Сәрһати 36

Голька Зерʹ

ПӘЙИ! Һәла тӧ бьньһерʹә әԝана чь дькьн! Щьмәʹта Исраеле сәре хԝә бәр голька зерʹ датиньн! Гәло ԝана чьрʹа ӧса кьр?

Чахе Муса гәлә ԝәхт ль сәр чʹийе бу, щьмәʹте гот: «Әм жь кʹӧ заньн чь сәре Муса һат. Кʹа әм хӧданәки хԝәрʹа чекьн, йе кӧ мә жь әʹрде Мьсьре дәрхьст».

Һарун бьре Муса гот: «Дә бьра хԝәстьна ԝә бә. Гӧһаре хԝәйә зерʹ тʹоп кьн у биньн щәм мьн». Чахе ԝана зерʹ ани бал Һарун, әԝи зерʹе ԝан һʹәланд у голька зерʹ ԝанарʹа чекьр. Ԝи чахи щьмәʹте гот: «Аһан әв ә Хԝәдайе мә, йе кӧ мә жь Мьсьре дәрхьст!» Паше, ԝана кʹефәкә мәзьн кьр у сәре хԝә бәр голька зерʹ данин.

Чахе Йаһоԝа әв йәк дит, әԝ гәлә һерс кʹәт. Хԝәде Мусарʹа гот: «Ләз кʹәвә һәрә жере. Щьмәʹта Исраел гәлә шьхӧләки хьрав дькә. Ԝана ԛанунед мьн бир кьр у сәре хԝә ль бәр голька зерʹ датиньн».

Муса ләзә-ләз пәйа бу, у чахе әԝ ида незики ԝан бу, аһан әԝи чь дит. Щьмәʹта исраели кʹӧлама дьвежьн у дор-бәре голька зерʹ дьрәԛьсьн! Муса ӧса һерс кʹәт, кӧ кәвьре дәсте хԝәда әʹрде хьст у кәвьред бь ԛанунва һурдәхԝәши бун. Паше, Муса голька зерʹ пашда һʹәланд, у әв зерʹ мина ԛуме һур-һури кьр.

Исраелийа гәлә тьштәки хьрав кьрьн. Ләма жи Муса готә һьнә мера, кӧ шуред хԝә һьлдьн дәсте хԝә. «Мәрийед нәһәԛ, йе кӧ сәре хԝә ль бәр голька зерʹ данин гәрәке бенә кӧштьне», Муса готә ԝан. Ԝана ԝәкә 3 000 мәри кӧштьн! Әв ԛәԝьмандьн мәрʹа нишадькә, кӧ чьԛа фәрзә тʹәне Йаһоԝарʹа ԛӧльх кьн, нә кӧ хԝәдайед ԛәлпрʹа. Ӧса нинә?

Дәркʹәтьн 32:1-35.