Сәрһати 5

Жийина Чәтьн Дәстпебу

ЧЬМКИ Адәм у Һеԝа ида нә дь Адәнеда бун, жийина ԝан гәлә чәтьн бу. Дәԝса даред бәдәԝ у емишдар, ԝана дор-бәре хԝә тʹәне сьтрина у шинкайийа бекер дьдит. Әԝана гәләк дьхәвьтин у щәфа дьдитьн сәва кӧ пәʹри нан бьхԝьн. Әв йәк һатә сәре ԝан, чьмки ԝана гӧрʹа Йаһоԝа нәкьр у һәвалтийа хԝә тʹәви ԝи ӧнда кьрьн.

Те бира тә, Хԝәде Адәм у Һеԝарʹа пешда готьбу, кӧ һәрге әԝана жь дара беизьн емиш бьхԝьн, ԝе бьмьрьн. Ле ԝана гӧрʹа Хԝәде нәкьр у емиш хԝарьн, ләма жи әԝана һеди-һеди кал-пир бун у дь ахьрийеда мьрьн. Ԝана рʹасти жи беаԛьли кьр, кӧ гӧрʹа Хԝәде нәкьрьн!

Зарʹед Адәм у Һеԝа һатьн буйине паши ԝе йәке ча Йаһоԝа жь щьнәте бәри ԝан да. Ләма зарʹед ԝан жи гәрәке кал-пир буна у бьмьрана.

Дә бьдә һʹәсаве хԝә, һәрге ԝана гӧрʹа Хԝәде бькьра, жийина ԝан у зарʹед ԝан чьԛас ԝе бәхтәԝар буйа. Әԝана һʹәмушк ль сәр әʹрде дь бәхтәԝарийеда ԝе һʹәта-һʹәтайе бьжитана. Тʹӧ кәс жь ԝан ԝе нәхԝәш нәбуйа, нә пир буйа у нә жи бьмьрийа.

Хԝәде дьхԝәст, кӧ мәри һʹәта-һʹәтайе дь бәхтәԝарийеда бьжин у әԝ соз дьдә, кӧ ӧса жи ԝе бьбә. Тʹәмамийа әʹрде ԝе бәдәԝ бә, һьн жи һәр кәс ԝе сьһʹәт-ԛәԝат бә. Һʹәму мәри ԝе һәвалтийе һәврʹа бькьн у һьн жи бьбьнә һәвале Хԝәде.

Ле Һеԝа һәвалтийа хԝә тʹәви Хԝәде ӧнда кьр. Ләма жи чахе перʹа зарʹ дьбун, әԝ еша гьран дькʹьшанд у гәләки дьчәрчьри. Дьвини, чьԛас кӧл-дәрда әԝе дит, чьмки гӧрʹа Йаһоԝа нәкьр.

Щәм Адәм у Һеԝа гәләк зарʹ һәбун. Чахе зарʹа ԝанә пешьн һатә буйине, ԝана наве ԝи дани Ԛайин. Наве зарʹа дӧда жи Һабил бу. Ле тӧ зани чь сәре ԝан ԛәԝьми?

Дәстпебун 3:16-23; 4:1, 2; Әʹйанти 21:3, 4.