Сәрһати 41

Мәʹра Сьфьр

ҺӘЛА бьньһерʹә сәр стуне. Әв мәʹра ль сәр стуне те бежи йа рʹасти йә, ле бь рʹастийе әв мәʹр жь сьфьр һатә чекьрьне. Йаһоԝа готә Муса, ԝәки әԝ мәʹра сьфьр чекә у данә ль сәр стуна бьльнд, сәва кӧ мәри ле бьньһерʹьн у хьлаз бьн. Ле бьньһерʹә, әв мәʹред ль сәр әʹрде ида йе рʹасти нә, әԝана мәрийа дьгәзьн у нәхԝәш дьхьн ԝана. Гәло әв йәк чьрʹа дьԛәԝьмә?

Әв йәк ԛәԝьми чьмки щьмәʹта Исраеле диса дәстпекьрьн пешбәри Йаһоԝа у Муса хәвәр дьн. Әԝана дькьрьнә кӧтә-кӧт: «Тә чьрʹа мә жь Мьсьре дәрхьст, ԝәки әм дь бәрʹийеда бьмьрьн? Вьра нә ав һәйә нә жи хԝарьн. Әм ида нькарьн ве мане бьхԝьн».

Ле бь рʹастийе, мана гәлә хԝәш бу. Йаһоԝа бь кʹәрәмәте әв мана дьда ԝан, у ӧса жи бь кʹәрәмәте ав дьда ԝан. Йаһоԝа һʹәму алийава мьԛати ԝан дьбу, ле ԝана йәкә нәдьшькьранд. Ләма жи Йаһоԝа диԝана ԝана кьр у мәʹра шанд щәм ԝан. Мәʹра ԝана дьгәстьн у гәләк жь ԝан мәрийа мьрьн.

Хьлазийе мәри һатьн бал Муса у готьн: «Мә гӧнә кьр, чьмки мә пешбәри тә у Хԝәде хәвәр дьда. Лавайа Хԝәде бькә кӧ ван мәрʹа жь мә рʹәт кә».

Муса бона мәрийа дӧа кьр Хԝәдерʹа. Йаһоԝа готә Муса кӧ әԝ гәрәке мәʹра сьфьр чекә у ль сәр стунәки данә, у һәр кәс йе кӧ жь мәʹр гәсти бу гәрәке ль сәр мәʹра сьфьр бьньһерʹийа. Муса ԛьрара Хԝәде ԛәданд. Һәр кәс жь ԝан йе кӧ гәсти бун, чахе ль сәр мәʹра сьфьр дьньһʹерин перʹа-перʹа ԛәнщ дьбун.

Жь ве йәке әм дькарьн тьштәки хԝәрʹа һин бьн. Һәр кәс жь мә, дь тьштәкида, мина ԝан исраелийа нә, кʹижана мәʹр гәсти бу. Бьньһерʹә дор-бәре хԝә, мәри нәхԝәш дькʹәвьн, кал пир дьбьн у дь ахьрийеда дьмьрьн. Әв йәк ләма дьԛәԝьмә, чьмки Адәм у Һеԝа пешбәри Хԝәде рʹабун гӧнә кьрьн, у әм жи гьшк зӧрʹәтед ԝан ьн. Ле Йаһоԝа хәм кьр, ԝәки әм йәкә бькарьбьн һʹәта-һʹәтайе бьжин.

Йаһоԝа кӧрʹе хԝә Иса Мәсиһ шандә әʹрде. Мәрийа Иса ль сәр стуне, йане кʹенаре мьх кьр, чьмки ԝана тʹьре кӧ Иса мәрики хьрав ә. Ле Хԝәде кӧрʹе хԝә бәрва да, ԝәки мә хьлаз кә. Һәрге әм чʹәʹв дьдьнә Иса у пәй ԝи дьчьн, әме әʹмьре һʹәта-һʹәтайе бьстиньн. Һе зедә, дәрһәԛа ве йәке әме паше пебьһʹәсьн.

Жьмар 21:4-9; Йуһʹәнна 3:14, 15.