ДЬНЙА ҺʹАЛӘКИ ГЬРАНДА НӘ

1 | Сьһʹәт-Ԛәԝате Хԝәй кьн

ЧЬМА ӘВ ЙӘК ФӘРЗ Ә

Кризис йан жи ԛәзи дькарә хьраб һʹӧкӧм бә сәр сьһʹәт-ԛәԝата мәрьва.

Кӧл-дәрд мәрьва дькьнә стресе у жь бо стреса кӧ дьреж дькʹьшинә, мәрьв ԛьдум дькʹәвә.
Кризис, тʹәшԛәлед тʹәбийәте у чәтьнайед дьн дькарьн хьраб сәр медисинайе һʹӧкӧм бьн у нәхԝәшханада дькарә бона гәләк нәхԝәша щи у дәрман тʹӧнә бьн.
Жь бо чәтьнайа мәрьварʹа дькарә зор бә пʹәра дәстхьн сәва кӧ тьштед лазьм ԛазанщ кьн, мәсәлә хԝарьн у дәрмана.

Тӧ Чь Гәрәке Бьзаньби

Нәхԝәшийа гьран у стрес дькарә сәр һʹьш-аԛьле тә һʹӧкӧм бә, жь бо чь жи тәрʹа дькарә чәтьн бә сафикьрьнед рʹаст бьки. Ахьрийеда дьԛәԝьмә тӧ һе зедә нәхԝәш кʹәви.
Һәрге тӧ дина хԝә нади нәхԝәшийед хԝә у хԝә ԛәнщ наки, әв йәк дькарә һʹале тә дьһа хьраб кә у һәла һе әʹмьре тә жи бькә бьн ԛәзийе.
Чьԛас тӧ сьһʹәт-ԛәԝат би, һаԛас һе баш тӧйе бона чәтьнайа һазьр би у бькарьби сафикьрьнед рʹаст бьки.
Фьрԛи тʹӧнә чьԛас дәсте тәда һәйә, йәкә тӧ дькари тьштәки бьки, ԝәки мьԛати сьһʹәт-ԛәԝата хԝә би.

Тӧ Чь Дькари Ньһада Бьки

Мәрьве сәрԝахт пешда хофийе дьвинә у тьштәки дькә кӧ хԝә хԝәй кә. Әве йәке әм дькарьн дәрһәԛа сьһʹәт-ԛәԝате жи бежьн. Тӧ дькари бь сайа хԝәйкьрьна тʹәмьзайе, хԝә жь нәхԝәшийа хԝәй ки. Дьһа баш ә пешда пәй сьһʹәта хԝә бьньһерʹи, нә кӧ сәре хԝә бешини у һʹәԝще дәрмана би.

«Чахе әм бәдәна хԝә у мала хԝә тʹәмьз хԝәй дькьн, ида әм һаԛас пʹәред хԝә сәр дәрман у дохдьра хәрщ накьн» (Андреас).a

a Һьнә нав ве журналеда һатьнә гӧһастьне.

ЧА ԚӘԜАТЕ БЬСТИНЬН—Ширәтед Керһати

Сәва кӧ ԝәʹде чәтьнайа сьһʹәт-ԛәԝата хԝә хԝәй кьн, ван ширәта һьлдьн һʹәсаб

ТʹӘМЗАЙЕ ХԜӘЙ КЬН

Тʹәмьзайе хԝәй кьн

Кʹьтеба Пироз дьбежә: «Йе аԛьл хьрабийе кӧ дьбинә һʹәвза хԝә дькә» (Мәтʹәлок 22:3). Бьхәбьтә кӧ тедәрхи чь дькарә зийане бьдә сьһʹәт-ԛәԝата тә у жь ве йәке хԝә дур бьгьрә.

Гәләк щар пе сабуне у аве дәсте хԝә бьшо, илаһи пешийа кӧ дәсте хԝә бьди хԝарьне у паши дәставе.
Тʹьме мала хԝә тʹәмьз кә у дезинфексийа бькә, илаһи ԝан тьшта, кʹижана гәләк щар дәсте хԝә дьдьне.
Чьԛас тә те, хԝә дур бьгьрә жь ԝан мәрийа, нәхԝәшийа кʹижана дькарә дәрбази сәр тә бә.

ХԜӘРЬНА КЕРҺАТИ БЬХԜЬН

Хԝәрьна керһати бьхԝьн

Кʹьтеба Пироз дьбежә: «Бәдәна тʹӧ кәси бәр чʹәʹве ԝи нә рʹәш ә, ле ԝе тʹер дькә у хԝәй дькә» (Әфәси 5:29). Әм бь ԝе йәке нишан дькьн кӧ бәдәна хԝә һʹьз дькьн, гава әм хԝарьн у вәхԝарьнеда фәсал ьн.

Епʹещә ав вәхԝә.
Щурʹә-щурʹә емиш у пʹьнщарʹа бьхԝә.
Тьштед рʹуни, шорʹ у ширьн кем бьхԝә.
Тʹьтʹун у наркотике нәдә хәбате, нә жи зәʹф ичʹке вәхԝә.

«Сәва кӧ нәхԝәш нәкʹәвьн, әм гәрәке хԝарьна керһати бьхԝьн; һәрге әм ӧса нәкьн, әме мәщбур бьн пʹәре хԝә кӧ ӧса жи һьндьк ә, сәр дохдьра у дәрмана хәрщ кьн. Мә сафи кьрийә, ԝәки пʹәре хԝә сәр хԝарьна керһати хәрщ кьн» (Карлос).

СПОРТЕВА МЬЖУЛ БЬН У ҺЕСА БЬН

Спортева мьжул бьн

Кʹьтеба Пироз дьбежә: «Мьста тʹьжә йа бь рʹьһʹәти, жь кʹӧлма тʹьжә йа бь зәһмәти у кʹәтьна пәй байе четьр ә» (Ԝаиз 4:6, ИМ). Һәмьки әм гәрәке бьхәбьтьн, ле әм ӧса жи гәрәке һеса бьн.

Спортева мьжул бә. Тӧ дькари бь ԝе йәке дәстпеки, кӧ һәр рʹож һәма һʹәвәки рʹе һәрʹи. Һәрге тӧ әʹмьрда мәзьн и, бесьһʹәт и йан жи нәхԝәшийа тәйә хроники һәйә, спорт дькарә сьһʹәт-ԛәԝата тә баш кә.
Һеса бьн

Епʹещә һеса бә. Щурʹәки дьн бежьн, һәрге тӧ хәԝа хԝә нәстини, стреса тә дькарә зедә бә у тәрʹа чәтьн бә дина хԝә бьди сәр тьштәки. Ԝәʹдә шунда жи әв йәк ԝе проблемед дьһа гьран пешда бинә, йед сьһʹәт-ԛәԝатева гьредайи.
Сафи кә, кӧ тӧ сьһʹәта чәнда рʹазейи у сафикьрьна хԝә нәтʹәрʹьбинә. Бьхәбьтә кӧ һәр рʹож ԝәʹдәда рʹазейи у рʹаби.
Чахе тӧ нав щийада ни, телевизийоне нәньһерʹә у һащәтед әләктроник жи нәдә хәбате.
Пешийа рʹазане хԝарьна гьран нәхԝә, тьштед бь кофейине у ичʹке вәнәхԝә.

«Мьн тедәрхьст ԝәки хәԝа мьн һʹәму алийава сәр сьһʹәт-ԛәԝата мьн һʹӧкӧм дьбә. Чахе әз хәԝа хԝә настиньм, сәре мьн у бәдәна мьн дешә. Ле чахе әз рʹьнд хәԝа хԝә дьстиньм, һьнге әз хԝә ӧса баш тʹәхмин дькьм кӧ һазьр ьм чʹийа жи ԝәлгәрʹиньм! Ԛәԝата мьн щида нә у әз зу нәхԝәш накʹәвьм» (Щастин).