Сәрһати 42

Кʹәр Хәвәр Дьдә

ТӘ ԚӘ дәрбәки дитйә кӧ кʹәр хәвәр дә? «На», дьбәк тӧйе бежи. «Һʹәйԝан нькарьн хәвәр дьн». Ле Кʹьтеба Пироз гьли дькә дәрһәԛа кʹәрәки, йе кӧ хәвәр да. Ԝәрә пебьһʹәсьн әв ча ԛәԝьми.

Исраели һазьр бун кӧ бькʹәвнә әʹрде Кәнане. Балаԛ, пʹадшайе Моԝабе, жь исраелийа гәлә дьтьрсийа. Ләма жи әԝи гази мерәки аԛьлбәнд кьр, наве кʹижани Бьлам бу, ԝәки әԝ ньфьрʹа щьмәʹта Исраели бькә. Балаԛ соз дабу Бьлам кӧ һәбунәкә мәзьн ԝе бьдә ԝи. Ләма жи Бьлам кʹаре хԝә кьр, ль сәр кʹәра хԝә рʹуньшт у чу щәм Балаԛ.

Ле Йаһоԝа нәдьхԝәст кӧ Бьлам ньфьрʹа щьмәʹта ԝи бькә. Ләма жи Хԝәде мьлйакʹәтәки бь шурәки мәзьн дьшинә кӧ Бьлам бьдә сәкьнандьне. Бьлам мьлйакʹәт нә дьдит, ле кʹәра ԝи дьдит. Кʹәра Бьлам дьхԝәст жь мьлйакʹәт бьрʹәвийа ле нькарьбу, у хьлазийе ль сәр рʹе вәләзийа. Бьлам гәлә һерс кʹәт у кʹәра хԝә да бәр шьва.

Йаһоԝа ӧса кьр, кӧ Бьлам бькарьбә хәвәрдана кʹәра хԝә бьбьһе, у кʹәр ԝирʹа гот: «Мьн чь хьрави тә кьрийә, чьрʹа тӧ мьн дькʹӧти?»

Бьлам щава хԝә да: «Чьмки тӧ ԛәрфа мьн дьки. Һәрге шуре мьн һәбуйа, мьне тә бькӧшта!»

Кʹәр гот: «Һʹәта рʹожа иро, мьн ԛә тьште ӧса кьрийә?»

«На», Бьлам готә кʹәр.

Паше Йаһоԝа чʹәʹве Бьлам вәкьр, у Бьлам ль сәр рʹе мьлйакʹәте бь шурва дит. Мьлйакʹәт готә ԝи: «Тӧ чьрʹа кʹәра хԝә дьхи? Әз һатьм кӧ рʹийа тә дадьм, ԝәки тӧ нәчи у ньфьрʹа щьмәʹта Исраели нәки. Һәрге кʹәра тә нәсәкьнийа мьне тә бькӧшта, ле кʹәра тә ԝе сах бьма».

Бьлам щава хԝә да: «Мьн гӧнә кьр. Мьн ньзаньбу кӧ ль сәр рʹе тӧ сәкьнийи». Мьлйакʹәт Бьлам һишт, у Бьлам чу щәм Балаԛ. Әԝи йәкә дьхԝәст ньфьрʹа исраелийа бькьра. Ле Йаһоԝа ӧса кьр кӧ дәԝса ньфьрʹа әԝи се дәрба исраелийа кʹәрәм кьр.

Жьмар 21:21-35; 22:1-40; 23:1-30; 24:1-25.