Сәрһати 17

Бьрайе Щеԝи Нә Мина Һәв Ьн

ДИНА хԝә бьдә, кӧ әв дӧ гәдә ԛә рʹәнге һәвда ниньн, ӧса нинә? Гәло навед ԝан чь йә? Йе нечʹирван Әсав ә, ле йе кӧ мьԛати бәхька нә Аԛуб ә.

Бьрайе щеԝи Әсав у Аԛуб кӧрʹед Рʹәбәка у Исһаԛ ьн. Исһаԛ кӧрʹе хԝә Әсав гәләки һʹәз дькьр, чьмки әԝи сәва мале гоште нечʹире дьани. Ле Рʹәбәка Аԛуб гәлә һʹәз дькьр, чьмки әԝ гәдәки гәлә мьлук у әʹдлайиһʹәз бу.

Ԝи чахи калке ԝан һе сагʹ бу, бьдә һʹәсаве хԝә чахе Бьраһим дәрһәԛа Йаһоԝа у ԛьрара ԝи гьли дькьр, Аԛубрʹа чьԛас һʹәԝас бу гӧһе хԝә бьда ԝи. Бьраһим 175 сал әʹмьр кьр у мьр, ԝи чахи бьрайе щеԝи 15 сали бун.

Чахе Әсав 40 сали бу, әԝи хԝәрʹа жь әʹрде Кәнане дӧ жьн ани. Бь ԝе йәке әԝи дьле де-баве хԝә гәлә ешанд, чьмки жьнед ԝи Йаһоԝа нәдьһʹәбандьн.

Ԝәʹдә гьһишт кӧ Исһаԛ кʹәрәма хԝә бьда кӧрʹе хԝә. Әсав жь бьре хԝә Аԛуб мәстьр бу, ләма жи әԝи гәрәке кʹәрәме бьстанда. Ле һьнә ԝәʹдә пешда Әсав әв изьна, кӧ кʹәрәме бьстинә фьротә бьре хԝә Аԛуб. Һьн жи һе пешда, чахе әԝана һатьбун буйине, Хԝәде гот кӧ Аԛуб ԝе кʹәрәме бьстинә нә кӧ Әсав. һәма ӧса жи ԛәԝьми. Исһаԛ кʹәрәма хԝә да Аԛуб.

Чахе Әсав әв йәк пеһʹәсийа, әԝ ль сәр бьре хԝә Аԛуб гәләк һерс кʹәт. У жь һерса хԝә әԝи гот: «Әзе бьре хԝә Аԛуб бькӧжьм». Гава Рʹәбәка әв йәк бьһист әԝ гәлә бәр хԝә кʹәт. Рʹәбәка дьшьрмиш дьбу кӧ ча дькарә али Аԛуб бькә, у әԝе тьштәки ӧса готә мере хԝә: «Ԝәй ль мә, һәрге Аԛуб жи хԝәрʹа жьн жь Кәнане бинә».

Ләма жи Исһаԛ гази кӧрʹе хԝә Аԛуб кьр у готә ԝи: «Тʹәви ԛизед Кәнане нәзәԝьщ ә. Һәрʹә Һаране, мала калке хԝә Бетуел у ԛизәкә хале хԝә Лабане бьстинә».

Аԛуб гӧрʹа баве хԝә кьр. Әԝи кʹаре хԝә кьр у кʹәтә рʹе, кӧ һәрʹә Һаране мала мәрьве дийа хԝә.

Дәстпебун 25:5-11, 20-34; 26:34, 35; 27:1-46; 28:1-5; Ибрани 12:16, 17.