Сәрһати 37

Коне Пироз

ГӘЛО әв авайи, йе кӧ ль сәр ви шькьли те кʹьвше, чь йә? Әв кона пироз ә, сәва кӧ Йаһоԝарʹа ԛӧльх бькьн. Исраелийа паши дәркʹәтьна жь Мьсьре нава саләке әв кон ава кьрьн. Ле гәло, авакьрьна кона пироз хԝәстьна кʹе бу?

Әв хԝәстьна Йаһоԝа бу. Чахе Муса ль сәре чʹийайе Синайе бу, Йаһоԝа готә ԝи кӧ ча әв кон гәрәке бе авакьрьне. Хԝәде дьхԝәст кӧ кона пироз ӧса бе авакьрьне, ԝәки ԝи һәр щар һеса бькарьбьн жь һәв дәрхьн у паше пашда тʹоп кьн. Чьмки щьмәʹта Исраел дь бәрʹийеда һәр гав жь щи-щийа дәрбаз дьбун, ԝана дькарьбу кона пироз һәр гав тʹәви хԝә бьвьра.

Ньһа дина хԝә бьдә ль сәр отʹаха бьчʹук дь конеда. Тӧ сьндоԛе, йане ԛӧтʹийа бьчʹук дьвини? Зани наве ве сьндоԛе чь йә? Наве ве, сьндоԛа пәймане йә. Ль сәр сьндоԛе жь һәр дӧ алийава мьлйакʹәт, йане херубед зерʹ һатьн чекьрьне. Дь ве сьндоԛеда дӧ кәвьре дәһә ԛануна һәбун, йе кӧ Хԝәде ида щара дӧда ньвиси бу, чьмки йа пешьн Муса һурдәхԝәши кьрьбу. Ӧса жи ԝе дәре тʹаса бь мане тʹьжәкьри һәбу. Те бира тә мана чь йә?

Хԝәде кʹаһина, йане кʹәшише пешьн, Һарун кʹьвш кьр. Һарун али щьмәʹте дькьр, кӧ әԝана Йаһоԝарʹа ԛӧльх кьн. Кӧрʹед Һарун жи кʹаһин бун.

Ньһа бьньһерʹә ль сәр отʹаха мәзьн дь конеда. Әв жь отʹаха бьчʹук дӧ щара зедәтьр ә. Тӧ дьвини ԛӧтʹийа бьчʹук ль сәр кʹижани һьнә ду һьлдькʹьшийа? Әв ԛӧтʹийа горигәһе йә, ль сәр ви горигәһе кʹаһина тьштәк бь бина хԝәш дьшәԝьтандьн, наве ви тьшти бьхур дьготьн. Ԝе дәре ӧса жи шәмдана бь һʹәфт чʹьра һәбу. Сьфьр, йе кӧ дь отʹахеда һәбу, әв тьште сьсийа бу. Ль сәр сьфре ӧса жи 12 нан һәбу.

Дәрва жи бәр кон тʹасәкә мәзьн сәкьнибу, теда тʹьжә ав бу. Кʹаһина пе ве аве дәст ньге хԝә дьшуштьн. Дәрва ӧса жи горигәһ һәбу. Ль сәр ԝе, һʹәйԝана дьшәԝьтандьн, у бь ве йәке Йаһоԝарʹа ԛӧрбан дьдан. Щьмәʹта Исраел жи дор-бәре Кона Пироз щиԝар бун, у дь чадьрада дьжитьн.

Дәрк’әтьн 25:8-40; 26:1-37; 27:1-8; 28:1; 30:1-10, 17-21; 34:1, 2; Ибрани 9:1-5.