Сәрһати 38
Донздәһ Щәʹсус
ҺӘЛА бьньһерʹә ль сәр ван емиша йе кӧ ль сәр ви шькьли те кʹьвше. Әв гуша тьрийа ӧса мәзьн ә, кӧ дӧ мәри лазьм һатьн ԝәки ԝи ль сәр шьвдаре бьгьрьн. Бьньһерʹә ль сәр емишед дьне, мәсәлә һьнаре, чьԛа баш ьн әԝана. Ле гәло ԝана емише ӧса баш жь кʹидәре ани? Әв емиш ԝана жь әʹрде Кәнане ани. Те бира тә кӧ Бьраһим, Исһаԛ у Аԛуб дь әʹрде Кәнанеда дьжитьн. Ле паше чахе бьрчибун дәстпебу, малбате Аԛуб дәрбази Мьсьре бу. Ньһа, чахе ида 216 сал дәрбаз бу, бь рʹебәрийа Муса щьмәʹта Исраеле гәрәке пашда бьбийа хԝәйе Кәнане. Ле ньһа әԝана дь чола Кадәшеда бун.
Әм заньн кӧ дь Кәнанеда мәрийед хьрав дьжитьн. Ләма жи Муса 12 щәʹсус жьбарт у готә ԝан: «Һәрʹьн у те дәрхьн, ԝе дәре чьԛа мәри дьжин у чьԛаси әԝана ԛәԝат ьн. Бьньһерʹьн һәла әʹрде ԝан сәва чандьне баш ә, йан на. У әʹсәйи тʹәви хԝә һьнә емиш биньн».
Чахе щәʹсус пашда вәгәрʹийан Кадәше, ԝана гот: «Әʹрде Кәнане рʹасти жи әʹрдәки гәлә башә», у сәва кӧ избат кьн гьлийе хԝә ԝана һьнә емиш нишани Муса кьр. Ле 10 щәʹсусед дьне дьготьн: «Мәрийед Кәнане гәләк ьн у ԛәԝат ьн. Һәрге әме бьхԝазьн ви әʹрди жь ԝан бьстиньн, әме бенә кӧштьне».
Чахе исраелийа әв йәк бьһистьн, әԝана гәлә тьрсийан. Ԝана дьгот: «Хԝазьл әм дь Мьсьреда бьмьрана, йане һәма вьр дь бәрʹийеда. Нә кӧ әм һәрʹьн тʹәви Кәнанийа шәрʹ кьн у ль ԝе дәре бенә кӧштьне, жьн зарʹед мә жи бь дәсте ԝан бенә гьртьне. Кʹа әм дәԝса Муса сәркʹарәки тʹәзә хԝәрʹа бьжберьн у пашда вәгәрʹьн Мьсьре!»
Ле дӧ щәʹсус баԝәрийа хԝә Йаһоԝа анин, у дьхԝәстьн мәрийа жи бьдана баԝәркьрьне. Наве ван щәʹсуса Йешу у Кʹаләб бу. Ԝана дьгот: «Ԛә тьштәки нәтьрсьн. Йаһоԝа ԝе тʹәви мә бә. Әме ви әʹрди һеса бьстиньн». Ле щьмәʹте йәкә гӧһ нәда ԝан. Ԝана һәла һе дьхԝәстьн Йешу у Кʹаләб бькӧштана.
Жь ве йәке Йаһоԝа гәлә һерс кʹәт у готә Муса: «Тʹӧ кәс жь ԝан мәрийа йе кӧ 20 сали мәзьнтьр ьн, ԝе накʹәвьнә әʹрде Кәнане. Ле дәԝса ве йәке әԝана 40 сали дь бәрʹийеда ԝе чоле кʹәвьн, у дь ԝе дәре ԝе бьмьрьн. Чьмки ԝана кʹәрәмәтед мьн дь Мьсьреда у бәрʹийеда дьдит, ле ԝана йәкә баԝәрийа хԝә мьн нәанин. Тʹәне Йешу у Кʹаләб ԝе бькʹәвьнә әʹрде Кәнане».
Жьмар 13:1-33; 14:1-38.