Сәрһати 14
Хԝәде Баԝәрийа Бьраһим Дьдә Щерʹьбандьне
ҺӘЛА дина хԝә бьдә Бьраһим, гәло әԝ чь дькә? Дәсте хԝәда кʹер гьртийә, те бежи ньһа ԝе кӧрʹе хԝә бькӧжә. Әв йәк чьрʹа лазьм һат? Кʹа әм пешийе пебьһʹәсьн, ча Бьраһим у Сарарʹа кӧрʹ һатә буйине.
Те бира тә Хԝәде соз да, кӧ ԝанрʹа кӧрʹәк ԝе бьбә. Әв йәк чәтьн дьһатә баԝәркьрьне, чьмки Бьраһим у Сара ида кал-пир бун. Ле Бьраһим йәкә баԝәр дькьр, чьмки әԝи заньбу ԝәки сәва Хԝәде тьштәки чәтьн кӧ бькә тʹӧнә. Гәло паше чь ԛәԝьми?
Дь нав саләкеда Хԝәде созе хԝә ани сәри. Чахе Бьраһим 100 сали бу у Сара жи 90 сали, ԝанарʹа кӧрʹәк бу, наве ԝи данин Исһаԛ. Хԝәде созе хԝә ани сәри!
Чахе Исһаԛ ида мәзьн бу, Хԝәде баԝәрийа Бьраһим да щерʹьбандьне. Хԝәде гази ԝи кьр: «Бьраһим!» у әԝи щава хԝә да: «Бәле, әз вьра мә!» Хԝәде готә ԝи: «Кӧрʹе хԝәйи тайе тʹәне Исһаԛ һьлдә, һьлкʹьшинә чʹийайе кӧ әзе нишани тә бькьм, у ԝе дәре кӧрʹе хԝә бькӧжә у мьнрʹа бинә ԛӧрбан».
Бьдә һʹәсаве хԝә әԝан гьлийа чьԛас дьле Бьраһим ешандьн, әԝ гәлә бәрхԝәкʹәт, чьмки әԝи кӧрʹе хԝә гәләки һʹәз дькьр. Те бира тә, кӧ Хԝәде соз да Бьраһим ԝәки зӧрʹәтед ԝи ԝе ль сәр әʹрде Кәнане бьжин. Ле әв йәк ԝе ча бьһата сәри һәрге Исһаԛ гәрәке бьмьра? Бьраһим ве йәке фәʹм нәдькьр, ле йәкә әԝи кәрʹ-лал гӧрʹа Хԝәде кьр.
Чахе әԝана ль сәр чʹийа һьлкʹьшийан, Бьраһим сәва ԛӧрбане щи һазьр кьр, кӧрʹе хԝә гьреда у ԝи ль сәр ԛӧрбангәһе вәләзанд. Әԝи кʹер һьлда дәсте хԝә кӧ кӧрʹе хԝә бькӧжә, ле һәма ԝе дәме Хԝәде бь мьлйакʹәтәки гази ԝи кьр: «Бьраһим, Бьраһим!» Әԝи щава хԝә да: «Бәле, әз вьра мә!»
«Ԛә тьштәки кӧрʹе хԝәрʹа нәкә, зийане нәдә ԝи», Хԝәде гот. «Ньһа әз ида заньм кӧ тӧ баԝәрийа хԝә мьн тини, чьмки тә бона хатьре мьн һʹәйфа хԝә кӧрʹе хԝәйи тайе-тʹәне нәани».
Бәле, баԝәрийа Бьраһим һьндава Хԝәде гәләки мәзьн бу! Әԝи баԝәр дькьр кӧ ԛәԝата Хԝәде мәзьн ә, ԝәки бьхԝазә жи дькарә Исһаԛ жь мьрийа рʹакә. Ле нета Хԝәде әв нибу, кӧ Бьраһим рʹасти жи кӧрʹе хԝә бькӧшта. Ләма жи Хԝәде ӧса кьр, кӧ незики ви щи пәзәк дь нав тʹумеда алийа бу у һатә гьртьн. Һинге Хԝәде готә Бьраһим, кӧ әве пәзе дәԝса кӧрʹе хԝә бинә ԛӧрбан.
Дәстпебун 21:1-7; 22:1-18.