Сәрһати 43

Йешу Дьбә Сәркʹар

МУСА дьхԝәст тʹәви исраелийа бьчуйа Кәнане. Ләма жи әԝи готә Хԝәде: «Йаһоԝа, әз һиви тә дькьм, кʹа әз жи жь чʹәме Урдӧне дәрбаз бьм у әʹрде баш бьвиньм». Ле Йаһоԝа гот: «Бәс ә! Дәрһәԛа ве йәке мьнрʹа ида хәбәр нәдә!» Гәло Йаһоԝа чьрʹа ӧса гот?

Чьмки чахе Муса зьнаре хьст, әԝи шькьр нәдә Йаһоԝа сәва аве. Муса у Һарун щьмәʹт хапандьн у жь ԝана вәшартьн кӧ әв кʹәрәмәт бь дәсте Йаһоԝа һатә кьрьне. Бь ви мәʹни Йаһоԝа нәһишт кӧ Муса бькʹәвә Кәнане.

Һьнә мәһа паши мьрьна Һарун, Йаһоԝа готә Муса: «Щьмәʹт тʹоп кә у ортʹа ԝан у Әләазәре кʹаһин, Йешу бьдә сәкьнандьне. Бәр ԝан һʹәмушкарʹа әʹламәти кә, кӧ Йешу ԝе бьбә сәркʹаре ԝанә тʹәзә». Ль сәр шькьли те кʹьвше кӧ Муса һәма ӧса жи кьр.

Паше Йаһоԝа готә Йешу: «Мерхас бә у нәтьрсә. Тӧйе исраелийа бьви әʹрде Кәнан, йе кӧ мьн соз дабу ԝан, у әзе тʹәви тә бьм».

Паше Йаһоԝа готә Муса, ԝәки әԝ һьлкʹьшә ль сәр чʹийайе Нәбо, йе кӧ дь әʹрде Моԝабеда бу. Жь ве чʹийе чʹәме Урдӧне рʹьнд дьһатә кʹьвше, у кʹеләка Урдӧне жи Муса дькарьбу әʹрда Кәнане бәдәԝ жь сәри һʹәта хьлази бьдита. Йаһоԝа Мусарʹа гот: «Әв әԝ әʹрд ә, йе кӧ мьн соз дабу зӧрʹәтед Бьраһим, Исһаԛ у Аԛуб. Әз дьһельм ԝәки тӧ ви әʹрди бьвини, ле изьне надьмә тә, кӧ бькʹәви Кәнане».

Ԝи чахи Муса ида 120 сали бу, ле сьһʹәт-ԛәԝата ԝи һе һәбу, һʹәта һе чʹәʹве ԝи жи рʹьнд дьдитьн. Ԝьр, ль сәр чʹийайе Нәбо, Мусайе 120 сали мьр. Щьмәʹта Исраел гәлә бәрхԝәкʹәтьн у гьрин кʹәтьбу нав щьмәʹте сәва мьрьна Муса. Ле әԝана ша дьбун кӧ сәрԝере ԝан тʹәзә һәбу у сәва кӧ Йешу һатә кʹьвшкьрьне.

Жьмар 27:12-23; Ԛануна Дӧщари 3:23-29; 31:1-8, 14-23; 32:45-52; 34:1-12.