Сәрһати 3

Мәрийед Пешьн

ҺӘЛА дина хԝә бьдә, чь ль сәр ви шькьли зедә буйә. Рʹаст ә, мәри зедә бунә. Әԝана мер у жьне пешьн ьн. Ле кʹи ԝана чекьр? Хԝәде. Ле тӧ наве Хԝәде зани? Наве ԝи Йаһоԝа йә. Наве мер у жьне пешьн жи Адәм у Һеԝа бу.

Гәло Йаһоԝа Адәм ча чекьр? Пешийе Хԝәде тʹоза әʹрде һьлда у бәдәна ԛәданди чекьр. Паше Йаһоԝа жийин пʹьфи позе ԝи кьр у Адәм дәстпекьр бьжи.

Йаһоԝа шьхӧләк да Адәм. Әԝи готә ԝи, кӧ һʹәму щурʹә һʹәйԝанарʹа нав бьдә. Адәм гәләк ԝәхт дина хԝә дьда һʹәйԝана у ләма жи әԝи һәр жь ԝанрʹа навәки гәлә баш да. Зани чахе Адәм наве һʹәйԝана дьда әԝи чь те дәрхьст?

Һʹәму һʹәйԝан бь щот бун. Дь бахчеда ча филе бав, ӧса жи филе де һәбу у ча шере бав, ӧса жи шере де һәбу. Ле Адәм тьк-тʹәне бу. Гәло Йаһоԝа ньһа ԝе чь бькә? Пешийе әԝи бь хәԝа гьран Адәм рʹазаньд у пʹарханәк жь ԝи дәрхьст. Паше пе ве пʹархане жьнәк сәва Адәм чекьр у әԝ бу жьна ԝи.

Дә бьдә һʹәсаве хԝә Адәм чьԛас ша дьбу! Ле Һеԝа чьԛас ша дьбу, кӧ әԝ гәрәке дь ве бахче бәдәԝда бьжита! Ида әԝана жи дькарьбун зарʹа биньн у тʹәвайи дь бәхтәԝарийеда бьжин.

Йаһоԝа дьхԝәст, кӧ әԝана һʹәта-һʹәтайе бьжин. Нета ԝи әԝ бу, кӧ әԝана тʹәмамийа әʹрде мина бахче Адән бәдәԝ кьн. Бьдьн һʹәсаве хԝә, Адәм у Һеԝа чьԛас ша дьбун чахе дәрһәԛа ви шьхӧли дьфькьрин! Тәйе бьхԝәста дь бахче ӧса бәдәԝда ль сәр әʹрде бьжита? Ле шабуна ԝана гәлә ԝәхт дьреж нәбу. Ԝәрә әм пебьһʹәсьн чьрʹа.

Зәбур 83:18; Дәстпебун 1:26-31; 2:7-25.