Сәрһати 2

Бахче Бәдәԝ

БЬНЬҺЕРʹӘ сәр әʹрде дь ви шькьлида! Чьԛас хасә һʹәму тьшт! Дина хԝә бьдә кӧлирка, шинкайийе, дара, у сәр һʹәму һʹәйԝана. Дькари нишан ки шер у фил?

Гәло әв бахче бәдәԝ ча чебу? Ԝәрә әм дина хԝә бьдьне, ча Хԝәде әʹрд сәва мә һазьр кьр.

Пешийе Хԝәде тʹәмамийа әʹрде бь шинкайийе тʹьжә кьр. Паше Хԝәде щурʹә-щурʹә пʹьнщар у кӧлирк чекьр, ӧса жи дар у дарчʹьк чекьр. Бь ван һʹәму тьшта әʹрд һе бәдәԝ бу. Һьн жи, гәләк жь ван шинкайийа бәред тәʹм у хԝәш мәрʹа дьдьн.

Ԝәʹдә шунда Хԝәде дәстпекьр мәʹсийа чекә, кӧ дь аведа бьжин у чʹьвика кӧ ль сәр әʹзмана бьфьрʹьн. Әԝи кучʹьк чекьр, пʹьшик, һәсп у һʹәму щурʹә һʹәйԝан. Ле кʹижан һʹәйԝана тӧ һʹәз дьки? Әм гәрәке жь Хԝәде рʹази бьн сәва ван һʹәму тьшта. Ӧса нинә?

Хьлазийе, Хԝәде щик ль сәр әʹрде башԛә кьр у наве ԝи щи бахче Адән дани. Әв щи беԛӧсур бу. Һʹәму тьшт дор-бәре ԝи гәлә бәдәԝ бу. Хԝәде дьхԝәст кӧ тʹәмамийа әʹрде мина ви бахи хас буйа.

Һәла диса бьньһерʹә сәр шькьл у дина хԝә бьдә чь ль сәр ви шькьли кемә. Кʹа әм бьньһерʹьн у пебьһʹәсьн.

Дәстпебун 1:11-25; 2:8, 9.