Сәрһати 35
Йаһоԝа Ԛануна Дьдә
ПАШИ ԝе йәке, ча исраелийа Мьсьр һиштьн, дӧ мәһ дәрбаз бу у әԝана һатьн бәрбь чʹийа Синайе, йе кӧ ӧса жи ча Һорәб әʹйан ә. Дьбәк те бира тә, кӧ дь ве щийе Йаһоԝа бәр тʹума агьр Мусарʹа хәвәр дабу. Щьмәʹта Исраел һәма бәр чʹийайе Синайе конед хԝә данин у щиԝар бун. Әԝана ԝе дәре ԝәкә саләке ман.
Муса һьлкʹьшийа ль сәр чʹийе у щьмәʹт жи жере һивийа ԝи бу. Ль сәр сәре чʹийе Йаһоԝа Мусарʹа хәвәр да у ԝирʹа гот, кӧ әԝ дьхԝазә ԝәки исраели гӧрʹа ԝи бькьн, сәва кӧ бьбьнә щьмәʹта ԝийә дәлал. Чахе Муса жь чʹийе дакʹәт әԝи исраелийарʹа һʹәму тьшт гьли кьр, у ԝана жи гот кӧ ԝе гӧрʹа Йаһоԝа бькьн, чьмки исраелийа дьхԝәстьн бьбуна щьмәʹта ԝи.
Ԝи чахи Йаһоԝа тьштәки әщев кьр. Әԝи ӧса кьр ,кӧ жь сәре чʹийе ду кʹьшийа, у ль сәр ви дуйи гьрмә-гьрма тәйроке дәстпебу. Йаһоԝа щьмәʹтерʹа хәвәр да у гот: «Әз ьм Хԝәдайе ԝә Йаһоԝа, йе кӧ ԝә жь Мьсьре дәрхьст». Паше Йаһоԝа фәрман да: «Тʹӧ кәсирʹа хенщи мьн ԛӧльх накьн, у сәре хԝә ль бәр хԝәдайед дьн данәйньн».
Хенщи ве фәрмане Йаһоԝа диса нәһә тʹәми, йане ԛанун да щьмәʹта Исраеле. Ԝи чахи тьрсәкә мәзьн кʹәтә дьле мәрийа. Ләма жи ԝана Мусарʹа гот: «Һе башә тӧ мәрʹа хәвәр ди, чьмки әм дьтьрсьн кӧ һәрге Хԝәде ԝе мәрʹа хәвәр дә әме бьмьрьн».
Ижар Йаһоԝа готә Муса: «Һьлкʹьшә ль сәре чʹийе, у әзе дӧ кәвьре пәʹн бьдьмә тә ль сәр кʹижани мьн ԛанунед хԝә ньвисийә, сәва кӧ исраели ван ԛануна хԝәй кьн». Ләма жи Муса диса дәрбәке чу ль сәр чʹийе, у 40 шәв у рʹож әԝ ԝе дәре дьма.
Йаһоԝа диса гәлә ԛанун да щьмәʹта хԝә, у Муса ван һʹәму ԛануна дьньвиси. Ле Хԝәде ӧса жи дӧ кәвьре пәʹн да Муса. Ль сәр ван кәвьра, Хԝәде хԝәха әԝ 10 ԛануна ньвиси, бь кʹижани әԝ исраелийарʹа хәвәр дабу. Әв ԛанун тен навкьрьне ча Дәһә Тʹәми.
Әв Дәһә Тʹәми, демәк ԛанун, гәлә гьринг у фәрз ьн. Ле диса гәлә ԛанунед дьн жи һәбун, йе кӧ Хԝәде да исраелийа. Йәк жь ԝан ԛануна әв ә: «Хӧдан Хԝәдейе хԝә һʹьз бькә бь тʹәмамийа дьле хԝә, бь тʹәмамийа щанийа хԝә, бь тʹәмамийа һʹьше хԝә у бь тʹәмамийа ԛәԝата хԝә». Йа дьн жи мина ве бу: «Һәвале хԝә ԝәкә хԝә һʹьз бькә». Кӧрʹе Хԝәде, Иса Мәсиһ гот кӧ әв дӧ тʹәми пешьн у һәри мәзьн ьн, йе кӧ Йаһоԝа да сәва щьмәʹта хԝә исраели. Һьнә ԝәʹдә шунда әме дәрһәԛа Хԝәде у Кӧрʹе ԝи, ӧса жи дәрһәԛа һинкьрьна ԝан һе зедә пебьһʹәсьн.
Дәркʹәтьн 19:1-25; 20:1-21; 24:12-18; 31:18; Ԛануна Дӧщари 6:4-6; Ԛануна Кʹаһинтийе 19:18; Мәтта 22:36-40.