Сәрһати 115

Щьнәта Созкьри

ҺӘЛА бьньһерʹә ль сәр ван чʹийайед мәзьн, даред бьльнд у кӧлиркед бәдәԝ. Бь рʹастийе жи әв щи пʹьрʹ хԝәш ә, ӧса нинә? Һәла дина хԝә бьдә ча хәзал жь дәсте гәде бьчʹук хԝарьне дьхԝә. Ле дьвини кӧ шер у һәсп тʹәвайи ль чайиреда дьчʹерьн. Ньһа хԝә пьрскә, тӧ дьхԝази ль щики ӧса бьжи?

Зани кӧ Хԝәде дхԝазә ԝәки тӧ ль сәр әʹрде щьнәте һʹәта-һʹәтайе бьжи. Әԝ нахԝазә ԝәки щики тә бешә, у ԝәки тӧ мина мәрьвед дьне бьчәрчьри. Бьньһерʹә Кʹьтеба Пироз чь соз дьдә ԝан йе кӧ дь щьнәтеда ԝе бьжин: «Хԝәде ԝе тʹәви ԝан бә. Мьрьн ида ԝе тʹӧнә бә, нә гьри, нә жи еш-ешук, чьмки тьштед бәре ида дәрбаз бун».

Иса ԝе ӧса бькә ԝәки әв һʹәму соз бенә сәри. Ле зани әв ԝе кʹәнге бьԛәԝьмә? Бәле, паши ԝе йәке ча Иса әʹрд жь һʹәму зӧлмийе у мәрийед нәһәԛ тʹәмьз кә. Те бира тә, әм пеһʹәсийан ԝәки чахе Иса ль сәр әʹрде бу әԝ мәрийа жь щурʹә-щурʹә нәхԝәшийа ԛәнщ дькьр. Әԝ һәла һе мьрийа жи сах дькьр. Бь ве йәке Иса избат кьр, ԝәки чахе әԝ ԝе бьбә пʹадша, дь пʹадшатийа Хԝәдеда, әԝ ԝе гәлә тьштед кʹәрәмәт ль сәр әʹрде бькә.

Тӧ тʹәне бьдә һʹәсаве хԝә, әʹмьр дь щьнәтеда чьԛас ԝе бәхтәԝар бә! Тʹәви Иса ӧса жи мәрьвед кӧ әԝи жьбартьбу ԝе пʹадшатийе бькьн. Әԝана ԝе хәм бькьн ԝәки һʹәму тьшт ль сәр әʹрде баш бә у әʹмьре һәр кәса бәхтәԝар бә. Ле ньһа ԝәрә әм пебьһʹәсьн чь әм гәрәке бькьн, ԝәки кʹәрәма Хԝәде бьстиньн у бькарьбьн ль сәр әʹрде щьнәте һʹәта-һʹәтайе бьжин.

Әʹйанти 21:3, 4; 5:9, 10; 14:1-3.