5 Хәбәрдана Тʹәви Һәв

ӘВ ЧЬ ТЕ ҺʹӘСАБЕ

Хәбәрдана вәкьри у бь дьл, һьнге пешда те чахе тӧ у зарʹед тә тʹәвайи фькьр у һәстед хwә һәврʹа вәдькьн.

ЧЬМА ФӘРЗ Ә

Хәбәрдана тʹәви щаһьла дькарә гәләк чәтьн бә. Кʹьтеба «Brеaking thе Codе» ӧса дьбежә: «Һьнәк пешда дьле зарʹед wә, бона wә һе вәкьри бу. Ле ньһа әв дадайи йә. Һун чьqас жи дәри хьн, әw йәкә вәнакә». Дькарә ӧса бе кʹьфше, кӧ зарʹ нахwазә wәрʹа хәбәр дә, ле бь рʹасти wи wәʹдәйида фәрз ә тʹәви wан хәбәр дьн!

ТӦ ЧЬ ДЬКАРИ БЬКИ

Һазьр бә зарʹа хwәрʹа хәбәр ди. Һьнге жи һазьр бә зарʹа хwәрʹа хәбәр ди, һәрге ниве шәwебә жи.

Лизи дьбежә: «Дьбәк тӧ ӧса дьфькьри, ‹Тӧ тʹәзә дьхwази мьнрʹа хәбәрди? Тʹәмамийа рʹоже әз бәр тә бум!›» Паше әм гәрәке нәкьнә кӧтә-кӧт сәр зарʹед хwә, гава әwана дьхwазьн мәрʹа хәбәр дьн, ле әм гӧһ надьнә wан. Һәмьки һәркәс һьзрәт ә, кӧ зарʹ дьле хwә wанарʹа вәкә».

Алберт дьбежә: «Һәла һьнге жи гава мьн гәләк дьхwәст рʹазама, ниве шәве жи әз рʹадьбум у мьн тʹәви зарʹед хwә хәбәр дьда, чахе wана дьхwәст. Бь рʹасти бежьм хәбәрдана мә гәләк вәкьри бу».

ПРИНСИПА КʹЬТЕБА ПИРОЗ: «Нәбә кӧ йәк кʹара хwә бьгәрʹә, ле йа һәвале хwә» (1 Корьнтʹи 10:24).

Дьлтәнг нәбә: Бавәк дьбежә: «Щарʹа әз тедәрдьхьм кӧ гава зарʹа мьн тʹәви мьн хәбәр дьдә, фькьре мьн дьчьнә щики дьн. Зарʹарʹа ӧса те кʹьфше, кӧ әз гӧһ надьмә wан у дәрһәqа тьштед дьн дьфькьрьм».

Һәрге телевизийон йан һащәтед електроник дина тә дәрбази тьштәки дьн дькьн, wе баш бә кӧ весини. Бьра дина тә педа сәр wе йәке бә, кӧ чь зарʹа тә дьбежә у һәрге ӧса те кʹьфше кӧ әw дәрһәqа тьштед бьчʹук хәбәр дьдә, йәкә рʹьнд гӧһе хwә бьдә сәр.

Миранда дьбежә: «Әм гәрәке зарʹед хwә бьдьнә баwәркьрьне, кӧ һәстед wан бона мә фәрз ьн. Һәрге әwана бьфькьрьн кӧ һәстед wан бона мә нә фәрз ьн, әwана wе дьле хwә мәрʹа вәнәкьн».

Антони дьбежә: «Һерс нәкʹәвә, һәрге зарʹа тә нәрʹаст дьфькьрә».

ПРИНСИПА КʹЬТЕБА ПИРОЗ: «Сәр wан тьштед кӧ һун дьбьһен бьфькьрьн» (Луqа 8:18).

Мәщале бьгәрʹә зарʹарʹа хәбәр ди. Щарна зарʹ һеса дьле хwә де-баве хwәрʹа вәдькьн чахе әwана чʹәʹве wан наньһерʹьн.

Никол дьбежә: «Әм дькарьн шеwьркьрьна тʹәви зарʹа бәрамбәри ажотьна авте бькьн. Әм тʹәвайи авте дажон у әм һьмбәри һәв насәкьньн, ле әм кʹеләка һәв ьн».

Wәʹде хwарьне мәщаләкә баш чедьбә кӧ һәврʹа хәбәр дьн.

Робин дьбежә: «Wәʹде хwарьне әм жь һәв педьһʹәсьн, кӧ чь тьштед баш йан хьраб wе рʹожеда qәwьми. Бь wе йәке әм дьбьнә йәк у һәврʹа дьдьнә кʹьфше, кӧ wәʹде чәтьнайа әме пьштгьрийа һәв бькьн».

ПРИНСИПА КʹЬТЕБА ПИРОЗ: «Хәбәрдан у һерскʹәтьнеда гьран бә» (Аqуб 1:19).