Сәрһати 11

Кʹәскәсора Пешьн

ГӘЛО Нӧһ у нәфәред мала ԝи чь кьрьн чахе жь гәмийе дәркʹәтьн? Нӧһ ԛӧрбанәк Хԝәдерʹа ани. Әв йәк ль сәр шькьле жере рʹьнд те кʹьвше. Нӧһ жь Хԝәде гәләки рʹази бу, кӧ әԝ нәфәред мала хԝәва жь Селава Дьнйайе хьлаз бун. Ләма жи әԝи һʹәйԝана ԛӧрбан кьр Хԝәдерʹа у бь ве йәке рʹазибуна хԝә нишани Хԝәде кьр.

Ча тӧ дьшьрмиш дьби, Йаһоԝа ԛӧрбана ԝан ԛәбул кьр? Бәле, әԝи ԛәбул кьр. Хԝәде ӧса жи Нӧһрʹа соз да, кӧ дьнйа тʹӧ щар пе Селаве ида найе ԛьрʹкьрьне.

Һьнә ԝәʹдә шунда, әʹрд жь ава селаве зьһа бу. Нӧһ у малбате ԝи ль сәр әʹрде жийина тʹәзә дәстпекьрьн. Хԝәде кʹәрәма хԝә да ԝан у гот: «Һун гәрәке зарʹа биньн. Гәрәке һәв зедә бьн, кӧ тʹәмамийа әʹрде бь мәрийа тʹьжә бә».

Ле ԝәʹдә дәрбаз бу у чахе мәрийа дәрһәԛа Селаве дьбьһист, тьрс дькʹәтә дьле ԝан, кӧ селав ԝе диса бе. Ләма жи Хԝәде нишанәк кʹьвш кьр, ԝәки мәри бькарьбьн текьнә бира хԝә созе ԝи, кӧ әʹрд пе селаве тʹӧ щар ԝе ԛьрʹ набә. Ле тӧ зани Хԝәде чь нишан кʹьвш кьр? Әв нишан кʹәскәсор бу.

Кʹәскәсор ль сәр әʹзмана кʹьвш дьбә паши баране, чахе тәʹв дәрдькʹәвә. Дь кʹәскәсорда щурʹә-щурʹә рʹәнг һәнә. Тә ԛә щарәке кʹәскәсор пе чʹәʹве хԝә дитйә? Һәла бьньһерʹә сәр шькьле жоре. Тӧ кʹәскәсоре дьвини?

Хԝәде готә ԝан: «Әз соз дьдьмә ԝә, кӧ нә мәри, нә жи һʹәйԝан тʹӧ щар ԝе найнә ԛьрʹкьрьне пе селаве. Әзе кʹәскәсоре ль сәр әʹԝра дайньм. Чахе кʹәскәсор ԝе дәркʹәвә, әзе ле бьвиньм у созе хԝә текьмә бира хԝә».

Чахе тӧ кʹәскәсоре дьвини, чь гәрәке бини бира хԝә? Рʹаст ә, Хԝәде соз да кӧ дьнйа ԝе тʹӧ щар пе селаве ида найе ԛьрʹкьрьне.

Дәстпебун 8:18-22; 9:9-17.