Сәрһати 12

Мәри Бирка Мәзьн Ава Дькьн

ГӘЛӘ ԝәʹдә дәрбаз бу у бал кӧрʹед Нӧһ гәләк зарʹ һатьн буйине. Әԝана жи мәзьн бун у зарʹ анин. Ӧса ль сәр әʹрде мәри зедә бун.

Нав ԝана мәрик һәбу, наве ԝи Нәмруд, йе кӧ нәбичʹьрке Нӧһ бу. Әԝ мәрики гәлә хьрав бу. Нәмруд нечʹирван бу у әԝи һьн һʹәйԝана, һьн жи мәрийа дькӧшт. Әԝи ӧса жи хԝә кʹьвш кьр ча пʹадша, кӧ һʹӧкӧмтийе ль сәр мәрийа бькә. Хԝәде ԝи һʹәз нәдькьр.

Мәрийед ԝи чахи тʹәне ль сәр зьманәки хәвәр дьдан. Нәмруд дьхԝәст һʹәму мәрийа щики тʹoп кә, кӧ бькарьбә ль сәр ԝан һʹӧкӧмтийе бькә. Зани әԝи чь кьр? Әԝи готә мәрийа кӧ әԝана гәрәке шәһәр ава кьн. Ӧса жи ԝана гәрәке теда бирка мәзьн ава кьра. Бьньһерʹә, ль сәр шькьл те кʹьвше ча әԝана кʹәрпʹича чедькьн.

Авакьрьна ӧса дьле Йаһоԝа хԝәш нәдьһат. Чьмки Хԝәде дьхԝәст кӧ мәри бәла буна у ль сәр тʹәмамийа әʹрде бьжитана. Ле дәԝса ве йәке, ԝана гот: «Ԝәрʹен әм шәһәрәк ава кьн! У бирка ӧса бьльнд теда чекьн, кӧ бьгьһижә һʹәта әʹзмана, ԝәки навәки мәзьн мәрʹа чебә!» Ԝана дьхԝәст, кӧ наве ԝан бьльнд бә, нә кӧ наве Хԝәде.

Ләма жи Хԝәде авакьрьна бирке да сәкьнандьне. Гәло бь чь щурʹәйи? Те бира тә, кӧ мәри тʹәне ль сәр зьманәки хәвәр дьдан. Дә Хԝәде ӧса кьр, кӧ ньшкева мәрийа дәстпекьр ль сәр щурʹә-щурʹә зьмана хәвәрдьн. Сазкʹаред бирке ида һәв дӧ фәʹм нәдькьрьн. Ләма жи наве ԝи шәһәри данин Бабилон, йе кӧ те һʹәсаве «Тʹәвльһәвбуйин».

Мәрийа дәстпекьр жь Бабилоне щьһе бьн. Кʹомед мәрийа, йед кӧ зьмане һәв фәʹм дькьрьн башԛә дьбун, кӧ щики дьне ль сәр рʹуйе әʹрде бьжин.

Дәстпебун 10:1, 8-10; 11:1-9.