Tena ku Bhanga Kiki:

Ande dia kuia mu boka nzo ni inzo, xinganeka hanji bhofele o ima iene mu kuibhula o athu mu ukunji phala ku tu batula kioso ki tu zuela, ni ku tonginina kiebhi ki tu tena ku tambuijila.
Se o mukua dibhata uibhula kima, mu tambuijile ni ngalasa ioso. Kima kiambote ku mu ximana. Mu kifika, se u ku tangela kuila uala kia ni ngeleja iê, u mu ambela: “ngi sanguluka kiavulu kioso ki ngi sanga muthu ua uabhela ku zuela ia lungu ni Bibidia.” O ku xila o ibanzelu ni kithangana kia mukua dibhata, kia-nda ku kuatekesa ku bhana umbangi. Mu kifika, se muene u zuela kuila kala ni kithangana, tu tena ku zuela: “Kima kiambote. Maji nga mesena ku ku bhana kima ande dia kuia.” Mba u tena ku bhanga kibhuidisu ku mukua dibhata. U tena ku mu ibhula, “Eie ki ua mesena kuívua o njimbu ia Bibidia inga ki ua mesena ku zuela n’etu?”
Xinganeka kiambote. Lembalala kuila, Jihova kene mu jijidika muthu phala ku mu bheza. (Mate. 30:19) Muthu ni muthu muéne ua tokala ku sola. (Nga. 6:5) Se o mukuá dibhata ka mesena ku tuívua, kima kiambote ku xisa o dibhata. Mu ku xila o ibanzelu iê, nange ku pholo dia kuenda, muéne u tena ku xikina, kioso o muboki uéngi u mu bhana umbangi.—1 Phe. 3:15.

Fikisa o Ndunge Íii mu Mbeji Íii:

Se u sanga athu a ku batula kioso ki u zuela, kioso ki u xisa o mukuá dibhata, tangela ku muboki ua mu kalakala nê, se kiebhi ki uene mu tambuijila kiambote o athu a ku batula kioso ki u zuela.