Сәрһати 40

Муса Бь Шьвдара Хԝә Зьнаре Дьхә

ԜӘКӘ 39 сал дәрбаз бьбу, ле щьмәʹта Исраел һе дь бәрʹийеда бун! Нав ван һʹәму сала Йаһоԝа мьԛати ԝан дьбу. Әԝи бь мане ԝана һәр гав тʹер дькьр. Йаһоԝа ӧса жи рʹе нишани ԝан дькьр, рʹоже бь стуна әʹԝр, шәве жи бь стуна агьр. Рʹаст ә 39 сала әԝана тʹьме жь щики дәрбази щийе дьн дьбун ле кʹьнщед ԝан нәдьмашийан, у ньгед ԝан жи нәдешийан у нәдьԝәрьмин.

Ԝи чахи, демәк 39 сал шунда щьмәʹта Исраел пашда вәгәрʹийан Кадәше. Те бира тә кӧ һәма жь Кадәше ԝәкә 40 сали пешда 12 щәʹсус һатьбун шандьне Кәнане. Дь Кадәшеда хушка Муса Мәрйәм мьр. Щьмәʹта Исраеле жи мина бәре дәстпекьрьн бькьнә кӧтә-кӧт.

Ава ԝан ԛә тʹӧнә бу. Ләма жи ԝана дәстпекьр шькийате Муса бькьн: «Һе баш буйа әм дь Мьсьреда бьмьрана. Тә чьрʹа мә жь Мьсьре дәрхьст у ани щийе ӧса, кӧ тʹӧ тьшт шин набә? Вьра нә гәньм, нә һежир, нә тьри у нә жи һьнар һәйә. Һәла һе ав жи тʹӧнә кӧ вәхԝьн».

Чахе Муса у Һарун чунә ль коне кӧ дӧа бькьн, Йаһоԝа Мусарʹа гот: «Тʹәмамийа щьмәʹта Исраеле бәрбь зьнар тʹәвайи тʹоп кә, у ԝанарʹа хәвәрда. Әзе жь зьнаре епʹещә ав бьдьм, ԝәки тʹера һʹәму щьмәʹта у һʹәйԝана бькә».

Муса жи щьмәʹт тʹәмам тʹоп кьр у готә ԝан: «Бьбьһен, кембаԝәрно! Дьхԝазьн, кӧ ньһа әз у Һарун жь ви зьнари ԝәрʹа аве дәрхьн?» Паше Муса шьвдара хԝә дӧ щара зьнар дьхә у ав жь зьнар мина канийа мәзьн кʹьшийа. Ава ԝан һьн тʹера ԝан у һьн жи тʹера һʹәйԝанед ԝан дькьр.

Ле Йаһоԝа ль сәр Муса у Һарун гәлә һерс кʹәт. Зани чьма? Чьмки ԝана готә щьмәʹте, кӧ ԝе әԝана хԝәха ԝанарʹа аве бьдьн, ле бь рʹастийе әв кьре Йаһоԝа бу. Ԝана щьмʹәт хапанд у ләма жи Йаһоԝа ԝана сущ кьр у гот: «Щьмәʹта мьне нә бь сәрԝертийа ԝә бькʹәвә Кәнане».

Паши ве йәке исраели жь Кадәше чун, у һьнә ԝәʹдә шунда һатьн бәрбь чʹийайе Һоре. Вьр, ль сәре чʹийе Һаруне 123 сали мьр. Щьмәʹта Исраеле гәлә бәрхԝә кʹәтьн у 30 рʹожи шина ԝи дькьрьн. Кӧрʹе Һарун Әләазәр сәва мьләте Исраеле бу кʹаһине пешьн.

Жьмар 20:1-13, 22-29; Ԛануна Дӧщари 29:5.