Рәбәка Дьхwәст Дьле Йаһоwа Ша кә

Рәбәка Йаһоwа һʹьз дькьр. Наве мере wе Исһаq бу. Исһаq жи Йаһоwа һʹьз дькьр. Ле ча wана һәв нас кьр? У ча Рәбәка да кʹьфше кö дьхwәст дьле Йаһоwа ша кә? Wәре пешийе әм дәрһәqа мере wе Исһаq, пебьһʹәсьн.

Де-баве Исһаq, Бьраһим у Сәра бун. Әwана дь әʹрде Кәнанеда дьжитьн. Дь Кәнанеда мәрьв Йаһоwарʹа qöльх нәдькьрьн. Ле Бьраһим дьхwәст wәки кöрʹе wи бьзәwьщә сәр qизәкә öса, йа кö Йаһоwарʹа qöльх дькә. Ләма жи әwи хöламе хwә Әлийәзәр шандә әʹрде Һаране, сәва кö бона Исһаq жьне бьвинә. Дь ви әʹрдида бьра-пьсмамед Бьраһим дьман.

Әлийәзәр тʹәви хöламед Бьраһимә дьн, рʹе кʹәт. Рʹийа wан гәләк wәʹдә кʹьшанд. Әwана тʹәви хwә дәһә дәвәйед баркьри һьлдан, йед кö ль сәр хwә хwарьн у пʹешкʹеш дьбьрьн. Ле гәло Әлийәзәр ча гәрәке бьзаньбуйа, кö Исһаqрʹа кʹижан qизе бьжберә? Чахе Әлийәзәр у хöламед майин һатьнә Һаране, әwана бәрбь канийе сәкьнин. Чьмки Әлийәзәр заньбу, кö зутьрәке кʹöлфәт гәрәке бен сәр канийе, сәва кö аве һьлдьн. Әwи Йаһоwарʹа дöа кьр у гот: ‹Һәрге әз qизәкерʹа бежьм кö һьнә ав бьдә мьн, у әwе, аве бьдә мьн у дәвәйед мьн, бь ве йәке әзе бьзаньбьм кö әв һәма әw qиз ә йа кö тә бьжартийә›.

Һьнге Рәбәка һатә бәр канийе. Дь Кʹьтеба Пирозда те готьне кö әw qизәкә назьк бу. Әлийәзәр ав жь wе хwәст кö вәхwә. Рәбәка готе: ‹Бәле, кʹәрәм кә. Әзе аве бьдьмә тә у һәрʹьм wәки бона дәвәйед тә жи аве биньм›. Ле тö зани wәки дәвәйед тʹи, гәләк аве вәдьхwьн! Ләма жи Рәбәка рʹәвә-рʹәв дьчу бәр канийе у ав дьани. Һәла дина хwә бьдә шькьл! Тö дьвини кö Рәбәка хәбатәкә чьqас гьран дькә?~ Әлийәзәр гәләк әʹщебмайи ма кö чаwа Йаһоwа щаба дöайе wи да.

Әлийәзәр гәләк тьштед бәдәw пʹешкʹеши Рәбәкайе кьр. Wи чахи Рәбәка, Әлийәзәр у хöламед дьн тʹәглифи мала баве хwә кьр. Һьнге Әлийәзәр шьровәкьр, кö чьрʹа Бьраһим әw шандә ви әʹрди, у чаwа Йаһоwа щаба дöайе wи да. Малбәта Рәбәкайе ша бу у qайил бу, wәки qиза wан бьбә жьна Исһаq.

Ле тö ча дьшьрмиш дьби, Рәбәка хwәст бьбә жьна Исһаq?~ Рәбәка заньбу кö Йаһоwа, Әлийәзәр шандә мала wан. Ләма жи чахе малбәта Рәбәкайе ле пьрсин һәла әw дьхwазә һәрʹә Кәнане, wәки бьбә жьна Исһаq, әwе гот: ‹Әре, әз дьхwазьм һәрʹьм›. Паше ве йәке Рәбәка тʹәви Әлийәзәр рʹабу у рʹе кʹәт. Чахе әwана һатьнә Кәнане, Рәбәка бу жьна Исһаq.

Рәбәка һʹәму тьшт öса кьр, чаwа кö Йаһоwа дьхwәст. Ләма жи Йаһоwа ле кʹәрәм кьр. Гәләк сал дәрбаз бу, у Иса дь малбәта wеда һатә буйине! Һәрге тö жи мина Рәбәка дьле Йаһоwа ша дьки, әwе тә жи кʹәрәм бькә.