Kuatekesa o Athu Kuívua Nzambi
1. Tu madivulu tua-hi tu tua tambula mu Kiônge kia Dikota o “Utuminu ua Nzambi uíze!”, ni ihi i a bhangesa ku kala jifalamenda ja mbote?
1 Mu Kiônge kia Dikota “Utuminu ua Nzambi uíze!” Tua tambula Tu madivulu tu iadi tua ubhe tuambe, Ívua Nzambi ni u kale ku Muenhu ni ka mukua ka bhebhuluka Ívua Nzambi. Mukonda ki tuala ni maba avulu, ki ji bhonzo ku ji lungulula. Mu kidi, o ka divulu Ívua Nzambi ni u kale ku Muenhu a xikina phala ku ka lungulula mu 431 a mazui.
2. A nanhi a-nda katula mbote mu tu madivulu tutu?
2 A nanhi dingi a-nda katula mbote mu tu madivulu tutu? Xinganeka mu ima iene mu bhita mu jixi joso:
• Kioso mu veji ia dianga mba ia kaiadi, o muboki u tonginina kuma, o mukua dibhata kejiia ku tanga kiambote.
• Kioso o muboki kia bokela athu a zuela o dimi ki diala hanji ni madivulu a soko, mba kioso o athu ka tena ku tanga mu dimi diâ dia uvualukilu.
• Kioso o muboki u bokela o athu afú o mátui bhu kaxi ka ijimbuete.
• Kioso o tata kia mesena ku longa o kidi ku tuana a kambe kuijiia ku tanga.
3. Kiebhi kia bhange o kadivulu Ívua Nzambi?
3 Kiebhi Kia a Bhange: O kadivulu Ívua Nzambi, a ka bhange ni izuelu ia butu, iala ngó ni maba ofele ni kibatulu kia Bibidia ku luiji ki lombolola o jipondo ja beta kota. Mukonda diahi? Xinganeka kuma, a ku bhana kadivulu ko soneke mu dimi di ua kambe kuijiia ku tanga. Ueji kala ni vondadi ia ku ka tanga, sumbala kala ni ifikula ia iuka? Nange kana. Kiene uê kimoxi ni athu a lembua ku tanga, mu kithangana kiofele ene a tena ku divua kia iibha kioso kia tala madivulu ala ni isoneku iavulu. Mu kiki, mu jimbandu joso muala ifikula ia iuka kiambote ni ilondekesu i kuendesa mu fikula ia kaiela-ku.
4. Kiebhi kia bhange o ka divulu Ívua Nzambi ni u kale ku Muenhu?
4 O ifikula iala mu kadivulu Ívua Nzambi ni u kale ku Muenhu iene uê i tu sanga mu kadivulu Ívua Nzambi. A ka bhange phala oso ka mu tanga kiambote ni a mu di longa o ku tanga. O mulongexi u tena ku kala ni kadivulu kaka, kioso kiaia ni ku longa o dixibulu mu kadivulu Ívua Nzambi. Kala disá dia mbandu jiiadi, ku thunda dia dífue ku mbandu ia kiasu kuala kibhuidisu kio tambuijile. Kumoxi ni ifikula, kuala tu maba ni kibatu kia Mikanda Ikola. Ku hota dia jimbandu javulu, kuala kaxa iala ni jipondo jo bandekese ni ibatulu ia Mikanda Ikola phala ku zuela ni dixibulu.
5. Kithangana kuxi ni kiebhi ki tua-nda bhana o tu madivulu tutu?
5 Tu Kalakala Kiebhi ni tu Madivulu Tutu: U tena ku bhana o tu madivulu tutu mu ku boka inzo ni nzo mu veji joso kioso ki u mona kuila ua tokala kua bhana, né muene se kene o madivulu phala kua bhana ku mbeji. (Tala mu kaxa “Kiebhi Kia Tokala Kua Bhana.”) Mu ku vutuka dingi ku dixibulu, u tena ku zuela kuila uala ni kima phala ku mu londekesa, mu ku suluka u mu bhana o kadivulu.
6. Kiebhi ki tua-nda di longa ni maxibulu mu tu madivulu tutu?
6 Mukonda dia kuila o kadivulu Ívua Nzambi, ki kala ni ibhuidisu, mu ku di longa ni maxibulu, kua-nda bhanga ibhuidisu ni itambuijilu kala ki tuene mu bhanga ni divulu Bibidia i Longa. Mu jixi joso athu a uabhela kuívua misoso. Mu kiki, kalakala ni ifikula phala ku longa o misoso iala mu Bibidia. Lombolola ioso iala mu ifikula. Tongolola kiambote o misoso. Bhinga ku dixibulu phala n’a ku tangele ihi ia mu mona ni ku banza mu ifikula. Tanga o ibatulu iala ku luiji ni ku xinganeka nê bhu kaxi ka izuelu ia ibatulu íii. Bhanga ibhuidisu i mu bhangesa ku zuela ni ku tonginina se muene ua mu tendela kiambote. Se muene uala ni kadivulu Ívua Nzambi ni u kale ku Muenhu, tangenu kumoxi o diba dia tokala ni kibatulu kia Bibidia kioso ki múia ni ku di longa o ifikula ioso.
7. Kiebhi ki tu tena ku kuatekesa o dixibulu dietu ku kula dingi mu nzumbi?
7 Kuatekesa o Dixibulu ku Kula mu Nzumbi: Tua mesena kuma, o ukexilu uê ua ku longa, u bhangesa o dixibulu diê ku kala ni vondadi ia ku di longa o ku tanga phala n’a tene kuijiia o kidi mu ubheka uê (Mat. 5:3; Nzuá 17:3) Mu kiki, se ua mu longa mu kadivulu Ívua Nzambi, mu ku bhita kithangana u tena ku di bhakula phala ku mu longa ku tanga, mu ku suluka nange mu tena ku di longa kiá mu kadivulu Ívua Nzambi ni u kale ku Muenhu. Né muene se o dixibulu u di longa kiá o tu madivulu tutu, muene kale hanji polondo phala ku mu batizala. Phala ku mu batizala, eie ua tokala hanji ku di longa nê o divulu Bibidia i Longa, phala ku kala ni kuijiia kua soko kua Bibidia.
8. Mukonda diahi tua sanguluka ni jifalamenda jiji phala o sidivisu ietu ia ku boka?
8 O athu a tokala kuívua Ngana Jihova Suke-ku, phala n’a kale ni muenhu ua kalelaku. (Iza. 55:3) Jihova ua mesena kuila, “athu oso” né muene oso kejiia ku tanga, a dilonge kiebhi kia tena kuívua Nzambi. (1Tim. 2:3, 4) Tua sanguluka kiavulu ni jifalamenda jiiadi jiji, ja-nda tu kuatekesa ku longa athu kuívua Nzambi
[Kidikisu ku mbandu 3]
Kiebhi Kia Tokala Kua Bhana
Londekesa ku mukua dibhata o mbandu ia 2-3, mu ku suluka zuela kiki: “Ua mesena ku tunga mu ixi kala íii? [Ehela n’a tambuijile.] O Mikanda Ikola i kanena kuma, ku hádia Nzambi ua-nda bhangesa o ixi ku kala kididi kia uabha ni kia ku tululuka. Ki kua-nda kala dingi uadiama mba mauhaxi. Tala ihi i tua tokala ku bhanga phala ku kala-mu [Tanga Izaia 55:3, diala ku thunda dia dífue 3] O divulu didi di tu tangela phala ‘kuíza’ kua Nzambi ni ku ‘muivua.’ Maji kiebhi ki tuívua Nzambi?” Jikula ku mbandu ia 4-5 ni ku di longa nê o ki tambuijilu. Se muene kale ni kithangana, mu bhane o kadivulu ni ku sota kithangana phala ku vutuka ni mu di longe o kitambuijilu.