Сәрһати 4

Чьра Адәм У Һеԝа Мала Хԝә Ӧнда Кьрьн

ҺӘЛА бьньһерʹә чь ԛәԝьми. Адәм у Һеԝа жь мала хԝәйә бәдәԝ, бахче Адән, һатьнә бәридане. Ле зани чьрʹа?

Йаһоԝа бәри ԝан да, чьмки ԝана тьште хьрав кьрьн. Гәло Адәм у Һеԝа чь хьрави кьрьн?

Ԝана тьште ӧса кьр, йе кӧ Хԝәде изьн нәдьда ԝан бькьн. Хԝәде готә ԝан, кӧ жь һʹәму дара дь бахче Адәнеда, әԝана дькарьн емиш бьхԝьн. Ле тʹәне жь дарәке нькарьн, чьмки ԝе бьмьрьн. Әм дькарьн һʹәсав кьн, кӧ әв дар йа Хԝәде бу. Ле ча тӧ дьшьрмиш дьби, изьна тә һәйә тьштед нә йа тә һьлди хԝәрʹа? Әм заньн ԝәки на. Дә ԝәрә бьньһерʹьн чь ԛәԝьми!

Рʹожәке, чахе Һеԝа дь бахче Адәнеда тʹәне бу, мәʹр ԝерʹа хәвәрда. Тә тьште ӧса дитйә, ԝәки мәʹр хәвәр дә? Әԝи Һеԝарʹа гот, кӧ әви емиши бьхԝә, йе кӧ Хԝәде гот нәхԝьн. Әм заньн кӧ Хԝәде мәʹр ӧса чекьр, кӧ әԝ нькарә хәвәр дә. Ләма жи әм фәʹм дькьн, кӧ бь дәве мәʹр кәсәки дьн хәвәр дьда. Гәло әв кʹи бу?

Бәле, әв нә Адәм бу. Әв, йәк жь ԝан мьлйакʹәта бу, йед кӧ Хԝәде пешийа һʹәму тьшти әʹфьранд, у йед кӧ найнә дитьне. Әв мьлйакʹәт пашԝәхтийе бу гәләки ԛӧрә у бабах. Һәма әԝи бь дәве мәʹр хәвәрда. Әԝ дьшьрмиш бу кӧ дькарә мина Хԝәде бьбә сәркʹаре дьнйайе. Әԝи дьхԝәст, кӧ һʹәму мәри дәԝса Хԝәде гӧрʹа ԝи бькьн.

Әԝи Һеԝа да шашкьрьне. Чахе мьлйакʹәте хьрав готә Һеԝа, кӧ һәрге әԝ әви емиши бьхԝә ԝе бьбә мина Хԝәде, Һеԝа баԝәр кьр у хԝар, паше да Адәм у әԝи жи хԝар. Адәм у Һеԝа гӧрʹа Хԝәде нәкьрьн у ләма жи Хԝәде жь мала ԝанә бәдәԝ бәри ԝан да.

Ле ԝәʹде ӧса ԝе бе, чахе Хԝәде тʹәмамийа әʹрде мина бахче Адән ԝе бәдәԝ кә. Паше әм пебьһʹәсьн, һәла сәва ви шьхӧли тӧ чь дькари бьки. Ле ньһа кʹа әм бьньһерʹьн, чь сәре Адәм у Һеԝа ԛәԝьми.

Дәстпебун 2:16, 17; 3:1-13, 24; Әʹйанти 12:9.