Сәрһати 16
Исһаԛ Жьнәкә Баш Дьстинә
ГӘЛО әв ԛиз, йа кӧ тӧ ль сәр шькьл дьвини, кʹи йә? Әм заньн кӧ наве ԝе Рʹәбәка йә. Ле әв мер, бәрбь кʹе Рʹәбәка те, Исһаԛ ә. Рʹәбәка те бал Исһаԛ кӧ бьбә жьна ԝи. Кʹа әм пебьһʹәсьн әв йәк ча ԛәԝьми.
Мәрийед Кәнане сәре хԝә ль бәр хԝәдайед ԛәлп датанин у Бьраһим нәдьхԝәст кӧ жьна Исһаԛ жь Кәнане бә. Әԝи дьхԝәст кӧ кӧрʹе ԝи хԝәрʹа жьнәкә баш бьстинә. Ләма жи Бьраһим гази хӧламе хԝә кьр у готә ԝи: «Тӧ гәрәке һәрʹи бал мәрьвед мьн йе кӧ дь шәһәре Һаранда дьминьн, у жь ԝе дәре сәва кӧрʹе мьн жьнәкә баш бьвини».
Һәма ԝе дәме Хӧламе Бьраһим дәһә дәвә һьлда, у ләзә-ләз чу Һаране. Незики еваре әԝ гьһиштә Һаране у ль бәр бирәке сәкьни. Бәре еваре жьн жь ԝи шәһәри дьһатьн, кӧ аве жь бире һьлдьн. Ве дәме, хӧламе Бьраһим Йаһоԝарʹа дӧа кьр: «Йаһоԝа, бьра әԝ жьн йа кӧ тә сәва Исһаԛ жьбартийә, жь бире ав һьлчʹьнә у бьдә мьн у һʹәйԝанед мьн».
Һьнә ԝәʹдә шунда Рʹәбәка һатә пәй аве. Чахе хӧламе Бьраһим жь Рʹәбәка ав хԝәст, әԝе ав да ԝи. Ле паше Рʹәбәка һьн жи гәлә ав һьлчʹанд жь бире бона һʹәму дәвәйед ԝи, йе кӧ гәлә тʹи бьбун. Бьдә һʹәсаве хԝә әв шьхӧл чьԛа чәтьн бу, чьмки ча әм заньн дәвә аве гәлә вәдьхԝьн.
Чахе Рʹәбәка шьхӧле хԝә хьлаз кьр, хӧламе Бьраһим пьрс кьр, кӧ наве баве ԝе чь йә у дь мала ԝида щи ԝе һәбә, ԝәки шәвәк сәре хԝә дайнә. Рʹәбәка гот: «Әз ԛиза Бетуел ьм у дь мала мәда сәва тә щи һәйә». Чахе хӧлам пеһʹәсийа кӧ Бетуел кӧрʹе Наһор ә, бьре Бьраһим, әԝи фәʹм кьр кӧ Хԝәде ԝи рʹасти мәрьвед Бьраһим ани. Ләма жи әԝ кʹәтә сәр чока у шькьр да Хԝәде.
Ԝе шәве хӧламе Бьраһим Бетуелрʹа у бьре Рʹәбәка Лабанрʹа гьли кьр, кӧ сәва чь әԝ һатийә. Әԝана ԛайил бун, кӧ Рʹәбәка бьчуйа тʹәви хӧламе Бьраһим у Исһаԛрʹа бьбуйа жьн. Ле гәло Рʹәбәка ԝе чь бежә? Әԝе дь щава хԝәда гот: «Әре, әз ԛайил ьм». Рʹожәк шунда әԝана ль сәр дәва сийар бун у кʹәтьнә рʹе, кӧ вәгәрʹьн Кәнане.
Бәрбь еваре әԝана незики Кәнане бун. Ԝи чахи Рʹәбәка мерәк дь чоледа дит. Әв мер Исһаԛ бу. Исһаԛ жи Рʹәбәка дит у гәлә ша бу. Се сал пешийа ве йәке, дийа Исһаԛ мьрьбу у ль дьле ԝида еш һе һәбу. Ле чахе әԝ рʹасти Рʹәбәка һат у ԝе гәлә һʹәз кьр, шабун пашда кʹәтә дьле ԝи.
Дәстпебун 24:1-67.