ДЬНЙА ҺʹАЛӘКИ ГЬРАНДА НӘ

4 | Һевийа Хԝә Хԝәй кьн

ЧЬМА ӘВ ЙӘК ФӘРЗ Ә

Ԛәԝьмандьнед кӧ дьнйайеда дьԛәԝьмьн, хәмгинийа мәрийа зедә дькьн у әв йәк алийе физики у емосийалида сәр ԝан һʹӧкӧм дьбә. Жь бо ве йәке гәләк мәрьв һәла һе һевийа хԝә жи ӧнда дькьн. Ле әв һʹәму тьшт сәр тә чаԝа һʹӧкӧм дьбә?

Һьнә мәрьв һәла һе жи нахԝазьн дәрһәԛа ахьрийе бьфькьрьн.
Һьнә мәрьв жи ичʹке у наркотикайе дьдьнә хәбате, сәва кӧ хәмгин нәбьн.
Һьнәк жи дьфькьрьн, ԝәки мьрьн жь һʹале ԝан четьр ә у дьхԝазьн хԝә бькӧжьн.

Тӧ Чь Гәрәке Бьзаньби

Һьнә проблемед тә дьбә кӧ ԝәʹдәлу бьн йан жи дьбәкә ньшкева дәрәща тә алийе башда бе гӧһастьне.
Һәрге жи дәрәща тә найе гӧһастьне, тӧ дькари һьнә тьшт бьки, чь кӧ ԝе али тә бькьн, ԝәки тәйах ки.
Кʹьтеба Пироз һевийе дьдә, кӧ ԝе проблемед инсанәте кʹӧта бьн.

Тӧ Чь Дькари Ньһада Бьки

Кʹьтеба Пироз дьбежә: «Бона рʹожа сьбе хәма нәкьн, чьмки рʹожа сьбе ԝе бона хԝә хәма бькә. Хәмед рʹоже бәси ԝе нә» (Мәтта 6:34).

Бона рʹожа сьбе хәм нәкьн. Нәһелә ԝәки хәмед тәйә бона рʹожа сьбе, тә ӧса дьлтәнг кьн, кӧ нькарьби шьхӧлед иро бьки.

Хәмгинийа дәрһәԛа ԝе йәке, кӧ дьбәкә тьштед хьраб бьԛәԝьмьн, ԝе тʹәне стресе тәрʹа зедә кьн у һевийа тә сәр ахьрийе сьст кьн.

ЧА ԚӘԜАТЕ БЬСТИНЬН—Ширәтед Керһати

ДИНА ХԜӘ БЬДӘ СӘР ТЬШТЕД ПОЗИТИВ

Кʹьтеба Пироз дьбежә: «Хԝәйе дьле кӧл һәр рʹож шинеда йә, ле хԝәйе дьле ша һәр тʹьм шайеда йә» (Мәтʹәлок 15:15). Һәрге тӧ бона проблеме зәʹф хәмгин би, тӧйе нькарьби тедәрхи ча сафи ки. Ле һәрге ньһерʹандьна тә позитив бә, тӧйе мәщаләке бьвини кӧ проблеме сафи ки.

Дәнг-бәʹса зәʹф нәньһерʹә.
Хьлазийа һәр рʹоже, бьфькьрә дәрһәԛа тьштәк йан дӧ тьштед ӧса, сәва чь жи тӧ дькари шекьрдар би.
Хԝәрʹа графика рʹоже бьньвисә. Шьхӧлед мәзьн пʹарәвәкә сәр йед бьчʹук, сәва кӧ хьлазийа рʹоже кʹәда дәсте хԝә бьвини.

АЛИКʹАРИЙЕ БЬХԜАЗӘ

Кʹьтеба Пироз дьбежә, ԝәки мәрьве кӧ хԝә жь кәсед дьн дур дьгьрә, «мьԛабьли һәр шеԝьр у ԛьраре йә» (Мәтʹәлок 18:1). Тӧ нькари хԝәха бь хԝә жь чʹәʹла кʹур дәркʹәви, ле бь аликʹарийа һәвала тӧйе бькарьби сәрфьраз би.

Жь нәфәред мале у жь һәвала аликʹарийе бьхԝазә.
Ӧса жи, бьфькьрә ԝәки ча тӧ дькари али ԝан бьки. Чахе тӧ аликʹарийе дьди кәсед дьн, әв йәк али тә дькә ԝәки һьндава проблемед хԝәда ньһерʹандьна рʹаст хԝәйи ки.
Һәрге тә һеви у нета жийине ӧнда кьрийә, ԝе баш бә кӧ аликʹарийе жь һʹәкима бьхԝази. Щарна һәстед ԝи щурʹәйи нишана ԝе йәке нә кӧ депресийа тә һәйә у тӧ ԛьдум кʹәти. Медисинайе али гәләк мәрьвед ӧса кьрийә, кʹижан кӧ ԝи һʹалида бунә.a

a Журнала «Һʹьшйар Бьн!» пьштгьрийа тʹӧ методәкә ԛәнщкьрьне накә.

Кʹьтеба Пироз Һевийа Рʹаст Дьдә

Зәбурбежәки дӧайе хԝәда Хԝәдерʹа ӧса гот: «Хәбәра Тә чʹьра гавед мьн ә у рʹонайа шьвәрʹийед мьн ә» (Зәбур 119:105). Ԝәрен әм бьньһерʹьн, кӧ чь щурʹәйи Хәбәра Хԝәде дькарә мина чʹьрайе бә.

Чахе тәʹри йә, чʹьра али мә дькә, ԝәки бьзаньбьн гавед хԝә ча бавежьн. Анәгори ԝе йәке, Хәбәра Хԝәдеда биланийа керһати һәйә, кʹижан кӧ дькарә рʹебәрийе мә бькә, гава әм гәрәке сафикьрьнәкә нәһеса бькьн.

Чʹьра дькарә рʹийа мә ӧса зәлал кә, кӧ әм бькарьбьн пешийа хԝә бьвиньн. Кʹьтеба Пироз жи мәрʹа зәлал дькә, кӧ ахьрийа чьԛас баш һивийа мә йә.

Хәбәра Хԝәде кʹьтебәкә пироз ә, кʹижан кӧ нә тʹәне дәрһәԛа тʹәрихийа инсанәте жь дәстпеке гьли дькә, ле ӧса жи һевийа бона ахьрийа баш дьдә мә. Әԝ щаба ԝан пьрса дьдә:

Ча?

Ча кӧл-дәрд пешда һатьн: Кʹьтеба Пироз дьбежә, ԝәки «чаԝа бь мәрьвәки гӧнә кʹәтә дьне у жь гӧнә жи мьрьн һат, ӧса жи мьрьн сәр һʹәму мәрьва бәла бу, чьмки һʹәмуйа жи гӧнә кьр» (Рʹомайи 5:12).

Чьрʹа?

Чьрʹа сәрԝертийа мәрьва нькарә проблемед мә сафи кә: Кʹьтеба Пироз дьбежә, ԝәки «гавед хԝә рʹасткьрьн, нә дь дәсте мьрове кӧ дьмәшәда йә» (Йерәмйа 10:23). Һʹале ве дьнйайе избат дькә, ԝәки готьна ве рʹезе рʹаст ә.

Чь?

Хԝәде ԝе чь бькә, кӧ проблемед инсанәте сафи кә: Кʹьтеба Пироз дьдә кʹьфше, ԝәки Хԝәде ԝе «жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук» (Әʹйанти 21:4).